24
1 «Macin se Hini-kul-koyoo si waati kayandi ciitiyan se?
Macin se borey kaŋ gʼa bay si dii haney din?
2 Boroyaŋ ga ngi faarey kanjey silbawey hibi kʼi tonton,
i ga alman kur zay kʼi kur ngi boŋ se.
3 I ga alyatimey farkawey dii ka koy,
i ga woyey kaŋ kurɲey buu hawoo dii tolme.
4 I ga alfukaarey kaa fondaa ga,
gandaa talkey kul ga tugu.
5 Sanda ganjifarka kaŋ goo saajoo ra,
i ga koy goy za alfazar ka ŋaayan ceeci,
ganganoo ra i ga duu ŋaayan ngi izey se.
6 I ga subey dunbu hawsaa ra,
i ga boro futawey alaneb-izey kurma-kurma,
7 I ga cijinoo tee gaa koonu bila bankaaray,
i sii nda gum taafe hargoo se.
8 Tondi hondey ncirɲey nʼi tayandi,
i sii nda tugudoo, i mma ngi boŋ naagu tondey ga.
9 Boroyaŋ ga alyatimoo hoobu kʼa taa ɲaŋoo kone,
i ga talkaa almaney dii tolme.
10 I ga dira gaa koonu bila bankaaray,
i ga heray, i ga jeeniyaŋ jere.
11 I ga jii tee zaytuɲaŋey jere,
i ga alaneb-ize hari kaa, amma i ga jaw.
12 Koyraa ra borey kaŋ ga buu ga yooyo,
borey kaŋ maray ga hẽe, i ga kaati ka faaba ceeci,
amma a mana tee Irkoy se haya kul.
13 Boroyaŋ no kaŋ ture gaayoo ga,
i si nga fondawey bay,
i si cindi nga fondawey ra.
14 Boro wiikaw ga tun waati kaŋ gaayoo bangay,
a ga talkaa nda alfukaaroo wii.
Cijin here a ga hima nda zay.
15 Zinateeri ga almaaroo monno,
a ga nee: ‹Boro kul si dii agay.›
A ga sanfiti gum nga ndumoo ga.
16 Kubaa ra, i ga hugey kayri ka huru i ra,
zaaroo ra, i ga ngi boŋ daabu hugu ra,
i si gaayoo bay.
17 Ngi kul se, subbaahi manʼti kala buuyan biyoo,
i ga buuyan biyoo torraa bay.
18 War ga nee kaŋ haroo ga koy nda boro futu nda gaabi,
laaliyan ti nga bagaa laboo ga,
a si yee ka alaneb faarey fondaa zaa.
19 Sanda takaa kaŋ nda kogay
nda konnoo ga neeži hari kogandi,
takaa din da alaahara ga zunubantey derandi.
20 Gundoo kaŋ ra a hun dirɲa a,
nooney ga maakaani a ra.
Šerretaray jaŋay ka kayri sanda tuuri.
21 Woy gun do a ga koy, woy kaŋ sii nda ize,
a si gomni tee woy kaŋ kurɲoo buu se.
22 Amma Irkoy ga nga gaaboo ka gaabikoyney kar.
Nda a tun, boro si yee ka tammahã hunayan ra.
23 A gʼa naŋ, a ga hongu nga goo alaafiya ra,
amma moɲey goo ngi fondawey ga.
24 Boro laaley ga jerandi waati kayna, woo banda ga, i ga dere.
I ga kaŋ sanda takaa kaŋ nda tuuri fita ga kaŋ,
i ga dunbandi sanda jeeniyaŋ.
25 Manʼti woo no wala, may no ma hin kʼay taarandi?
May no ma hin kʼay šenney kakaw.»