35
लेवी थर ङा मुर आन सहर
1 परमप्रभु यावेमी यरीको आ आइक्ची हांबु यर्दन खोला आ शुंइच मोआब ङा दिंमम मोसा कली यहोसु २१:१-३
2 “गे इस्राएल आन कली ‘गे इन आंम सेल्शो रागी रे लेवी आ थर ङा मुर आन कली सहरपुकी गेचा माल्नीनी। मिनु मेको आन कली मेको सहर आन एर ओंथ बी ब्यफ, क्यारश भेडा योव़तीके गेचा माल्नीनी। गन्ती १८:२०; लेवी २५:३२-३४
3 मेको सहरपुकी मेको आन कली बाक्तीक दुम्नीम। बी ब्यफ, क्यारश भेडा योव़तीक मेको आन बी ब्यफ, क्यारश भेडा आन कली दुम्ब।
4 मिनु गे लेवी आ थर ङा मुर आन कली गेशो सहर मेर ङा योव़तीक मेको सहर आ गारो आ एर ओंथ रे हजार का कुबीत बाक्चा माल्ब। कुबीत का ०.५ मिटर बाक्ब।
5 गे सहर आ लाङगा पूर्ब गे हजार निक्शी कुबीत, दक्खिन गे हजार निक्शी कुबीत, पच्छिम गे हजार निक्शी कुबीत नु उत्तर गे हजार निक्शी कुबीत पुक्चा माल्नीनी। मिनु सहर मेको आ दातेम बाक्चा माल्ब। मेको आन सहर ङा योव़तीके मेकोन बाक्नीम’ देनो” देंत।
ब्रोंइशा बाक्तीक सहर
6 मिनु “गे लेवी आ थर ङा मुर आन कली गेशो सहर रे ६ ओटा सहर चहिं ब्रोंइशा बाक्तीक सहर दुम्चा माल्नीम। गे मेकेर मुर साइक्ब मुर कली प्रोक्चा गेचा माल्नीनी। मेको नु तेम्शा ४२ ओटा सहर दुम्चा माल्नीम। प्रस्थान २१:१३
7 गे लेवी थर ङा मुर आन कली नेल्लेमी ४८ ओटा सहर नु मेको आन एर ओंथ ङा योव़तीक रू गेचा माल्नीनी।
8 मिनु ठेयब रागी तशो इस्राएली आन थर रे शुश सहर गेचा नु आइक्च रागी तशो इस्राएली आन थर रे का निक्शी सहर गेचा माल्नीनी। मेको थर थर ङा मुरुमी आ योक्शा गेशो रागी गारचा ङा पा लेवी थर ङा मुर आन कली सहरपुकी गेचा माल्नीम, देंचा माल्नेवे” दे परमप्रभु यावेमी मोसा कली देंत। गन्ती २६:५४
9 मिनु परमप्रभु यावेमी लेंशा मोसा कली
10 “गे इस्राएली आन कली ‘गेपुकी यर्दन खोला शोक्शा कनान रागी जाक्दीन्नी नोले,
11 गे ब्रोंइशा बाक्तीक सहर योव़चा माल्नीनी। मिनु मतुइक्थु, मुर साइक्तु हना, मेको मुर साइक्ब मुर मेकेर प्रोक्ने चाप्ब।
12 मेको सहरपुकी क्येक्क लेप्ब आन क्येङा ब्रोंइशा बाक्तीक सहर दुम्ब। मिनु मेको मुर साइक्ब मेको सहर ङा मुर आन दातेमी निसाफ पचा पुंइसीचा ङोंइती साइक्चा मपुंइसेक्ल।
13 मिनु इन योव़शो ब्रोंइशा बाक्तीक सहर ६ ओटा दुम्चा माल्नीम।
14 गे यर्दन खोला आ ओंथ हांबुमी सां नु कनान रागीमी सां सहर ब्रोंइशा बाक्चा कली तिल्चा माल्नीनी।
15 मेको ६ ओटा सहर इस्राएली, आन दातेम बाक्ब अर्को रागी ङा मुर नु लां गाक्ब मुर आन कली ब्रोंइशा बाक्तीक सहर दुम्ब। मोपा मतुइक्थु मुर साइक्ब मुर मेकेर प्रोक्शा लशा बाक्ने चाप्नीम।
मुर साइक्चा आ पर्बम
ब्यवस्था १९:४-१३
16 सुइमी फलाम के मारेइमी आप्शा, मुर साइक्तु हना, मेको मुर साइक्ब बाक्ब। मेको मुर साइक्ब कली साइक्चान माल्ब।
17 सुइ मुरुमी मुर आन कली फुल्लु आप्शा साइक्तु हना, मेको मुर साइक्ब बाक्ब। मेको मुर साइक्ब कली साइक्चान माल्ब।
18 सुइमी मुर कली शीम तुप्शा साइक्तु हना, मेको मुर साइक्ब बाक्ब। मेको मुर साइक्ब कली साइक्चान माल्ब।
19 मेको क्येक्क लेप्बमी मेको मुर साइक्ब कली साइक्चा माल्ब। मेको कली ग्रुमानुन, मेको कली साइक्चा माल्ब।
20 मिनु सुइमी मुर कली काइ मदाक्थु नेप्शा, मार मार आप्शा कि लांम बाप्शा साइक्तु हना,
21 गुइम तुप्शा साइक्तु हना, मेको मुर कली साइक्चा माल्ब। मेको मुर साइक्ब बाक्ब। मेको क्येक्क लेप्बमी मेको मुर साइक्ब कली ग्रुमानु, मेको कली साइक्चा माल्ब।
22 तन्न सुइमी मुर कली मगाइक्थु, मतुइक्थु, चुशा तोक्तु हना, कि मारेइ थोव़क आबानु मेको कली ख्रशा बेक्त हना,
23 मेको आ वारचमी ठेयब फुल्लु ग्याइक्तानु, आ गुइ रे दोक्शा ख्रशा बेक्त हना,
24 मेको सहर ङा मुरपुकीम मेको मुर साइक्ब नु क्येक्क लेप्ब आस दातेमी निसाफ पचा माल्नीम।
25 मिनु मेको सहर ङा मुरपुकीम मेको मुर साइक्ब कली क्येक्क लेप्ब आ गुइ रे प्रोंइचा माल्नीम। मिनु नोले सहर ङा मुरपुकीमी मेको मुर साइक्ब ब्रोंइशा बाक्तीक सहर सोइक्चा माल्नीम। मिनु मेको मुर साइक्ब तेल लुक्शो ठेयब चढ़ेब मबेक्म सम्म मेकेर बाक्चा माल्ब। लेवी २१:१०
26 तन्न मेको मुर साइक्ब मेको आ ब्रोंइशा बाक्तीक सहर रे ग्रूत हना,
27 मिनु क्येक्क लेत्चा माल्ब मुरुमी मेको कली ग्रुम्शा साइक्तु हना, मेको कली साइक्ब दोस मताइब।
28 मारदे हना मेको साइक्ब ठेयब चढ़ेब मबेक्म सम्म मेको ब्रोंइशा बाक्तीक सहरम बाक्चा माल्ब। तन्न ठेयब चढ़ेब बेक्म नोले ला मेको आ रू खिंम लेत्ने चाप्ब।
29 मिनु मेको गेना हना यो परमप्रभु यावेमी इन कली फुल्लुम मुशा ब्रेक्शो नु आ शेंशो लोव़ बाक्ब। मिनु गेपुकी ते बाक्तीनी हना यो, इन तौ चच युइ नेल्ल पाला ङा मुरुमी पचा माल्नीम।
30 सुइम सुइ आन कली साइक्तु हना, मेको मुर साइक्ब कली सांकछी आन लोव़ नेंशा ला साइक्चा माल्ब। तन्न सांकछी का आ लोव़ नेंशा ला मेको कली मसाइक्चा। ब्यवस्था १७:६; ब्यवस्था १९:५
31 गेपुकी साइक्चा पुंइसीब मुर प्रोंइचा कली मेको आ पा ङा क्येट मताक्कीन। मेको मुर साइक्ब कली साइक्चा माल्ब। भजन संग्रह ४९:८-९
32 ब्रोंइशा बाक्तीक सहरम प्रोक्शो मुर, ठेयब चढ़ेब मबेक्थु, आ खिं रू लेत्चा गेचा कली गे क्येट मताक्कीन। ठेयब चढ़ेब मबेक्म सम्म मेको आ खिं रूमी लेत्चा मताइब।
33 मिनु गेपुकीमी इन बाक्तीक रागी ग्रांग्रा दिशो मसेलीन। मारदे हना रागी हुशेम ग्रांग्रा दिशो सेल्ब। मिनु मेको ग्रांग्रा मदिशो सेल्ने मचाप्नीम। हुश ख्राक्श पोक्ब कली साइश्शा ला मेको रागी ग्रांग्रा मदिशो सेल्ने चाम्सीब।
34 गे इन बाक्शो रागी ग्रांग्रा दिशो मसेलीन। गो यो मेकेर बाक्नुङ। मारदे हना गो परमप्रभु यावे इस्राएली आन दातेमी बाक्नुङ’ दे इस्राएली आन कली देनो” देंत। लेवी १८:२४-२८; प्रस्थान २९:४५