34
कनान रागी ङा सांद
1 मिनु परमप्रभु यावेमी मोसा कली
2 “इस्राएली आन कली ‘गे कनान रागी ओव़नीनु, इन कली योक्शा गेशो रागी आ सांद तेको बाक्नीम देंशा हना, इजीकीएल ४७:१३-२०; ब्यवस्था ३२:८
3 इन दक्खिन ङा रागी जीन ङा गोरशो रागी रे एदोम सम्म बाक्ब। इन दक्खिन ङा सांद हिक्सी समुन्द्र आ पूर्ब रे गोचा माल्ब। यहोसु १५:२-४
4 मिनु अक्रब्बीम ङा ग्येत्थ लतीक लां ङा दक्खिन गे जीन गे लाइब। कादेश-बारनेआ आ दक्खिन सम्म जाक्दीत्चा माल्ब। मिनु नोले हासार-अददार रे पा अज्मोन जाक्दीत्चा माल्ब।
5 मिनु नोले मेको सांद अज्मोन रे पा हिरशा, इजीप्त ङा खोला सम्म जाक्दीश्शा ठेयब समुन्द्र नुप्ब।
6 मिनु पच्छिम ङा सांद ठेयब समुन्द्र बाक्ब। मेको ठेयब समुन्द्र आ शुंइच इन पच्छिम गे ङा सांद बाक्ब।
7 मिनु इन उत्तर गे ङा सांद ठेयब समुन्द्र रे होर डांडा सम्म फ्रेंचा माल्नीनी।
8 मिनु होर डांडा रे लेबो-हमाथ सम्म फ्रेंदीन। मिनु मेको सेदाद सम्म जाक्दीत्चा माल्ब।
9 मिनु नोले सिप्रोन सम्म जाक्दीत्चा माल्ब। मिनु हासार-एनानमी नुप्ब। मेको इन उत्तर गे ङा सांद बाक्ब।
10 मिनु इन पूर्ब ङा सांद हासार-एनान रे शेफाम सम्म फ्रेंदीन।
11 मिनु शेफाम रे उइ ब्रुप्शा ऐन ङा पूर्ब गे ङा रिब्ला सम्म जाक्दीत्चा माल्ब। मिनु नोले मेको सांद ब्रुप्शा, किन्नेरेथ समुन्द्र आ पूर्ब ङा शुंइच सम्म जाक्दीत्चा माल्ब।
12 मिनु मेको सांद यर्दन खोला रे पा हिक्सी समुन्द्र सम्म जाक्दीश्शा नुप्ब। इन रागी आ एर ओंथ ङा सांद एको बाक्नीम’ दे माइक्मी” देंत।
13 मिनु मोसामी इस्राएली आन कली “परमप्रभु यावे आ अरेशो खोदेंशो पा फेन्टे आप्शा ९ थर नु आधा थर आन कली गेशो रागी बाक्ब।
14 मारदे हना रूबेन आ थर ङा खिं खिं ङा मुर, गाद आ थर ङा खिं खिं ङा मुर नु मनस्से आ उइक्थ थर ङा खिं खिं ङा मुर आन भाग तने थुम्शो बाक्तेक्म। गन्ती ३२:२९-३३
15 मेको निक्शी नु उइक्थ थर ङा मुरपुकीमी यरीको ओंथ हांबु, यर्दन खोला आ पूर्ब गे आन आन रागी तशो बाक्नीम” देंत।
16 मिनु परमप्रभु यावेमी मोसा कली
17 “इन कली रागी योक्शा गेब मुर आन नें मार बाक्नीस देंशा हना, ङोंइती मेको चढ़ेब एलाजर नु नून आ तौ यहोसु बाक्नीस। यहोसु १४:१; ब्यवस्था १:३८
18 मिनु गे थर थर ङा मुर आन ठेयब मुर का का योव़चा माल्नेवे।
19 मेको थर थर ङा ठेयब मुर सु सु बाक्नीम देंशा हना, यहूदा आ थर ङा यपुन्ने आ तौ कालेब, गन्ती १३:६,३०
20 सिमियोन आ थर ङा अम्मीहुद आ तौ शेमुएल,
21 बेन्यामीन आ थर ङा किस्लोन आ तौ एलीदाद,
22 दान आ थर ङा योग्ली आ तौ बुक्की,
23 योसेफ आ तौ मनस्से आ थर ङा एफोद आ तौ हन्नीएल,
24 योसेफ आ तौ एफ्राइम आ थर ङा शिफ्तान आ तौ केमुएल,
25 जबूलून आ थर ङा पारनाक आ तौ एली-जाफान,
26 इस्साकार आ थर ङा अज्जान आ तौ पाल्तीएल,
27 आशेर आ थर ङा शेलोमी आ तौ अहीहुद,
28 नाप्ताली आ थर ङा अम्मीहुद आ तौ पेदाहेल बाक्नीम।
29 मिनु मेको परमप्रभु यावेमी अरेशो इस्राएली आन कली कनान रागी योक्ब थर थर ङा योव़शो ठेयब मुर एको बाक्नीम” देंत।