146
Thil Adih Jenga Abol Jeh a Vahchoina
1 Pakai vahchoijun!
O kalhagao Pakai vahchoi jin!
2 Kahin laisea Pakai kavahchoi ding, hinna hu kanei laisen ka Pathen vahchoi la sange.
3 Leng chapa te chunga na tahsan koi hih'in, hichu panpi bei ahi bouve.
4 Mihem chate hu abei tengleh leisetna akilekit-un leivui akisoh jin, hiche nikho lechun athilgon chengseu toh thi thading ahi tauve.
5 Hinlah apanpi dinga Israel Pathen neiho, chule Pakai, Pathen a kinepna neiho anunnom ahi.
6 Aman van le leiset twikhanglen leh asunga um jouse anasemin, Aman imatih chan'a akitepna achepi jing ahi.
7 Aman suhgentheija umho thudih'in achungthu atanpeh in, chule agilkel te an apen ahi. Pakaijin songkul tangho alhadoh in, achamlhat sah jin ahi.
8 Pakaijin mitchoho kho amusah in, alhu ho aphong dingin, michonpha Pakaijin angailun ahi.
9 Pakaijin gamdang miho ahuhdoh in, Aman meithaiho leh chaga ho akhoton, amavang miphalou ho thilgon asuhbei peh in ahi.
10 Pakaijin tonsotna vai ahomding ahi. O Jerusalem, Ama hi akhang akhanga na Pathen hi ding ahi. Pakai vahchoijun!