9
Seeƴuk ciŋ Ambtiɗohi Koc
1 Ŋ Ambtiɗoha Koc, ɓi nakoh tufkiɗasseen ne ca teeɓ ɓooɓi findi ɓa joy ñaamkoh Kooh. Wa nammba raak ɗisik hooliɗ ŋ kehƴi, ñaamkohaa ɗe.
2 Wa nikka ɗiipa nikee Kahan Kooh ; ɓakaŋ wa koc teeksee Ɗiska Hooliɗa, degohaanaŋ laampaaca nikee nga na taaɓla na degohse mbuuruuci wuu Kooh.
3 E rido saɓsohee wa na ɓaka kanakɗoh ; ɓakeem teeksee Ɗiska Hoolohngaana.
4 Ndaam raakeen seeƴkoha hoomɗoha cuuraay ; seeƴkohaanaam haɓɗohsee urus.
Wahndeenaŋ Ambtiɗohi namee nik nga, wa muurohuusa urus ŋ ɓak ci jen. Meeme haɓɗohu urus ɓekseen ŋ wahndeena, weɗ tumohsee maana, kañam ka Israayel ci eɗsee ŋ kehƴa hulanga. Ndooɗaŋ Aaruna namee nik ŋ wahndeena, weɗ ndooɗa pulɗee kifis na pos. Atoh ca ɗapas ca fu inah ne woo ciŋ Ambtiɗohi fiissee nga ca, namee ɗaaku nga.
5 Nataal caŋ feruuɗ ca nik ŋ Asamaan, ci na woyse seruben deguusa ŋ ɗafuk wa ne ca teeɓoh ne yaki Kooh yak waa ŋ ndaam ; paɓ ciŋ ca saangneeɗa kunohaana, weɗ ɗiska na ɗaasohse bakaaɗ. Waaye pooksohiŋ ƴohiŋ woo ceem, wa tahɗi ɓoo kuruk.
6 Mbaa, in ceem jen tufkiɗohsee ɗaa. Kooh-nu-wiis ɗah, seeƴkiɗoh ca aas ŋ ɓaki koc ne ɓa haɓiɗ pangkiŋ ɓa.
7 Waaye a seeƴkiɗohi yakki dong meeɗ aas ŋ ɓaki kanakɗoh te wa na nikee waas yino ŋ kiis ki. A aasuu nga muk ɓayndohaaɗi ñif ; ñif meem, a wiŋ ɗoopti a seeƴkoh wuu bakaaɗ ciŋ ɗe haf ce na ci ɓooɓi tum te ɓa tiiɗi ca.
8 Fuuɗsi Hoolohngaani na teeɓohe ndii ne, feeh ɓaki koc wa ɗii nga ɗah, waasi kaɗ ŋ Ɗiska Hoolohngaana rangsuuɗi paaɗ.
9 Wa ñaamaar ngaŋ jamanooni woti ; wa tokis ne onoh ci na seeƴuk ci wuu Kooh minɗi tah hafiŋ ɓoyi na tumee ca yeeɓuk jameet ŋ ini kaɗ ŋ bakaaɗ ciŋ ɗe.
10 Ca nakoh ci top ŋ faan dong, findi kañam ci na anaah ci na farsuk ci ɗalohiɗ ci. Ca nikee nga po findi Kooh eɗoh tiindohaaɗi asi.
Mucɗohi Gapohse seeƴkoh kiñin kiŋ ɗe
11 Kiristaani hayiɗ findi Seeƴkiɗoh yakak ne a rangis waasiŋ in ci baahiɗ ci hay. A aas ŋ ɗiipi uup yak, uuppa mit, Kahnaŋ Kooh wa yaah ɓo' haɓiɗɗi, weɗ ne wa ɓaahɗi ŋ ferii.
12 A aasiɗ nga po ŋ ɗooƴ Ɗiska Hoolohngaana ; wa nikka waasi yinooreem. A eɗohɗi ñif suket nga wala ñif ɗoon, a eɗoh ñif miŋ ɗe, a rahassa muciŋ ɓoo po faw.
13 Ɓo' hoolaaɗi, a lisu ñif suket wala ñif naar-coc, wala weti kooɗohu ŋ inoh yu' dohuuɗ ɗah, wa ɓokit faaniŋ ɗe.
14 Nik ne wa raakoh ɗaa ɗah, ñif miŋ Mucɗohi Kooh gapohee weɗ joy uupiɗ hatil. Mucɗohi taamboh ŋ Fuuɗsi Hoolohngaani, yi gen gen, a eɗta haf ce Kooh. A nikka seeƴkaah raakaaɗi sikka, a hey ɓoo ɓokte ŋ tumohaaɗ ci na ɓayohe ŋ kakaan po haf ciŋ ɓoo yeeɓuk ŋ ini kaɗ ŋ bakaaɗ ciŋ ɓoo, ne ɓoo min ñaamuk Koohi na pese.
15 Ɗaa, ngaŋ Ambtiɗohi Asi Kooh tufkiɗ na ɓooɓi, a Mucɗohi Gapohse a yi nik ŋ harmban ce na ɓa, ne ɓooɓi Kooh ɓeeɗuk min rahas lamaahi minɗi reeh, wi a gapee ɓa. Ini tah po ɓa heya mine rahas weɗ ne, kaani etohsee kaanuuɗ, kaani joyee tos ɓooɓi ŋ bakaaɗ ci tumsee ŋ Ambtiɗoha Koc.
16 Ɓoyi kaan, te raak ɗe dengkohiɗ findi raak-raak kiŋ ɗe joy paysohohu ɗah, wa joyiɗ hoolɗu ne kakaan kiŋ ɓoyeem raakiɗ.
17 Laam, e kakaan na tufkiɗe dengkoh ; feeh ɓoyeem yii pes ɗah, dengkohiŋ ɗe tufukɗi.
18 Ambtiɗoha Koc mand ɗaa, feeh ñif aamkeeɗi ɗah wa heeɗi cambe tiindɗu.
19 Wa Musaa woo ɓooɓa jen nakoh nu nik ŋ waasi po ƴutta, a ɓayya ñif maŋ ɗoon ca [na waŋ suket ca] a ambsohha ca na masuɓ, a ɓayya car hisoɓ, a tokiɗtaa ooy ruumind haɓɗohuuɗ find mbaal. A ɓekeeɗaa ŋ ñif ma, a liseeɗaa, po ŋ teerndiŋ waasi sah ; a nammbaa lis ŋ ɓooɓa jen.
20 A woyeeɗa ne : « Wii, weɗ ñif mi aamu wuu ambtiɗohi Kooh tufkiɗ na ɗu. »
21 A nammba lis ñif ma ŋ ɗiipa nikee Kahnaŋ Kooh na in ca ɓa na njirñiɗkohe jen ne ɓa nikiɗeesa Kooh ɗah.
22 Findi waasi woyoha, ini uup ngaŋ in ci jen na farsohse ñif, ñif aamukɗi ɗah, ɗaasoh bakaaɗ raakanɗi.
Mucɗohi Gapohse eɗohiɗ haf ce waas yino po faw
23 Nik ne ñaamaariŋ in caŋ ɗafka weɗ joy farsohu ɗaa ɗah, kon seeƴki joy hooliɗ in ca kiyooh ca ŋ ɗafka joy uup.
24 Kiristaa aasɗi ŋ Ɗiski Hoolohngaani yaah ɓo' haɓiɗ, weɗ wi fu inah ne wa ñaamaariŋ Ɗiska Hoolohngaana keeh-keeha ; a aas ŋ ɗooƴ Eel ci sah te ɗiski wa nik, a yaa tufkiɗta ɓoo ŋ fiki Kooh.
25 Ŋ waasiŋ Musaa, kiis nu ree ɗah, seeƴkiɗohi yakki aas ŋ Ɗiska Hoolohngaana na ñif mi nikɗi wiŋ ɗe ; waaye Kiristaa, a aasɗi ŋ ɗooƴ Eel ci ne a eɗohe kipes kiŋ ɗe a eɗohissee wa.
26 Wa nikohee ɗaa ɗah, mbaa a heen joye yaaɓ waas laayiɗ ŋ ina Adina camboh po wi. Waaye a hayiɗ waas yino ngaŋ jamanooci mirndoh, ne a moos bakaaɗ ciŋ ɓooɓi ŋ seeƴki a seeƴkoh haf ce.
27 Findi ɓo' na kaanohe waas yino, ƴut ɗah, a taamb ŋ atteena,
28 Mucɗohi Gapohse namiɗ eɗoh haf ce ɗaa waas yino po faw, ne a deguk bakaaɗ ciŋ ɓi ɓo' laayiɗ. Ƴut ɗah a hayis waasiŋ ɗe kanakɗoh, te bakaaɗ ci tahuu, waaye a hayissan ne a teeɓuk ɓi seesuk ɗe hot ne ɓa rahas muci.