4
वांचेर शोक्शो कथा
मत्ती १३:१-९; लूका ८:४-८
1 मिनु समुन्द्र आ नेक्था लशा, मेकेर बाक्शा, लेंशा शेंचा गोवा बाक्त। मेकेर शुश मुर खुम्सीशो बाक्मा बाक्त। आं चहिं डोंगा काम ङोइश्शा बाक्शो बाक्माक्त। आ लोव़ नेंबपुकी समुन्द्र आ नेक्था बाक्मा बाक्त।
2 मिनु कथा सेल्शा, शुश लोव़ शेंदा बाक्त।
3 मिनु शेंना शेंन “नेनीने, मुर का वांचेर शोक्थ लमाक्त।
4 मिनु ब्वारानु, गेडा का निक्शी लांमी जुक्तमे बाक्त। मिनु चिक्बीमी गुप्शा जामे बाक्त।
5 गेडा का निक्शी ग्याङग्रो खपीमी जुक्तमे बाक्त। मिनु शुश खप मबाक्तीके थे थु बुक्शा, जिव जाव वामा बाक्त।
6 तन्न नां पवानु, सोल सुल बेक्मा बाक्त, मारदे हना शाक्श थोक्चा मतथु सोव़मा बाक्त।
7 का निक्शी चू आ दातेमी जुक्तमे बाक्त। मिनु चूमी सुम्शा, बारचा मगेवा बाक्त। मिनु मसिम्माक्त।
8 का निक्शी चहिं रिम्शो खपीम जुक्तमे बाक्त। मिनु वाशा बारशा, शुश ग्रेल्शा, गेडा का के ३०, ६०, सहे का सम्म सिम्मा बाक्त” दे शेंदीमी बाक्त।
9 मिनु “सु के नेंब नोफा बाक्मे, मेकोमी नेंनल” देंमाक्त।
वांचेर शोक्शो कथा आ अर्थ
मत्ती १३:१०-१७; लूका ८:९-१०
10 मिनु आ लोव़ नेंबपुकी गाक्मा नोले, येसु नु गाक्ब नु आ १२ जना शेंसीबपुकीमी कथा सेल्शा शेंशो लोव़ आ पर्बम हिल्लो पामे बाक्त।
11 मिनु येसुमी “परमप्रभु यावे आ राज्य दोदेंशो बाक्ब दे इन कली रुप्तीक थुं गेशो बाक्त। लाङगाम बाक्ब आन कली चहिं कथा सेल्शा शेंनुङमी।
12 मारदे हना आन मिक्चीमी कोव़नीम, तन्न मताइनीम। आन नोफामी नेंनीम तन्न मरुप्नीम। कोव़शा रुप्तेक्म हना, आन थुं लेश्शा, आन पाप क्याम्चा ताम वा” देंमाक्त। यसैया ६:९-१०
वांचेर शोक्ब आ पर्बम शेंशो
मत्ती १३:१८-२३; लूका ८:११-१५
13 मिनु येसुमी “मेको कथा आ अर्थ मरुप्नी? मेको लायो मरुप्नी हना, अरु कथा ङा शेंतीक दोपा रुप्ने चाप्नीनी?
14 वांचेर शोक्बमी परमप्रभु यावे आ लोव़ शोक्ब।
15 लांमी शोक्शो दोदेंशो बाक्नीम देंशा हना, लोव़ नेन्मेनु, सैतानमी आन थुंमी रुप्शो लोव़ योल्ब।
16 ग्याङग्रो खपीम शोक्शो खोदेंशोपुकीमी लोव़ नेंशा, बिश्शा ग्येरसीनीम।
17 तन्न शाक्श थोक्चा मतथु, शुश मलीनीम। लोव़ आ पर्बम श्येत गेचा पुंइसाक्म हना, थु प्रोंइशा गाक्नीम।
18 चू आ दातेमी जुक्शो खोदेंशोपुकीमी लोव़ नेंनीम।
19 तन्न दोपा ठेयब दुम्नुङा? दोपा क्येट चेमु? दोपा मारेइ मारेइ ताइनुङा? दे मिम्शा, आ थुंमी तेक्ब। मिनु आ नेंशो लोव़मी फल मसिप्ब।
20 रिम्शो खपीम शोक्शो खोदेंशोपुकीमी चहिं परमप्रभु यावे आ लोव़ नेंशा, आन थुंमी वोइक्नीम। मिनु गेडा का के ३०, ६० सहे का गेडा सम्म सिश्शा ग्रेल्नीम” दे शेंदीमी बाक्त।
परमप्रभु आ राज्य आ पर्बम शेंशो
लूका ८:१६-१८
21 मिनु येसुमी “मार, बत्ती पाथीमी गुप्शा वोइक्चा कली, खाट आगामी वोइक्चा कली दानीमी ङा? मफारथु वोइक्नीमी, ममाइ ङा? मत्ती ५:१५
22 ख्रुइश्शो मख्रुइक्सीब, सुम्शा वोइश्शो यो हाक्सीब। मत्ती १०:२६-२७; लूका १२:२
23 सुइ के नेंब नोफा बाक्त हना, नेंनल” देंमाक्त।
24 मिनु येसुमी “गे मार नेंनी, मेको नोफा दाइश्शा नेनीने। दोपा नाक्शा गेनीनी, मोपा नाक्चा पुंइसीनीनी। मत्ती ७:२
25 मारदे हना थीब तेम्शा गेचा पुंइसीब, मथीबमी चहिं आइक्के बाक्शो यो रोइक्चा पुंइसीब” दे शेंदीमी बाक्त। मत्ती १३:१२-१३
26 मिनु “परमप्रभु यावे आ राज्य ओदेंशो बाक्ब, मुर कामी आ रूमी वांचेर शोक्ब।
27 मिनु नाक्दो इप्ब, सुनी बोक्ब। शोक्शो वांचेर दोपा वाबा, दे मारेइ मतुइक्ब। याकूब ५:७
28 रू आंमा मेको वापाइक्ब। वाशा, बाला ग्रूशा, आख सिप्ब।
29 तन्न मीमेनु, रिक्ब। मारदे हना रिक्ची जाक्शो बाक्ब” देंमाक्त।
तोरी वांचेर
मत्ती १३:३१-३२; लूका १३:१८-१९
30 मिनु “परमप्रभु यावे आ राज्य मार नु गारबा? दोदेंशो कथा सेल्शा रुप्पाइक्नन्नी?
31 वांचेर नेल्ल आन क्येङा आइक्च तोरी गेडा बाक्ब।
32 तोरी गेडा वाशा, शुश राशी पाइश्शा गिग घांस आन क्येङा ठेयब रवा दुम्ब। मेको रवामी चिक्बीमी ग्योव़ सेल्शा, फाम्सीशा बाक्ने चाप्नीम। परमप्रभु यावे आ राज्य मेको खोदेंशोन बाक्ब” दे शेंदीमी बाक्त।
33 मुरपुकीमी रुप्ने चाप्मेक्ल, दे शुश कथा सेल्शा, परमप्रभु यावे आ लोव़ शेंना शेंन बाक्माक्त।
34 कथा मसेल्थु, लोव़ मपाइबाक्माक्त। आ शेंसीब आन कली मेको कथा आन अर्थ यो नेल्ल रुप्पाइक्बाक्माक्त।
फश गिवार तेक्शो
मत्ती ८:२३-२७; लूका ८:२२-२५
35 मोपा शेंने थुम्शा ङा मिन, नां रिक्मेनु, येसुमी आ शेंसीब आन कली “समुन्द्र शोक्शा, आइक्ची हांबु जाक्दीय्य” देंमाक्त।
36 मिनु देल्शो मुरपुकी नु ब्राशा, डोंगा का ङोइश्शा, लमा बाक्त। अरु डोंगा का निक्शी यो लमा बाक्त।
37 मिनु लमानु, ठेयब फश गिवार पचा गोवा बाक्त। फश गिवार पवानु, ब्वाक्कु डोंगामी ओव़शा, ग्रुम्चवा बाक्त।
38 येसु चहिं पिया थांइसीशा इप्शा निन्द्रा पवा बाक्त। शेंसीबपुकीमी “ए शेंब, गो नेल्ल ब्वाक्कुमी ग्रुम्शा बेक्चांइतय दे ममिम्तीनी?” देंशा सेंदमे बाक्त।
39 मिनु येसु बोक्शा, फश गिवार कली हुइश्शा, समुन्द्र कली “ब्वालेइ पावो, मदुक्को” देंमेनु, फश गिवार ख्रा दिक्माक्त। मिनु सिक्सी दुम्माक्त।
40 मिनु शेंसीब आन कली “मारदे हिंनी? आं कली थमा मसुइक्नीनी?” देंमाक्त।
41 मेकोपुकी चहिं छक लाक्शा, शुश हिंशा “फश नु ब्वाक्कुमी यो आ लोव़ टीबाक्ताक्से। एको सु बाक्म माइ?” दे लोव़ पमुमा बाक्त।