28
David Dinga Pathen Hi Panpi Le Hoidohna.
David Labol.
1 O Pakai, kasongpi, nakom'a kataove.
Ngaipeh lou in neikoi hihbeh in.
Ajeh chu nangin neithip san leh,
kei jong lhadah ing kating kathi ding ahitai.
2 Hepina ngeh a nei panpi dia katao teng
nei ngaipeh tei in,
kakhut kahin domsang'in na muntheng lam kahin sang'e.
3 Thilse bolnom jing a—
akam uva thungai ngai seija—
alungsung uva thilse jeng gong leho toh
nei suhmang tha hihbeh in.
4 Ama hon achan ding dol u athilse bol utoh kitoh in got na pejengin!
Athilse bol'u dungjui chetnin lethuh jengin.
Mi chunga athilse bol gu utoh kitoh in
amaho chungah chuhsah in.
5 Pakaijin ipi abol ham ti ama hon anahsah pouve
Pathen khutsem ipi jeh a um ham agel pouve.
Hijeh a chu aman abotel a,
tonsot gei a kitung doh lou diu ahitai!
6 Pakai chu thangvah in umhen!
Ajeh chu khotona ngaicha a ka taona chu eijah pehtai.
7 Pakai hi kahatna le kalum ahi.
Ka lungthim pumpin ama chu ka tahsan e.
Aman eikithopin ka lungthim kipa nan adim e.
Thangvahna la'n keiman kasam phonge.
8 Pakaijin amite thahat apei.
Ama hi athaonu lengpa dinga ahoidohna kulpi ahi
9 Na mite huhhing in!
Kelngoi chingpha bangin, na goulu Israel chu phatthei bohtan.
Chule tonsot in amaho hi,
naban jet in puitan.