7
1 Babiloo bɔmbɔtɛ, obe wɔ di Yaa ntɔɔka asaa ya mmle amuu ntam ɛɛta wo ni oso, bita bubla suoto klekle budiki diɛ asaa ya amuu nimata alɛ suoto loo ku ninwuna loo nkpɔnɔnfɔ ni. Biɛta buyɔ suoto loo simuu kafɔɔ butɔɔ leeklekle kamɛ, diɛ obe wɔ buɔyɛkɛ nwɔ ni.
Paulo Lanya Suoto Lɛyɔɔ Di Obe Wɔ Di Korinto Batii Lakyisa Ni Nkpa.
2 Bifũ wo siitu lee kamɛ. Buɔbla kuonwii lee okpile, buɔnanfi kuonwii lee kafɔɔ bufenko di osuku kpile kuonwii suoto ee butafaa kuonwii lee.
3 Noobuɛ ɔlaa wɔ mmle nlɛ kɔyɔ nlo ye lɛpɔɔ. Diekye ntooyibuɛ lɛbafe nlɛ, biefũ wo kɔya. Nkpo oso kukpi kamɛ wo, nkpa kamɛ woo, lɛsalɛsaa kuninwii dilaafuo wo ntɛɛ ɔblasa.
4 Letika ye anu osie kanya! Nkanta kafɔɔ ta aye oso. Otu nii ntoote. Di abuo loo amuu kamɛ yi, suoto kɔyɔɔ mi ninfensa.
5 Obe wɔ buawa buababuo ni Makedonia bia, butawɛ onwu buanwuna lebeleebe. Diabuo wo di sisuku ate ate suoto. Batii kafɔɔ latɔɔkpɛko wo, lɛyɛkɛ lasiɛ wo kaamɛ.
6 Kafɔɔ Yaa wɔ ninkpee ni batii ba di nnɛɛ ntoofee ni lakpee wo osie obe wɔ di Tito lakye ɔkyɛ lee aawa nii.
7 Diele Tito lɛwa nwu lete niata alɛ suoto layɔɔ wo. Kafɔɔ otu okpee sɛlaa se aakyeko ɔkyɛ lee aawako ni nkyakaa. Aatɔkɔ wo mmle okle biomiɛ osie kanya bilɛ biɔnyɛɛ nii, ku mmle di okpile lee lebuo ye ni suoto, ku mmle bielolaa suoto bilɛ bioyila mi ni kamaa osie kanya. Ta nninkpo oso di suoto lakple siayɔɔ mi sialenkee nɛ.
8 Kuntɛ bia kukũ ko lakpana ye ni lafeesa ye nnɛɛ, nwaako, dilɛ alɛ lakpana kũ. N-ye nlɛ kukũ nwu nkpo lakpana ni lafeesa ye nnɛɛ, kafɔɔ obe kakuii kamɛ lete ko diaale, amii diakpɛ mi nyaami.
9 Kaasɔ kakyekɔ yi, suoto ditayɔɔ mi alɛ nnɛɛ lafee ye. Kafɔɔ nunua yi, suoto kɔyɔɔ mi. Diele alɛ mmle ninnɛɛ lafee ye ni oso di suoto kɔyɔɔ mi, kafɔɔ diata alɛ biekyisa nkpa. Nnɛɛ lafee ye fɛ mmle di Yaa komiɛ nii. Nkpo oso lɛsaa le buabla ni lɛkyakaako ye osie kanya.
10 Nse nnɛɛ lefee otii owo fɛ mmle di Yaa komiɛ nii yi, otii nwu nkpo nkyisa nkpa, andiɛ sikpile ɔbla, anwɛ didiki, nimbuo nwɔ suoto kafɔɔ. Kafɔɔ nse kayi ka mmle asaa suoto ninnɛɛ lefee nwɔ yi, ni kukpi anfũ anta suoto.
11 Binyu mmle okle di suoto dibuo le niekye ni Yaa nfũ kɔbla ni ɔkpɛ osie kanya di kamɛ lee lo. Diɛta biokpee okyiini di ɔsaabla suoto. Diɛta alɛ biokpee okyiini bilɛ biodiki suoto di sikpile kamɛ minsiɛ nkpa klekle. Diɛta alɛ minnya ɔblɔ di asaa ya ninankaatɛ ni suoto, minyɛkɛ nya kafɔɔ ɔbla. Diɛta bionyu lɛsaa finle osuku, diɛta mimbla lɛsaa nkyenkye. Diɛta alɛ ninu nsɛɛ ye alɛ biananfi kpileblatɛ kootoko. Di asaa amuu kamɛ, mindiki suoto mintuo bilɛ bite klekle di ɔlaa nwu kamɛ.
12 Nioso, kuntɛ lakpana kukũ nwu nkpo lakyesee ye yi, diele otii wɔ niabla ni okpile oso, ee diele otii wɔ suoto baabla ni okpile nwu oso lakpana. Kafɔɔ lakpana kũ nlɛ kɔta ye mintofo di Yaa anu mmle okle biobu wo ni osie kanya.
13 Nle mmle oso di otu ntoote wo nɛ.
Diɛkyakaa ni di otu ote wɔ buɔwɛ ni suoto yi, suoto lekple siɛyɔɔ wo sielenkee di suoto lɛyɔɔ le di Tito lanya ni oso. Diekye bamuu lee biata otu nɔɔ late kaasɔ.
14 Lakanta di suoto lee latɔɔ, bíekpee mi sinunsɔ kafɔɔ. Asaa ya amuu buɔtɔkɔ ye ni obe lele, nwaako sɛlaa sile. Nkpo okle kafɔɔ lɛɛkanta loo le buɔkanta ni di Tito anu ntootuo alɛ kute nkpo nɛ.
15 Nkpo oso nse eenyuma mmle okle di bamuu lee bialolaa suoto biakyɔɔ nwɔ ni ɔlaa atoko, ku mmle okle biafũ nwɔ ni di suoto kasɔ ɔwakosa ku dibu oso yi, lɛbɔmbɔ nɔɔ nkple nintaka katoo ninta ye.
16 Suoto kɔyɔɔ mi diekye nunua kafuo ye disi otika di lɛsaa biala suoto.