6
Solomon'in Hou-In asah
1 Israel chaten Egypt gam ahin dalhah kal kum 480 lhin kum, Israel te chung’a Solomon leng vaipoh jou kumli lhin kum, lhani lhinna Ziv lhasung in Solomon chun Hou-In sahna ding natoh apan tan ahi.
2 Solomon Lengpan Pakai Hou-In dinga asah chu adung feet 90, avai feet 30 ahin chule asan dan chu feet 45 ahiye.
3 Hongcha kihoi chu feet 30 in asaovin a invai chutoh akibange, chuleh a inmai lam chu feet 15 in asao in ahi.
4 Solomon in Hou-In bangkot tampi akihoijin, insunglam sangin apolam aneojep in ahi.
5 Inbang kimvel leh inbang lhung keija kigol phei dingin doson asemin, alailung leh muntheng dan sungnung kimvel geijin jong doson asempeh in chuleh jet le veija jong indan khat cheh akidoi.
6 Dan noinungpen chu feet 7-1/2, dan lailha chu feet 9 alhing in, danthum lhinna chu feet 10-1/2 ahin indou injol chengse chu insunga akithollut pai louna dingin in polam achun kalbi lei akido touvin ahi.
7 Hou-In sahna dia kimang songho akilaidohna mun'a kisuitoh tohsa ahin, hijeh chun Hou-In kisahlai sungsen jong sehcha kivopoh ham heicha kitupoh ham ahilouleh thih manchah kimanga kivopoh husan imacha akijadoh poi.
8 Indan noinungpen lutna ding’a kihoi kot chu bang lhanglam'ah akihoijin, miho chu akimlaija konna kalbi leija kaltouva chujou tengleh adan lailha a konna chu dan thum lhinna a chu kaltou ahiye.
9 Hiti hin Solomon in Hou-In chu ana san asa joutai, chuleh bichingdal dingin thinglhon ho leh Cedar thing khunpeh ho chu amangin ahi.
10 Akiseima bang chun, aman indan thum chu kijopmat cheh, dan khat chu feet 7-1/2 cheh asangin, Hou-In polam bang to kinga toa kisem ahin, cedar thinglhon a kijopmat cheh ahi.
11 Pakaijin Solomon henga thu ahin seijin,
12 “Hiche Hou-In nasah chung’a hi, nangin ka danthu ho leh ka thupeh ho chengse nanit sohkeija ahileh keiman napa David kom'a kana kitepna chu nang chunga hi ka tohdoh ding ahi.
13 Keima Israel te lah a kachen ding Israel mipite hi ka nungsun louhel ding ahi,” ati.
Hou-In Asunglam
14 Hiti hin Solomon chun Hou-In chu asa chai tan ahi.
15 Hou-In sunga abang jouse, atol’a pat abiching geiyin cedar thingpeh in atomjol sohkeijin, alhong jong chahthingpeh apha in atomjol sohkeiyin ahi,
16 Aman insung dan, Muntheng Chungnungpen kiti lai chu Hou-In tomlam a kisem ahin, atol’a pat abiching geiya feet 30 sao, cedar thingpeh a kigen tan ahi.
17 Muntheng Chungnung masanga um, Hou-In inpi chufeet 60 in asaovin ahi.
18 Insunga asong bang ho jouse chu Cedar thingpeh in phate chan akitomjol sohkeijin, chule umga leng tobang leh pahcha pahlha ding kon banga kijempol ahi.
19 Aman indan sungnung langa chun Pakai Kitepna Thingkhong koina dingin indan theng khat asembe in ahi.
20 Hiche indantheng sung chu feet 30 in asaovin, feet 30 ma alen'in, feet 30 ma asang'in ahi. Dantheng sung apumpi chu sana thengsel in atomjol sohkeijin, chuleh Cedar thinga kisem maicham phung jong chu sana in atomjol sohkeijin ahi.
21 Chule Solomon in indan sung aumpi chun sana thengselin atomjol sohkeiyin ahi, dantheng chungnung pen lutna maija chun sana gui teni ajam pelton, sana maman atomjol in ahi.
22 Hiti chun Hou-In sung pumpi chule Muntheng sungnunga maicham jong apumpin sana jengin atomjol in ahi.
23 Muntheng chungnung laiya hin olive thinga kisem cherub vantil lhaving ni nei limni akisem in, khat cheh chu feet 15 asang'in ahi.
24 Cherub vantil khat cheh chu alhajah feet 15 cheh asaovin, alha teni chu feet 7-1/2 sao cheh ahi.
25 Cherub teni chu aletdan jong aneo dan jong akibang gel in, chule agongso jong thakhat chet ahi lhon'e.
26 Cherub teni chu ani lhon'in asandan feet 15 alhing cheh lhon e.
27 Aman cherub teni chu indan sung langpeh a atung in, alha lhon akijal sohkeijin cherub khat lhaving chun bang lang khat aphan, chutengleh alha langkhat gel lhon chu alaija alhaving le alhaving akitongkhato lhon'in ahi.
28 Solomon in cherub vantil teni jong chu sana’n atom jolsel jengin ahi.
29 Indan lenpa bang jouse indan sungnung bang jouse chu cherub vantil lim le tumthing lim chule pahcha lim jengin akijempol in ahi.
30 Alhong ho jeng jong chu asung apo kibangin sana jengin atomjol in ahi.
31 Muntheng sungnung lutna dingin Solomon chun olive thing jengin kotpi asem sohkeijin, kot chunga ajolpa leh akotpi khom chengse chu agomin nga jen alhinge.
32 Kotpi teni chu cherub lim le tumthing lim chule pahcha lim akisem in ahi. Kotpi ahin chule lim kisem ho ahin abonchan sanan atomjol sohkeijin, cherub vantil lim kisem ho leh tumthing lim kisemho chunga jong chun sanatwi athe khumin ahi.
33 Hou-In kimlai lunga lutna ding kotpi khomho jong chu aningli noija Olive thing jeng’a kisem ahin, hitobang bang hin asemin ahi.
34 Chahthing a kisem kotpi ni alhing in, kotpi khatna ajet aveija kotpeh teni chu akilhep thei gel ahi, chu tobangma chun kotpi khatpa jong ajet aveija akotpi teni akilhep thei cheh in ahi.
35 Akotpeh chung dunga chun cherub lim le tumthing lim chule pahcha lim jeng jengin ajempol sohkeije. Chuleh abonchan sana’n atom gel in, akijopna dung gei jong sana aloival sohkeijin ahi.
36 Hou-In lailung alhong chu song khensa gol thum'in asen chule Cedar thing inkam adatna din golkhat in ajambe nalaiye.
37 Solomon leng chan kumli channa Ziv lhasung in Pakai Hou-In chu akhombul ana tung doh pan tauvin ahi.
38 Solomon Leng chan kum som le khat channa ‘Bul’ kiti lha sung hin Hou-In sahna dinga ana kigkonna dungjui bang tah in ana kijou chaisoh tauvin ahi. Hiti chun hiche Hou-In sahna ahin kum sagi ana lut in ahi.