147
Pakai Tahsan In Chule Ama Jeng Hou-In
1 Pakai vahchoijin umhen!
I-Pathen'u vahchoi lasah ding hi iti phat-a pha hitam! Ijeh-inem itileh Ama lungset nan adimn in, vahchoi dia lomtah ahi.
2 Pakaijin Jerusalem aki ledohsah in, amangtasa Israel te ahin lepui kit in ahi.
3 Aman lungthimna jong aboldam in, amaha jeng-u jong adamsah in ahi.
4 Aman ahsi ho asim toh in, amin cheh in akouvin ahi.
5 I-Pakaiyu hi iti loupi hitam! Athaneina hi akhonna gei ahi! Athil hetthem theina jong mihem hetphah hoi ahipoi.
6 Pakaijin mikineosah ho adomsang'in, ahin miphalouho vang toltoh alhobeh'in ahi.
7 Pakai thangvahna la sauvin, semjangto thon Pathen vahchoila sauvin.
8 Aman vanho meilom'in akhun, leiset a go ajuh lhahsah in, chule molchunga hampa louhing akedohsah in ahi.
9 Aman gamsa ho neh ding apen chule va-ah nou ho apenteng aneh diu apejin ahi.
10 Aman sakol thahatna leh mihem thahatna'a akison-jiu akipapi poi.
11 Pakai chu Ama ging jing ho leh ami ngailutna longlou chunga kinepna neiho akipa pin ahi.
12 Vo Jerusalem, Pakai loupina vahchoijun! O Zion, na Pathen vahchoijun.
13 Ajeh chu Aman nakelkot jol ho alhousah in, chule nakul sunga nachate phatthei aboh in ahi.
14 Aman nagamgi tin-uva chamna alensah in, chule nagilkel nauvah an twitah in navah uvin ahi.
15 Vannoi leiset chunga thu-apeh teng jongleh aman gang in ahi.
16 Aman buhbang jeng jong samul abahsah jin, chule dai-kai jong vutvam kithejal abahsah jin ahi.
17 Gel-chang jong song kisunglha abahsah jin, adapsah teng jong ama-anga ding jou ding koi ham?
18 Chujou teng Aman thu apen ahileh ajunlha gamji tan, Aman hui chu asol'in ahileh buhbangho chu twijin alongji tai.
19 Aman Jacob henga thu aseipeh in, Israel kom'a a Dan thupeh ho leh athuhil ho chu ahilchen in ahi.
20 Hitobang hi namdang ho jah a aseipeh pon, ama hon athuhil jong ahepouvin ahi.
Pakai vahchoijin umhen!