6
1 Di obe wɔ buɔbla ni ɔkpɛ ku Yaa oso, buotikiti ye lekoto bulɛ, bitanta Yaa sibualɛ se eele ye ni labla kasakasa.
2 Diekye Yaa labuɛ alɛ,
“Obe wɔ ninlɛ alɛ kanya fɔ ni nyaami, lanu fɔ lɛlɛɛ.
Dii le dikaatɛ alɛ kadiki fɔ ni lawo nii, lakyakaako fɔ.”
Binu! Kɔtɔkɔ ye nlɛ nunua ninle obe wɔ diesiɛko alɛ Yaa kanya ni nyaami nɛ. Miɛ ninle dii le di Yaa kodiki ye ni nɛ.
Paulo Lakyakako Dibuo.
3 Buloomiɛ bulɛ otii kuonwii anya okpile kuonwii di ɔkpɛ loo ɔbla kamɛ. Nle mmle oso munɔɔbla lɛsaa le nimata alɛ batii dilabawa ni Yaa nfũ nɛ.
4 Kafɔɔ lɛsaa lele buɔbla, mundiki muntuo klekle bulɛ Yaa bakpɛmblatɛ bule. Munkpee otu osie kanya di amiina ku abuo ku atikanko kamɛ.
5 Batii mpɛ wo mantɛ wo leeyo, manya ɔblɔ kafɔɔ osie kanya mankpeeko wo. Mumbla ɔkpɛ kafɔɔ munlenkeesa suoto, munnte buakyɔsii kafɔɔ, kɔka kafɔɔ nlo wo.
6 Buadiki suoto buatuo bulɛ bule bakpɛmblatɛ biene di mmle okle buabla ni suoto klekle ku mmle buye ni Yaa ɔlaa biene nwu nkpo. Buawakosa suoto kasɔ ku ɔsaabla di batii kamɛ, buabla kafɔɔ sifutulɛ. Yaa Ninwuna nsi wo kaamɛ, ni buabɔmbɔ batii ku kafutu ka niɛkpa ni nɛ.
7 Bulɔɔkyɔnkyɔ batii ku ɔlaa loo obuɛ. Yaa osie wɔ nintikanko wo ni kotuo kafɔɔ alɛ bule nwɔ bakpɛmblatɛ. Nkpa loo tinini osiɛ kafɔɔ nle wo lɛsaa biala di ɔkpɛ wɔ mmle kamɛ. Dite fɛ akpɛsaa ya di kpɛtɛ nklee ankpɛ nii.
8 Batii bawo mbu wo, bawo kafɔɔ nkpee wo sinunsɔ. Bawo ntufa wo, bawo kafɔɔ ntansa wo. Batii bawo kɔnya wo fɛ balaatɛ, kafɔɔ ɔlaa wɔ buobuɛ nii, kute nkpo.
9 Batii lɛbla fɛ baaye wo, kafɔɔ bamuu n-ye wo kaakɔ biala. Boonyu wo fɛ butookpi, kafɔɔ binyu! Buokple busi nkpa! Bɛɛnanfi wo kootoko, kafɔɔ buokpi.
10 Kuntɛ suoto loo kɔkpɛ nyaami, buɔnya suoto lɛyɔɔ obe lele. Bɔɔnya wo fɛ bapiitɛ kafɔɔ buɔta batii makple Yaa Kafa basaawɛntɛ. Bɔɔnya wo fɛ batii ba ninnaa ni lɛsalɛsaa, kafɔɔ asaa amuu nle wo ale.
11 Babiloo Korinto batii, buodiki kafutu loo kamɛ buɔkakatɛ buɔta ye. Buofũ ye siitu loo kamɛ.
12 Buoodiɛ ye nnɛɛ, kafɔɔ aye niesĩ wo.
13 Nioso kɔkakatɛ nta ye fɛ mmle di obi ote nkakatɛ anta ni babi. Nioso fɛ mmle munandiɛ ye ni nnɛɛ, aye kafɔɔ bitansĩ wo.
Otii Wɔ Niefũ Eenu Ni Ku Otii Wɔ Ninanfũ Anu Ni Nnaa Onwii Ɔbla.
14 Bilolaa binyu bilɛ aye ku batii ba ninanfũ banu nii, biɛbla onwii ku mma. Diekye lɛsaa le ninante ni tinini ku lɛsaa le ninte ni tinini dilaafuo onwii ɔbla. Nwaako, lɛkpa ku ditunu kafɔɔ dilaafuo osiɛ di lɛba ninwii.
15 Kristo ku Abonsam dilaafuo onwii ɔbla. Nkpo okle kafɔɔ di otii wɔ niefũ eenu ni ku otii wɔ ninanfũ anu ni dilaafuo onwii ɔbla nɛ.
16 Afiɔ olekatakɔ ku Yaa Olekatakɔ, nimbla onwii. Nkpo oso awo kafɔɔ buosiɛko afiɔ, diekye awo ninle Yaa wɔ ninkpe ni nkpa kasiɛkɔ. Fɛ mmle di Yaa omu labuɛ ni alɛ, “Mabla kasiɛkɔ kaamɛ lɛma, nsiɛ ku mma, male ma Yaa, mma kafɔɔ manle mi batii.”
17 Nkpo oso Saate nwu labuɛ alɛ,
“Bidie ma kaamɛ,
biɛblasa suoto lee kaamɛ lɛma di afiɔsaa ɔbla suoto.
Bitambla lɛsaa le nimakpɔnɔnfɔsa ye ni kuninwii,
ni kamafũ ye aatuu.
18 Ni kamale ye Kote,
aye kafɔɔ minle mi babi suɔtɔbi ku babi sankobi.
Fɛ mmle di Yaa wɔ ninlenke ni lebuɛ nii.”