13
Gu Jesuus na puiꞌ ba ja tɨɨdaꞌ jɨꞌkchi gu jaꞌtkam na ja aꞌm jum aaꞌ nam miꞌ puiꞌ ba jimiaꞌ na jax jix aaꞌ gu Dios
1 Baꞌ jɨꞌkchi gu jaꞌtkam miꞌp ba aaꞌñdhim am gu Jesuus, nat sap gu Pilaato tu chia bhaiꞌ Jerusaleen nam ja koodaꞌ jɨꞌkchi gu jaꞌtkam Galilea kam, nam bhaiꞌ oipot gɇꞌ chiop ka tu makgɨrxiꞌñ gu Dios. Sap baꞌ gu ja ɨꞌɨɨr kɨꞌn tum jupsusa bɨɨx xikoolh bhaiꞌ na paiꞌ tum makgɨrxiꞌñ gu Dios, na paiꞌ gu sasoiꞌ gu ja ɨꞌɨɨr kɨꞌn jup tum jupsus.
2 Baꞌ gu Jesuus jup ja tɨtda:
―¿Guꞌ baꞌ aapiꞌm jaꞌp jum aaꞌ aa nam dai guiꞌx ioꞌm jix uꞌuaꞌtulhdhix kat na mɨt ba ja koi, guꞌ baꞌ panaas cham pɨk gu jaiꞌ nam puiꞌ mup oiꞌdhaꞌ Galilea?
3 Matgɨm bɨɨx ji nam puiꞌx ioꞌm jup jix uꞌuaꞌtulhdhix, puiꞌp ja tulhiiñchudaꞌ gu Dios noꞌ mɨt cham soiꞌm ɨlh buiñor, sia aapiꞌm noꞌ pimɨt cham soiꞌm ɨlh.
4 Gio janoꞌ na mɨt mambhɨɨx daman xijum baik gu jaꞌtkam koi, nat ja tɨim gu tɇb bhiꞌñbak nat ia bhaiꞌ Siloe, ¿jaꞌp jum aaꞌ pim aa nam dai guiꞌx ioꞌm jup jix uꞌuaꞌtulhdhix kat kut baꞌp tu ja dooda, guiꞌ baꞌ panaas cham pɨk uꞌuaꞌtulhdhix am nam bhaiꞌp oiꞌdhaꞌ Jerusaleen?
5 Bɨɨx ji nam puiꞌx ioꞌm jup jix uꞌuaꞌtulhdhix, sia puiꞌp ja tulhiiñchudaꞌ gu Dios noꞌ mɨt cham soiꞌm ɨlh buiñor, sia dho aapiꞌm nañ jax ba kaiꞌch.
Gu Jesuus na ba tu aꞌgaꞌ bhaan ji uaꞌrgidhai maaꞌn gu iigɨx na cham iꞌbhaiꞌñchardaꞌ
6 Baꞌ bhaan ji uaꞌrgidhak gu Jesuus maaꞌn gu iigɨx, jup ja tɨtda:
―Maaꞌnnim maaꞌn gu maaꞌnkam tɨi ɨꞌɨɨx kaꞌ maaꞌn gu iigɨx mu na paiꞌ tɨ ɨꞌɨɨx kaꞌ gu uubas, guꞌ ji na guꞌ cham iꞌbhaiꞌñchardaꞌ. Maaꞌnnim baꞌ giop ma tɨɨgim noꞌ cham iam bax iibhaidhaꞌ nat jumai oidhaꞌp ba aich. Nim maaꞌn ku bha dhaa na bhaiꞌ tɨi ba nɨnɨiꞌñ.
7 Baꞌp tɨtda guiꞌ na miꞌx bhaiꞌ buadaꞌ gu uubas: “Iaraꞌ ap dhi iigɨx, na guꞌ cham iꞌbhaiꞌñchar. Sɨlh pɨx na bha jaꞌk cham bhaiꞌ. Bas maakɨꞌn dɨr tɨi bhaiꞌ ba nɨnɨiꞌñ iñ noꞌ cham iam bax iibhaidhaꞌ, pu nim maaꞌn ku bha daakaꞌ, na guꞌ chi bak cham tu iꞌbhaiꞌñchar.”
8 Baꞌp kaiꞌch guiꞌ na miꞌx bhaiꞌ buadaꞌ gu uubas: “Ea nach dai xib pɨx dhi oidhaꞌ ba nɨɨraꞌ noꞌt cham iam ba iibhaiꞌch. Aañ ka xi moikxidhaꞌ gio nañ mi tu buidhimɨi gu tuꞌ na kɨꞌn jix bhaiꞌm duñiaꞌ.
9 Miꞌ baꞌ noꞌt guꞌ cham ba ji iibhaiꞌch, dai nañ ba iaraꞌ.”
Gu Jesuus na ba duaꞌñdhaꞌ maaꞌn gu ubii janoꞌ pɨk na paiꞌ dhuuk cham tum juandaꞌ
10 Maaꞌnnim gu Jesuus ma jii maaꞌn kap nam paiꞌ tu chiopiꞌ kaꞌ gu Israel kam jaꞌtkam, janoꞌ mu jii nam paiꞌ dhuuk cham tu juandaꞌ dai gu Israel kam jaꞌtkam. Baꞌ miꞌ bhaiꞌ ji chu ja aꞌgi guiꞌ nam jɨꞌk miꞌp tuꞌiiꞌ.
11 Baꞌ maaꞌn miꞌx jaiꞌch kaꞌ gu ubii jagɨꞌ na gɇꞌx kaboorak kaꞌ komiꞌram dɨr. Ampɨx jix dhumaaram tu oirɨdaꞌ, gio na bhaan pɨx jix kaꞌook kaꞌ, pu cham bhaaiꞌn kaꞌ na jax jum sɨlhñaꞌ. Maaꞌn gu cham kɨɨꞌ iiꞌmdaꞌ puiꞌ jaꞌk duukaꞌ. Mambhɨɨx daman xijum baik oidhaꞌ bap duu na dɨr puiꞌ ba tuꞌiiꞌ.
12 Nat paiꞌ dhuuk tɨɨ gu Jesuus na mi jaꞌp daa, mu jaꞌk xi baidhak amuub jup tɨtda:
―Xiib yaꞌ dodhiaꞌ ap ji matgɨm jiñ jaduuñ dhiꞌ nap tuꞌ kɨꞌn jix kaꞌook. Chaꞌp jax kam aaꞌndaꞌ.
13 Baꞌ palhɨɨp bhaiꞌ xi dhaa komiꞌram. Jotmodaꞌ miꞌ bhaiꞌ jim sɨlh, jix kɨɨꞌp jum duu. Baꞌ gu ubii ma taxchaabgi gu Dios jix dhaam jaꞌk.
14 Baꞌ bhaiꞌ ji bhaam guiꞌ na miꞌr gɇꞌkam kaꞌ chiop nat ba tu duaꞌñ gu Jesuus na tɨi cham tum juan. Jup ja tɨtda bɨɨx nam jɨꞌk miꞌp tuꞌiiꞌ:
―Janoꞌ pim bha jimmɨdaꞌ na paiꞌ dhuuk tum juandaꞌ noꞌ pim jix dhuduadhik, cham tuꞌ xib na paiꞌ dhuuk aagix nach cham tuꞌ jax buadaꞌ. Tuꞌ kaꞌm japim xi chɨ nɨiꞌñdhat.
15 Baꞌ gu Jesuus jup tɨtda:
―Puiꞌ pɨx kaiꞌch ap ji matgɨm. ¿Kux aapiꞌm aa cham jɨꞌxkat iꞌchdhapuꞌ gu jam bhuruꞌxiꞌ piam tuꞌ jam tuuruꞌ noꞌ janoꞌ pɨk giilhim bax chanoom na paiꞌ dhuuk tɨi cham tum juandaꞌ?
16 Puꞌñi dhop ji buusan dhiñ jaduuñ nar boxiiꞌñ gu Abraam, gu cham kɨɨꞌ iiꞌmdaꞌ puiꞌ jaꞌk duukaꞌ nax dhumaaram tu oirɨdaꞌ. Mambhɨɨx daman xijum baik oidhaꞌ ba tulhiiñchuda. ¿Cham aa guꞌr am baꞌ na dodhiaꞌ sia na paiꞌ dhuuk cham tum juandaꞌ?
17 Baꞌx xiꞌɨraak miꞌ puiꞌ pup tuꞌiiꞌ guiꞌ na miꞌr gɇꞌkam kaꞌ chiop nat puiꞌ tɨɨꞌn gu Jesuus, bɨɨx gu jaiꞌ mɨt jup jix xiꞌɨꞌra nam puiꞌp kax bhaakut buiñor. Gu jaiꞌ jaꞌppɨx jaꞌtkam nam miꞌp tuꞌiiꞌ dho gi guꞌ giilhim joidham jix bhaiꞌm ɨlh jamɨt ji, nam guꞌ cham paiꞌ dhuuk pu chuꞌm tɨ nɨiꞌñ nat gɇꞌp jum duukam bap tu duu gu Jesuus.
Gu Jesuus na ba tu aꞌgaꞌ bhaan ji uaꞌrgidhai gu kaiꞌñ gu mostaasa
(Mt. 13:31‑32; Mr. 4:30‑32)
18 Baꞌp ja tɨtda ɨp gu Jesuus gu jaꞌtkam:
―¿Tuꞌñ gɨt bhaan ji uaꞌrgidhai jam aaꞌñdhaꞌ na jax jaꞌk ji busaak gu jaroiꞌ noꞌt jix joiꞌmdak bhaan ba tɨ tɨɨ gu Dios?
19 Jaꞌpni dho ji busaak na jax gu mostaasa noꞌt jaroiꞌ ɨi, noꞌt giilhim gɇꞌ xiboorak gɨꞌɨɨr sia ku guꞌr ɨlhiꞌch gu kaiꞌñ, uꞌjiꞌm bhaiꞌ xi chu kakoskaꞌ maamragaram.
Gu Jesuus na ba tu aꞌgaꞌ bhaan ji uaꞌrgidhai guiꞌ na kɨꞌn jappukar gu paan
(Mt. 13:33)
20 Gio baꞌ jaꞌpnip ja tɨtda:
―¿Tuꞌñ gɨt bhaan ji uaꞌrgidhai jam aaꞌñdhaꞌ ɨp na jax jaꞌk jup ji busaak gu jaroiꞌ noꞌt jix joiꞌmdak bhaan ba tɨ tɨɨ gu Dios?
21 Jaꞌpni dho ji busaak ɨp na jax guiꞌ na kɨꞌn jappukar gu tuiꞌ noꞌt jaroiꞌ ba jip duu gu paan, joidham gɇꞌ bhaiꞌ ji jabkaꞌ sia kut tɨi palhɨɨp pɨx mi buiꞌñ.
Gu Jesuus na ba ja aagiꞌñdhaꞌ gu jaꞌtkam na gook jix jaiꞌch gu bapoi
(Mt. 7:13‑14, 21‑23)
22 Baꞌ puiꞌ xi chu ja aꞌgidhidhat gu Jesuus gu jaꞌtkam mi jaꞌp na paiꞌ jax jɨꞌdɨlh jir kikcham gio na paiꞌ jax muiꞌ paꞌ daaꞌñxim jup jir kikcham, jimchuꞌ Jerusaleen jaꞌk.
23 Baꞌ maadɨt gu maaꞌnkam ba tɨkka, jup tɨtda:
―Jiñ jaduuñ, ¿jir gook alh kaꞌ am aa guiꞌ nam buiñor jaꞌk bhɨɨyaꞌ gu Dios, kaꞌ muiꞌ aa?
Baꞌ gu Jesuus jup tɨtda:
24 ―Dho daipuꞌ guiꞌ nam jɨꞌk ja jur daasai bhaiꞌ bhaan bubuakiaꞌ gu kiꞌñgob na paiꞌr ɨlhiꞌch. Aañ jix maat guꞌ nam muiꞌ bhaiꞌ tɨix bubuakik kaꞌ bhaan dhi ɨlhiꞌch kiꞌñgob, guꞌ ji nam guꞌx xijaim ɨlhdhaꞌ. Baꞌ aapiꞌm puꞌñi, jam jur japim xi dhaasai xi gaagaꞌ na pim jax jaꞌk dui bhaiꞌ bhaan bubuakiaꞌ dhiꞌ dhi kiꞌñgob.
25 Gio guꞌ cham tuꞌ gammɨjɨ bhaiꞌ pu kupioꞌkix kaꞌ dhiꞌ dhi kiꞌñgob. Aayaꞌ ji matgɨm gu tanoolh na paiꞌ dhuuk kuupaꞌ gu kiokam. Cham jɨꞌxkat ka jam kupioꞌkdhaꞌ noꞌ pimɨt dɨɨrap dɨr ba bii, sia pim chi tɨi gatuuk muiꞌp ba tu soon. Guiꞌp jam tɨɨdaꞌ mɨjɨ dɨr: “Jax dhui nañ aañ cham jam maat na pim jir jaroiꞌ dhaꞌ.”
26 Baꞌ noꞌ pim guꞌ jax kaiꞌch: “Dho aach jir diꞌ nach jum bɨɨm tu koiꞌmɨk gio nach jum bɨɨm tu iꞌmɨk, mi jaꞌp jap oirɨt pu tuch aꞌgiꞌñdhaꞌ nach paiꞌ jax oiꞌñkaꞌ.”
27 Baꞌp jam tɨɨdaꞌ ɨp gio: “Jax dhui nañ guꞌ ba jam aagiꞌñ nañ cham jam maat na pim jir jaroiꞌ dhaꞌ. Chaꞌpim bha jaꞌk miaꞌn aꞌjɨdaꞌ, na pim guꞌ cham jir kɨkɨɨꞌ jaꞌtkam.”
28 Baꞌ giilhim jix buam jum ɨlhdhai bhaiꞌ ji susuañiaꞌ pim aapiꞌm. Ba tɨgiaꞌ pim ɨp guꞌ gu Abraam, gio gu Isaak, gio gu Jakob, gio jaiꞌ muiꞌ guiꞌ nam bhaankam tu aꞌgimɨk gu Dios bɨjɨk nam buiñor jup tuiꞌkaꞌ, aapiꞌm guꞌ pu dɨɨrap dɨr ba biꞌyaꞌ na pim puiꞌ xim aaꞌndaꞌ.
29 Bɨɨx kap dɨr na jɨꞌx oiꞌñgaꞌn guꞌ gu jaꞌtkam nam buiñor jum jumpadaꞌ gu Dios. Dai ɨp guiꞌ nam jɨꞌk miꞌ puiꞌ jimiaꞌ na jax jix aaꞌ nam buiñor aayaꞌ, maap jam baꞌ tu jugiaꞌ bɨɨx, gɇꞌr koiꞌcham kaꞌ joidham. Gio guꞌ cham tuꞌr Israel kam kaꞌ am dhiꞌ dhi jaꞌtkam.
30 Baꞌ dhiꞌ pɨk bɨɨpɨꞌ xi dharkaꞌ am jaiꞌ dhɨt nam xib cham tuꞌ kam jum ɨlhiiꞌñ, baꞌ jaiꞌ dhɨt nam xib tuꞌ kam jum ɨlhiiꞌñ, gatuuk dɨr jaꞌk daraibuꞌ am.
Gu Jesuus nax buam jum aaꞌndaꞌ ja aꞌmkam gu Jerusaleen oiꞌñkam
(Mt. 23:37‑39)
31 Baꞌ jɨꞌkchi gu pariseos jum tɨɨtgɨdam miꞌp ba ji bubua mɨt na paiꞌ oirɨ gu Jesuus. Baꞌp tɨtda am:
―Chaꞌp mu jaꞌk jimdaꞌ Jerusaleen, na guꞌ bhaiꞌm oꞌbhagiꞌñ gu Eroodis na sap jum muꞌaaꞌ.
32 Baꞌ gu Jesuus jup ja tɨtda:
―Jaꞌp jum ɨlhiiꞌñ dho gu Eroodis na gu kaxio. Jaꞌp japim tɨɨdaꞌ nañ dai xib gio kabuimuk pɨx ya jaꞌp ba ja duduaꞌñdhaꞌ gu jaꞌtkam nam jix kakoꞌk, gio jaiꞌ nañ ja aꞌm dɨr maiꞌ ka xi ja jootsaꞌ gu cham kɨkɨɨꞌ iꞌiiꞌmdaꞌ na ja aꞌm jup tuiꞌdhiꞌ. Maaxdhiñ baꞌ ba tɨɨmoꞌ,
33 kuñ ji guꞌ mu jaꞌk jimdaꞌ ji puiꞌ xi chu duduaꞌñdhidhat. Xib jañ jɨꞌx bhɨɨyaꞌ, gio kabuimuk, gio maaxdhi. Bhammɨ jaꞌp jañ ba ji buusniaꞌ, na guꞌ gu jaroiꞌ noꞌ puꞌñi bhaankam tu aꞌga gu Dios, jum aaꞌndaꞌ nam bhaiꞌ muꞌaaꞌ Jerusaleen, cham tuꞌ maakam jaꞌk.
34 ’Aapiꞌm jaꞌtkam Jerusaleen oiꞌñkam, jaꞌp pɨx na pim ja kooꞌn guiꞌ nam bhaankam tu aꞌgadaꞌ gu Dios. Tɨi jam aaꞌñdhidhaꞌm pɨx na pim jax jaꞌk duñiaꞌ na baꞌx bhaiꞌ ba tu jam jimdaꞌ. Aapiꞌm ja maꞌyasat ja kooꞌndaꞌ joodai kɨꞌn, guꞌ gu Dios pɨx na bhaiꞌ tɨi ja jootosdaꞌ nam baꞌ yaꞌ tu jam aꞌgidhaꞌ. Jaꞌp na aañ na ñich muiꞌkim tɨi ji jam aaꞌñ na pim miꞌ puiꞌ jimiaꞌ na jax jix aaꞌ gu Dios na baꞌ xi jam joiꞌmdat jam aꞌm ba tɨ nɨidhidhaꞌ gɨt, guꞌ ji na pim guꞌ cham aaꞌ. Dhiꞌ jaꞌp ji buus na jax gu takaaruiꞌ noꞌ tɨi pup bɨɨx xix ja boiꞌspam kat gu maamraꞌn noꞌ bax ja naa gu tuꞌ, guꞌ ji nam guꞌ cham mu jaꞌk aꞌjɨdaꞌ dɨɨlh.
35 Baꞌ xib yaꞌ dɨr jaꞌp jaꞌk, cham paiꞌ pim kañ kaayaꞌ nañ pu chuꞌm tu jam aꞌgiꞌñdhaꞌ, ni ku pim cham paiꞌ kañ chɨgiaꞌ maaxik. Janoꞌ pim maaxik kañ chɨgiaꞌ na pim paiꞌ dhuuk jup tɨꞌyaꞌ: “¡Jir gɇꞌkam gio nax uañ kɨꞌn kɨɨk dhiꞌ na bhaankam bhaiꞌ ba jim gu Dios!”