5
Hou-In Sahna Dia Kigotna
1 Tyre Lengpa Hiram hi David dinga gol phatah ana hijing’a ahi. David chapa Solomon chu Israel te leng ahitai ti ahet phat in palai asol in akipapina thu chu aga lhutsah in ahi.
2 Hichun Hiram kom'ah Solomon in thu alethot in ahi.
3 “Kapa David chun Pakai a Pathen min dopsang na dinga a Hou-In tundoh ding chu ana jou tapoi ti nahiuve, ajeh chu aman avel’a gal mite toh gal kisattona a ana kimang chan ahi. Pathen'in ama hi gal mite ajosah soh kahsea Hou-In ana sah joulou ahi.
4 Ahin tunvang Pakai ka Pathen'in gamsung pumpia hin chamna eipe tan, tuhin galmi kanei tapon eihin suboi ding jong kanei tapon ahi.
5 Pakaijin kapa David kom'ah, nangma ban a Leng’a ka hin tun ding na chapa chun kei dinga Hou-In eihin sahpeh ding ahi. Hijeh chun Pakai ka Pathen jabolna ding’a Hou-In khat sah dingin lunggel lhuhna kanei tan ahi.
6 Hijeh chun Lebanon ah kei dinga Cedar thing eihung phuh peh dingin na mite hinsol inlang kami ten jong amaho chu tohkhom piuvin tin chuleh nangma dei dungjuijin atohman’u penang’e. Ajeh chu nami ten thing phuhje ahet bangun keima miten ahe pouve ti nahetsa ahi,” atin ahi.
7 Solomon thuthot chu ajah phat in Hiram chu akipah lheh jengin, hitin aseiye: “Hitobang nam thupitah chung’a ama banna Leng chang dinga David chapa ching tah hinpe’a Pakai chu thangvah in umhen!”
8 Hichun Hiram in Solomon chu thu athot in:
“Nahin thuthot chu kana mu’n, na ngaichat bang’a Cedar thing le chahthing bim ho kahin peh ding ahi.
9 Ka miten thingtum ho chu Lebanon mol ho apat Mediterranean Twikhanglen geijin alomin hin tolsuh untin chuleh nangin nadei nalai twipanga chu ahin tol suh diu ahi. Chujou teng ka miten lhamlha untin chuleh na mite khut a ahin pohlut ding’u ahi. Chutengleh ka insung'a neh ding nahin peh ding kadeije,” ati.
10 Hiti chun Hiram in Solomon chu Cedar leh chahthing angaichat chan ahin pen ahi.
11 Chuleh Solomon'in Hiram mite neh dingin suhlou chang atena dim 100,000 leh thaotwi kihehlhasa atena dim 110,000 apen ahi. Solomon in thil hijat hi kumseh a Hiram apeh jing ahi.
12 Pakaijin akitepna bang bangin Solomon chu chihna apen, Solomon leh Hiram kah ajong pankhom jingna dingin kigahna anasem lhon'in ahi.
13 Solomon in Israel mipi jouse lah a kon'in mi 30,000 natong dingin ana sem'in ahi.
14 Amaho hi mi 10,000 Lebanon langa asol jin, lhakhat sungin Lebanon a na agatong jiuvin chuleh lhani sung chu in’a ahung kicholdo jiuvin ahi. Hichea natongho vesui dingin Adoniram ana pansah in ahi.
15 Solomon in thinglhang gamsung’a jong thilgih pole dingin mihem sang somsagi; song kheng them jong mihem 80,000 aneijin,
16 natong ho vesui dingin lamkai 3,600 ana pansah in ahi.
17 Lengpa thupeh dungjuijin, songlentah tah le song guntah tah ho chu akheng toh-un Hou-In bul kitundohna a dingin ana mangun ahi.
18 Gebal khopi miten Solomon akithopi uvin chuleh Hiram insathem hon Hou-In song le thing ding agon peh un ahi.