28
Natetenged Tung Pagkabui Si Kang Uman Ni Jesus Tung Yaklung Kaldaw (28:1-10)
Marcos 16:1-8; Lucas 24:1-12; Juan 20:1-10
1 Taa numanyan pagkataklib da yang kaldaw ang atiang nag̱ipamaenay ang baklu pa ilem agpandiklat yang sag̱iid tung primirung kaldaw tung seled yang sang linggu, bilang kaldaw ta Linggu, ti Mariang naang tag̱a Magdala may ti Maria kang naang sam bilug, ya si kay namagbalik duun tung pinanlug̱uran tung ni Jesus ang para mamanginsapu si.
2 Numanyan may maktel ang yegyeg ay natetenged tung sasang angil ang tinuw̱ul yang Dios ang magparanek duun ang pagkatapus dayun na rang pinalig̱id yang batung atiang itinakep tung pinanlug̱uran ang ya ra ka man dayun ay pinamdungan na.
3 Durug kasusulaw ang telengan ang maning pa tung kidlat, pati yang aw̱el na maninga sipsak agkakulit.
4 Numanyan yang mga sundalung atiang pamagbantay, pagkaita nira tung anya, durung pagpangerel nira natetenged tung eled nirang subra. Pagkatapus dayun da ilem ang namansitumba tung tanek ang maninga patay ra.
5 Numanyan dayun dang nagbugnu yang angil tung mga baw̱ay ang atiang durua ang baklung nansikaw̱ut ang mag̱aning, “Ta yamu, indiamu ra mag̱eled. Nag̱askeanu ang yang nag̱adilem mi taa ti Jesus ang ilinansang tung krus.
6 Anda ra taa ay pinabungkaras da yang Dios ang katulad ka tung inaning na. Palengetamu ra kanay tani. Telengan mi w̱a yang pinagpalw̱ug̱an tung anya.
7 Pagkatapus pakaliamu rang mangay duun tung mga taung nag̱apangugyatan nang panganingen ang ti Jesus binui si kang uman yang Dios ang pagkatapus numanyan nagtukaw ra tung nira duun tung Galilea. Purisu duun da ka tanira mamanikad tung anyang para mag̱irita si ka tanira. Buinu, tandaan mi ta maayen yang itinuyunung atia tung numyu,” mag̱aning.
8 Purisu numanyan namag̱apura ra ka man tanirang namagliit duun tung pinanlug̱uran tung ni Jesus. Maskin pangetab-ketaw̱an da ka man ta mupia natetenged tung naita nirang atia, piru durung pisan agkasadya yang mga isip nirang pamagralaksuan ang para magbaw̱alitaen da tung yamen ang pinangugyatan ni Jesus.
9 Numanyan tung pagralaksuen nira, unaw̱is ti Jesus mismu ya ray nagpakigbag̱as tung nira. Mag̱aning tung nirang nagbugnu, “Mupiang kaldaw tung numyu!” Pagkatapus dayun da nirang pinalengtan ang pinggesan tung mga kakay na ang nunut da ka ta pagluud nira.
10 Mag̱aning ti Jesus ang nagpadayun yang bitala na tung nira, “Indiamu ilem mag̱eled, aa? Angayen mi ra kanay yang mga putulung panganingen ang tanira kaministiran dang mamansiangay ra duun tung Galilea ug̱ud duunami ra mag̱irita,” mag̱aning.
Yang Paetad Yang Mga Pari May Yang Mga Pamagpakigmaepet Tung Mga Diguardia Natetenged Tung Nainabu Tung Tinanguni Ni Jesus (28:11-15)
11 Taa simanyan mintras pamansiangay ra yang mga baw̱ay ang atia duun tung mga tauan ni Jesus, yang dumang mga sundalung naang pinapagbantay tung pinanlug̱uran tung ni Jesus, ya ray nansibalik tung siudad ang namag̱ugtulun da tung mga paring atiang arabubwat ta katengdanan natetenged tung tanan ang nagkarainabu.
12-13 Numanyan dayun dang namagsaragpun tanira yang mga pamagpakigmaepet ang namagparaig̱u. Pagkatapus ta pagparaig̱u nira, dayun dang namagpakdul ta bastanting kuarta tung mga sundalung atia ang nunut da ka ta paetad tung nira ang mag̱aning, “Kung tinu pay manginsapu tung numyu, yamu ra ilem ag̱aaning ang yang tinanguni na tinakaw ra ta law̱ii yang mga taung pinangugyatan na ang ya ray nangasubli tung elek mi.
14 Kung alimbawa mabalitaan da ni Gubirnadur, yami ray balang mangerengan para tung numyu ang ta yamu anday kasalanan mi ug̱ud anda ray mabegbeg̱an ta mga kulu mi para tung anya,” mag̱aning.
15 Kapurisu pagrisibi nira yang kuarta, inusuy ra ka man nira yang kumpurming ipinaetad tung nirang namagbaw̱alitaen. Purisu ang asta ra ilem simanyan maning ka man tia yang nag̱ibalita-w̱alita yang mga masigka Judio ta.
Yang Panuw̱ul Ni Jesus Tung Mga Tauan Nang Mamagparakaw̱utun Yang Matinlung Balita Natetenged Tung Anya (28:16-20)
Marcos 16:14-18; Lucas 24:36-49; Juan 20:19-23; Mga Binuat-buatan 1:6-8
16 Numanyan yaming pinangugyatan ni Jesus ang sam puluk may sasa, nag̱angayami ra ka man tung Galilea, duun tung sasang bukid ang ya ra kang lag̱i ay ipinaske ni Jesus tung yamen tan taa pa ang para duunami ra magbarag̱as.
17 Pagkaita yamen tung anya, maskin indi pa nag̱asigurung pisan yamen ang ya ra ka man ti Jesus, dayunami ra ka enged ang nagluud ang nagtuu tung anya.
18 Pagkatapus dayunami rang pinalengtan nang inaning, “Yang tanan ang bag̱ay mag̱ing tung kalangitan, mag̱ing tung katanekan man, luw̱us dang ipinabtang yang Dios tung pudiru.
19 Purisu magliliw̱utunamung magparakaw̱utun natetenged tung yeen tung tanan ang nasyun tung bilug ang kaliw̱utan ug̱ud mapakdulan da ta lugar nirang magsuku ra tung yeen ang para mag̱ing mga tauanu ka. Kumpurming tinu pay magsuku tung yeen, ya ray benyag̱an mi ug̱ud asan da nga pananglitay na ang tanya nagpagaem dang matuud tung ni Ama may tung yeen ang pag̱aningen nang Ana na may tung Espiritu Santo ang yami ra ka man ay may anya tung anya.
20 Dispuis panuldukan mi ka dayun ta mupia ang mamagtuman yang kumpurming itinuw̱ulu tung numyu. Yang tanan ang atia ya ray prusigiran mi ay yuu mismu ay magpakigsasa tung numyung pirmi ang asta kaw̱utun da ilem yang uras ang ipagtapus yang Dios tung panimpung naa,” mag̱aning duun ti Jesus.