29
David In Ijakai Pathen Loupina Jeng Ahi Ti.
David Labol.
1 Nangho vanmi hon Pakai chu jana peuvin;
Aloupina le athahatna jeh in Pakai chu jana pecheh un.
2 Amin loupina jeh in Pakai chu jabol cheh un.
Athenna thupi tah jeh chun Pakai chu chibai boh un.
3 Twipi chungah Pakai ogin athong doh e.
Vanthamjol gin bangin Pathen loupina akithong'e.
Pakai hi twikhanglen chungah akithong'e.
4 Pakai ogin hi thanei tah ahin;
Pakai ogin hi thupitah ahi.
5 Pakai Ogin hin Cedar thing thupitah ho jong aban tumboh gam e;
Pakai thupi nan Lebanon Cedar thingho jong asubong soh gamtai.
6 Aman Lebanon mol jeng jong bongnou bangin akichop sah e;
Aman Hermon mol jeng jong gambong bangin akichop sah e.
7 Pakai ogin hi kolphe meivah
gimnei tah banga ginga ahi.
8 Pakai Ogin chun gamthip gamgo lai jeng jong akilinsah e;
Kadesh gamgo lai jong Pathen'in akilin sah e.
9 Pakai Ogin hin gangpi phung phatah ho jong ahot ling in,
gammang jong asuchai hel e.
A Hou-In theng sungah mijousen, “Aloupi!” tin asam uve.
10 Pakai chu twipi chunga chun vai ahom e.
Pakai chun tonsot a leng vai ahop ding ahi.
11 Pakaijin amite thahat apei.
Pakaijin amite chamna apen phatthei aboh'e.