16
मेको ७ ओटा श्येत
1 मिनु नोले गो परमप्रभु यावे आ खिं रे ठेयब सेंदा का नेंता। मेको सेंदामी परमप्रभु यावे आ ७ जना स्वर्ग ङा गेय पाइब आन कली “लने। परमप्रभु आ गाइक्चामी ब्रीशो ७ ओटा डप्का रागीमी मोतीन” देंत।
2 मिनु ङोंइती ङा परमप्रभु यावे आ स्वर्ग ङा गेय पाइबमी आ कुरशो डप्का रागी तार मोइक्तु। मिनु मेकोमी मोदानु, ठेयब जन्तु आ चिन्ड वोंइसीब नु आ मूर्ति कली सेउ पाइबपुकी मरिम्शो पा खाइक्ब गार मुम्तेक्म। प्रस्थान ९:१०-११
3 मिनु अर्को परमप्रभु यावे आ स्वर्ग ङा गेय पाइबमी आ कुरशो डप्का समुन्द्र तार मोइक्तु। मिनु मेकोमी मोदानु, समुन्द्र ङा ब्वाक्कु क्योरशो मुर आन हुश खोदेंशो दुम्त। मिनु समुन्द्र ङा सेस जन्तु नु ङांइ नेल्ल बेक्तेक्म।
4 मिनु लेंशा अर्को परमप्रभु यावे आ स्वर्ग ङा गेय पाइबमी आ डप्का खोला नु ब्वाक्कु बुक्तीके तार मोइक्तु। मिनु मेकोमी मोदानु, मेको ब्वाक्कु हुश दुम्त। प्रस्थान ७:१७-२१
5 मिनु ब्वाक्कु कली कोव़ब परमप्रभु यावे आ स्वर्ग ङा गेय पाइबमी परमप्रभु यावे कली “इन मुर आन कली पशो निसाफ ठीक बाक्ब। गे मुल बाक्नीनी। मिनु गे ङोंइती यो बाक्तीनी। गे का ला परमप्रभु बाक्नीनी।
6 रागी ङा मुरपुकीमी इन योव़शो मुर नु इन लोव़ पाइब आन कली क्योरशा, आन हुश शाइक्पाइश्शा साइक्तेक्म। मिनु गे मेको रागी ङा मुर आन कली हुश तूपाइक्तीनी। मार पामे, मेको ताम्तेक्म” देंशो नेंता।
7 मिनु गोमी मेको धूप चढ़ेतीके रे सेंदा कामी लोव़ पशो नेंता। मेकोमी “परमप्रभु यावे, गे नेल्ल सक्ति पाइश्शो परमप्रभु बाक्नीनी। मारेइ मारेइ पने चाप्नीनी। इन पशो निसाफ थमा नु ठीक बाक्नीमी” देंशो नेंता। प्रकाश ९:१३; प्रकाश ६:१०-११
8 मिनु लेंशा अर्को परमप्रभु यावे आ स्वर्ग ङा गेय पाइबमी आ कुरशो डप्का नां तार मोइक्तु। मिनु मेकोमी मोदानु, नांमी मुर आन कली मीम खोदेंशो पा क्रोइक्चा गोप्तु।
9 मोपा शुश होशेमी मुरपुकी दुप्शा, श्येत जाम्तेक्म। मिनु दुप्शो आ पर्बम परमप्रभु यावे आ नें कली सराप पाम्तेक्म। मारदे हना मेकोमी श्येत गेप्तु। मिनु मेको मुर आन थुं परमप्रभु यावे गे मलेत्तेम। परमप्रभु यावे कली मान यो मपाम।
10 मिनु लेंशा अर्को परमप्रभु यावे आ स्वर्ग ङा गेय पाइबमी मेको आ कुरशो डप्का ठेयब जन्तु आ नित्तीकेमी मोइक्तु। मिनु मेकोमी मोदानु, मेको ठेयब जन्तु आ राज्यमी छिङछिङ दुम्त। मिनु मुरपुकीम शुश श्येत जाम्तेक्म।
11 मोपतीके स्वर्ग ङा परमप्रभु कली सराप पाम्तेक्म। मारदे हना मेकोमी ठेयब मरिम्शो गार दुम्पाइश्शा, श्येत गेप्तु। तन्न आन मरिम्शो पचा मप्रोनेम।
12 मिनु लेंशा अर्को परमप्रभु यावे आ स्वर्ग ङा गेय पाइबमी आ कुरशो डप्का युफ्रेटीस माइश्शो ठेयब खोलामी मोइक्तु। मिनु मेकोमी मोदानु, खोला ङा ब्वाक्कु सोव़त। मारदे सोव़त देंशा हना, नां दाप्तीके रे पीब पिप आन लां ठीक पचा कली सोव़त। यसैया ११:१५-१६
13 मिनु गो ठेयब बुस्स, ठेयब जन्तु नु जोल पा परमप्रभु यावे आ लोव़ पाइब आन शोव़ रे क्रुक्क्रु खोदेंशो वोल सां ग्रूशो तातामी। प्रकाश १२:३
14 मेकोपुकी छक लाक्चा ङा चिन्ड कोंइब सैतान आ गेय पाइब वोल बाक्तेक्म। मिनु मेकोपुकीमी परमप्रभु यावे, नेल्ल सक्ति पाइश्शो परमप्रभु आ ठेयब नाक्तीमी नु लडाइ पचा कली रागी रागी ङा पिप आन कली ब्रथ लाम्तेक्म। मो दुम्मेनु, येसुमी मुर आन कली
15 “नेनीन, गो खुइ खोदेंब पा जाक्नुङ। सु थमा सुइश्शा मइप्थु सेंशा, ठीक दुम्शा बाक्मे, मेको ग्येरसेक्ल। तन्न सु पाप पाइबा, मेको शिश्रा गाक्ब मुर खोदेंब पा मुने दोक्ब” दे येसुमी माइक्तीमी। १थिस्सलोनिकी ५:२
16 मिनु मेको वोल सांमी रागी रागी ङा पिप ब्रथ लशा, जाक्शा, हिब्रू लोव़मी आरमागेडोन माइश्शो रागीमी खुम्साक्म।
17 मिनु नोले ङा परमप्रभु यावे आ स्वर्ग ङा गेय पाइबमी आ कुरशो डप्का फशेमी मोइक्तु। मिनु मेकोमी मोदानु, परमप्रभु यावे आ खिं रे नु आ नित्तीक रे ठेयब सेंदा कामी “मुल नुप्त” देंशो नेंता।
18 मिनु चिला, ठेयब रेयके, बुंबु पशा, ठेयब ख्रिनु कुत। मुरपुकी रागीमी बाक्मानु, मोमो ठेयब ख्रिनु गेनायो मकुशो बाक्माक्त।
19 मिनु मेको ठेयब सहर सां दुम्त। रागी रागी ङा सहरपुकी ब्रेत्तेक्म। मिनु परमप्रभु यावेमी बेबीलोन ठेयब सहर कली फ्रुक्तु। मारदे फ्रुक्तु देंशा हना, मेको मुर आन पाप तशा “गो सजाइ गेनुङमी” दे गाइश्शा फ्रुक्तु। प्रकाश १४:८-१०
20 मेना टापु नेल्ल ब्वाक्कुमी सुम्साक्म, डांडापुकी ब्रेश्शा, दिंम दुम्तेक्म। प्रकाश ६:१४
21 मिनु मुर आन बाक्तीकेमी शुश मुप्स यित। मेको मुप्स टलेन्ट का सम्म हेल्शो बाक्तेक्म। मिनु मेको मुप्स मुर तार दोक्मेनु, मुरपुकी मेको मुप्स तशा, परमप्रभु यावे कली सराप पाम्तेक्म। मारदे हना मेको मुप्सीम रागीमी बाक्ब मुर आन कली शुश हिंचा ङा श्येत गेप्तु। टलेन्ट ३५ किलो कोदेंशो बाक्ब।प्रस्थान ९:२३