29
तुप्शो नु हुइश्शोम वारच पाइनीस
1 शुश हुइक्चा पुंइसीशा यो, काइ मटीब दुम्तेक्म हना, मेको आन मतुइक्थु वारच पाइक्चा मपुंइसीथु, खतम दुम्नीम। हितोपदेस १५:१०
2 ठीक पाइबपुकी सासन पाइब दुम्तेक्म हना, मुर नेल्ल ग्येरसीनीम। तन्न परमप्रभु यावे आ अरेशो मटीब मुरुमी सासन पाप्तु हना, मुर श्येत जाइनीम। हितोपदेस ११:१०
3 सुमी तुइक्तीक थुं दाक्बा, मेकोमी आ आफ कली ग्येरपाइक्ब। तन्न तेल्लेम नु गाक्ब मुरुम आ शोंप नेल्ल खेरब। लूका १५:१३,३०
4 पिप आ ठीक पतीकेमी आ रागी लीब। तन्न मेकोमी शुश तिरो पोक्तु हना, आ रागी खतम सेल्ब।
5 सुमी आ नेक्था ङा मुर कली क्युक्शा लोव़ पाइबा, मेकोमी मेको कली ग्याइल दाइश्शो बाक्ब।
6 मरिम्शो पाइब मुर आ मरिम्शो पतीकेमी श्येत जाइब। ठीक पाइब मुर चहिं शुश ग्येरसीशा कुम्सो पाइनीम।
7 ठीक पाइब मुरुम प्रुङग आन कली दोपा ठीक पचा, दे तुइक्नीम। तन्न परमप्रभु यावे आ अरेशो मटीबपुकीमी मारेइ मरुप्नीम।
8 शुक्शी पाइब मुरपुकीमी सहर खल्बल सेल्नीम। तन्न जोक्ब तुइक्ब मुरपुकीमी जिचा खेचा तेक्नीम।
9 जोक्ब तुइक्ब मुर मूर्ख नु निसाफ पतीकेमी लत हना, मेको मूर्खमी जिचा पोक्शा, रिश्शा मगारब।
10 हुश ख्राक्श पोक्ब मुरुमी दोस मताइब मुर आन कली काइ मदाक्ब। मेकोमी रिम्शो थुं पाइश्शो मुर कली साइक्चा माल्ब।
11 मूर्ख मुरुमी आ गाइक्चा नेल्ल कोंइब। जोक्ब तुइक्ब मुरुम चहिं आ गाइश्शो तेक्शा, मकोंइब। हितोपदेस १२:२३; हितोपदेस २५:२८
12 सासन पाइबमी जोल लोव़ नेंतु हना, मेको आ गेय पाइब नेल्ल परमप्रभु यावे आ अरेशो मटीब दुम्नीम।
13 प्रुङग नु मेको आन कली दिप्ब आन के थोव़क का गारशो बाक्ब। मेको मार बाक्ब देंशा हना, परमप्रभु यावेमी मेको निम्फा आस कली मिक्च ताइब सेल्शो बाक्त। हितोपदेस २२:२; अय्युब ३३:३०; भजन संग्रह १३:४
14 प्रुङग आन कली ठीक पा निसाफ पाइब पिप आ सासन गेना हना यो लीब। हितोपदेस १६:१२
15 वोंइश आल आन कली तुप्शा, हुइश्शोनु, जोक्ब तुइक्ब दुम्नीम। मारेइ मशेंशो वोंइश आलम चहिं आ आम कली मुने तोक्ब। हितोपदेस २२:१५; १राजा १:६
16 परमप्रभु यावे आ अरेशो मटीब मुरपुकी शुश दुम्तेक्म हना, मरिम्शो पतीक बारशा लाइब। तन्न ठीक पाइबपुकीम मेको आन खतम दुम्शो ताइनीम। भजन संग्रह ३७:३५-३६
17 इ तौ कली रिम्शो पा शेंदो। मिनु मेकोमी इ थुं नाइक्पाइश्शा इ कली ग्येरपाइक्ब। हितोपदेस २३:१३
18 परमप्रभु यावे आ लोव़ पाइब मुर मबाक्तेक्म हना, मुर नेल्ल हेंथे पाइब दुम्नीम। तन्न मेकोपुकीम आन परमप्रभु यावे आ अरेशो टिम्तेक्म हना, ग्येरसीशो मुर दुम्नीम।
19 इ गेय पाइब कली लोव़म ला शेंने मचाप्नेवे। मारदे हना मेकोमी इ लोव़ रुप्तु हना यो मटीब।
20 ममिम्थु लोव़ पाइब क्येङा मूर्खन रिम्शो बाक्ब। उपदेसक १:२; याकूब १:१९
21 इ वाइल कली आल रे नम पाइश्शा थुल्तीवी हना, नोले मरिम्शो दुम्ब।
22 चुरब मुरुमी राम्शी पोक्ब। गाइश्शा बाक्ब मुरुमी शुश मरिम्शो पपाइक्ब। हितोपदेस १५:१८; हितोपदेस २२:२४
23 मुर आन ठेयब लेश्शोमी मेको कली आइक्च सेल्ब। ब्रेम्शो थुं पाइश्शो मुर चहिं मान ताइब।
24 खुइ नु वारच्बु दुम्ब मुरुमी आंम आ कली मदाक्ब। खुइ पचा पुंइसीब मुर आ सराप नेंबमी यो मारेइ मदेंब। लेवी ५:१
25 मुर क्येङा हिंचा ब्वारद खोदेंशो बाक्ब। तन्न परमप्रभु यावे कली थमा सुइक्चा ब्रोंइतीक बाक्ब। मत्ती १०:२८
26 शुश मुरुमी सासन पाइब नु ग्रुम्चा दाक्नीम। तन्न परमप्रभु यावे रे मुरपुकीम ठीक निसाफ ताइनीम।
27 ठीक पाइबपुकीमी मरिम्शो पाइब तशा ग्रांग्रा दीनीम। तन्न परमप्रभु यावे आ अरेशो मटीबपुकीमी ठीक पाइब आन कली तशा ग्रांग्रा दीनीम।