32
Ngaidamna Akon Phattheina Thudol'a David Vahchoila.
David Labol.
1 Oh, asei ngailouna hou
kingaidam a achonsetna hou kisuhmang peh ho,
iti thanop um hitam!
2 Pakaijin ajihlutsa
achonset nau athaimang peh a,
ahinkhou jong kitah-tah a mangho chu iti kipa uma hitam!
3 Keiman ka chonset kaphon nomlou chun,
katahsa chu amangthah anahin,
niseh in kapeng in kamao jinge.
4 Sun le jan in kipuidihna na khujol chun eidouve.
Nipilai a nichangsat in asuhkang twihu bangin katha asukanghel jenge.
Selah
5 Akhon nan ka chonsetna nahenga kaphong in
kamona jouse selguh ding golouvin kasei tai.
“Ka louchal kasetna jouse Pakai kom'a phongdoh tang e” kati.
Hiti chun Pakai nangin nei ngaidam e! Ka chonsetna jouse abeisoh tai.
Selah
6 Hijeh chun, phatpha umlai hin Pathen mite jouse naheng a tao cheh uhen,
hiche thutanna twilen lah a alhahlut louna diuvin.
7 Ajeh chu nangma hi kakiselna kulpi nahin;
nangin boina a kon'in neihuhdoh e.
Galjona lan nei umkimvel tai.
Selah
8 Pakaijin aseije, “Na hinkho a lampi phapen a chu kapui le ding ahi.
Keiman ka thumop a ka vetsui jing ding nahi.
9 Sakol le Sangan bangin hetna beiyin um hih in,
ajo leh kamdal le thihkol bupeh a thunoiya kikoi nabahlo ding ahi.”
10 Miphalou ho hi lungkhamna tamtah in abomjin,
ahinla Pakai tahsan ho vang angailutna long louvin aum kimvel jingin ahi.
11 Hijeh chun ama lungdei a chon ho Pakai a kipah thanom jingun!
Mi lungtheng ho jouse thanom tah in kho samun!