15
लाख का ४४ हजार मुर
1 मिनु गो स्वर्गमी अर्को ठेयब नु छक लाक्चा ङा चिन्ड ताता। मेको चिन्ड दोदेंशो बाक्त देंशा हना, ७ जना परमप्रभु यावे आ स्वर्ग ङा गेय पाइबपुकीमी ७ ओटा श्येत गेचशो बाक्तेक्म। मिनु मेको श्येतपुकी नोले ङा बाक्तेक्म। मारदे हना मेको आन नोले परमप्रभु आ गाइक्चा नुप्ब। प्रकाश १६:१
2 मिनु गो सिसा नु मी ब्वाइश्शो दोम्ली खोदेंशो दिंम का ताता। मेको दिंममी मुरपुकीम परमप्रभु यावे आ गेशो ठेयब ताप्तीके शेशा, राप्शो तातामी। मेको मुरपुकी चहिं सु बाक्तेक्म देंशा हना, मेकोपुकीमी मेको जन्तु कली ग्राशो बाक्तेक्मे। दोपा ग्रातेक्म देंशा हना, जन्तु नु जन्तु आ मूर्ति कली सेउ मपामे नु आ नें आ हिक्तीके चिन्ड यो मवोइक्पाइक्सीशो बाक्तेक्मे। प्रकाश ४:६
3 मिनु परमप्रभु यावे आ वाइल मोसा नु पाठा आ कुम्सो पाम्तेक्म। मिनु मेको कुम्सोम मार लोव़ बाक्त देंशा हना “परमप्रभु यावे, गे नेल्ल सक्ति पाइश्शो परमप्रभु बाक्नीनी। इन गेय ठेयब नु छक लाक्चा बाक्नीमी। गे इन लां नेल्ल ठीक नु थमा बाक्नीमी। गे गेना हना यो पिप बाक्नीनी। प्रस्थान १५:१,११; येरमीया १०:६-७; ब्यवस्था ३२:४; भजन संग्रह १४५:१७
4 नेल्लेमी इन कली मान पा हिंशा इन नें ठेयब सेल्नीमी। मारदे हना गे ला परमप्रभु बाक्नीनी। रागी रागी ङा मुर नेल्ले इन ङोंइती जाक्शा, पोक्च थेक्शा, खुम्की पा बाप्नीमी। मारदे हना इन निसाफ पतीके नेल्लेमी ताम्तेक्म” देंशो कुम्सो आ लोव़ बाक्त। भजन संग्रह ८६:९; येरमीया १६:१९-२१
गाइश्शो ङा ७ ओटा डप्का
5 मिनु नोले गो स्वर्गमी परमप्रभु यावे आ खिं रोक्शो ताता। प्रकाश ११:१९
6 मेकेर रे मेको ७ जना श्येत गेब परमप्रभु यावे आ स्वर्ग ङा गेय पाइबपुकी ग्रूतेक्म। मेकोपुकी रिम्शो टल्केशो बुश वा फेक्शा, सुन के पेटी किप्शो बाक्तेक्म।
7 मिनु मेको ४ ओटा सेस जन्तु ङा कामी मेको ७ जना परमप्रभु यावे आ स्वर्ग ङा गेय पाइब आन कली ७ ओटा सुन के डप्का गेप्तु। मेको सुन के डप्का गेना हना यो ब्रोंइशा बाक्ब परमप्रभु यावे आ गाइक्चामी ब्रीशो बाक्तेक्म। प्रकाश ४:६-८; प्रकाश १४:१०
8 मिनु परमप्रभु यावे आ खिं परमप्रभु आ छेङछेङ नु सक्ति ङा कुनमी ब्रीशो बाक्त। मिनु परमप्रभु यावे आ ७ जना स्वर्ग ङा गेय पाइबपुकीमी श्येत मगेमे सम्म सुइ परमप्रभु यावे आ खिं ओव़ने मचाप्बाक्तेक्म। यसैया ६:४; प्रस्थान ४०:३४; १राजा ८:१-११; इजीकीएल ४४:४