99
Abadantaa ti Kokoy henanantaa
1 Abadantaa ti Kokoy,
jamawey ga jijiri.
A goo ma goro almalaykey boŋ kaŋ se i ga nee šeribey.
Laboo ga jijiri.
2 Abadantaa ga beeri Siyoŋ koyraa ra,
nga no ka jerandi ka bisa jamawey kul.
3 Yala i ma ni maaɲoo saabu kaŋ ga beeri,
a ga hunburandi, a ga henan.
4 I ma Kokoyoo kaŋ ga baa šerretaray hinoo mo saabu.
Ni no ma cimoo tabatandi,
ni no ma cimi nda šerretaray tee Yakuba borey ra.
5 Wa Abadantaa, ir Koyoo jer,
wa sujudu nga cee-jisidogoo jine,
zama a ga henan.
6 Musa nda Haruna kaŋ goo nga sargari juwalkey ra,
Samiyel kaŋ goo borey ra kaŋ ga maaɲoo cee,
i na Abadantaa cee, a nʼi zaabi.
7 A šelaŋ i se duulaa kaŋ ga kay ra,
i na nga seedetarawey dii
nda yaamaroo kaŋ a nʼi noo i se.
8 Abadantaa, ir Koyoo, ni kʼi zaabi.
Ni tee i se Koy kaŋ ga yaafa,
amma nʼga ngi teegoy futawey bana i ra.
9 Wa Abadantaa, ir Koyoo jer,
wa sujudu nga tondi hondu henanantaa here,
zama Abadantaa, ir Koyoo ga henan.