33
1 Pathen mite jousen Pakai thangvahna la kipah tah in sauhen;
mi lungtheng hon Ama athangvah diu hi lomtah ahi.
2 Semjang gin ngaitah in Pakai thangvah un;
tumging jangsom ngaitah saijin nguiheovin sauvin.
3 Pakai thangvahnan lathah sauvin;
thepna neitah in selangdah saijun lang kipah tah in la sauvin.
4 Pakai thusei jouse chu atah ahin,
chuleh anatoh athilbol jouse chu tahsan thei cheh ahi.
5 Adihleh apha kiti jouse chu Pakai deilam ahin;
Ami ngailutna longlou chun vannoi leiset hi adimin ahi.
6 Pakai thucheng bou hin
vanmun hi asemdoh e.
Ama thucheng haikhum chun,
ahsi jouse apendoh sah tai.
7 Aman twikhanglen jong agamgi asempeh in
chule twikhanglen jouse hi munkhat a aveikhom sah in akoidet in ahi.
8 Vannoi leiset pumpin Pakai hi jana peuhen,
chuleh mijouse a angsunga kichatah in dingu hen.
9 Ajeh chu ama thucheng khat in leiset khang akipatsah ahi!
Ama thupeh a kitungdoh jeng ahi.
10 Pakaijin namtin vaipi thilgon hou chu asuhboi peh in,
chuleh atohgon hou jouse chu asuhmo peh in ahi.
11 Ahinlah Pakai thilgon vang tonsot in adet jing e;
ama tohgon ho chu itih a jong killing lou ahi.
12 A Pakaiyu Pathen hikha nam mite chu anunnom ahiuvin,
agoulo dinga alhen nam mite chu anunnom ahiuve.
13 Pakaijin van'a kon'in
mihemte jouse ahin ven amu sohkeije.
14 Alaltouna a kon'in ahin ven
leiset chunga cheng jouse hin dan ahe sohkeijin ahi.
15 Alungthim'u sempa ama ahijeh in,
alunggel ule athilbol jouseu ahe sohkeije.
16 Gal manchah phapen in lengpa huhdoh jou pontin,
hangta le hansan nan jong gal hatpa ahuhdoh joupoi.
17 Gal satna sakol khatnin jong gal najo sah jou ding ahipon—
thahatna jousen jong nang na huhdoh jou ponte.
18 Ahinla Pakaijin ama gingte,
angailutna long louva kingai jing ho avelhi jing e.
19 Pakaijin amaho chu athina diuva kon'in ahuhdoh jin
athigamna diuva kon'in ahuhdoh jin ahi.
20 Keihon Pakaiyah kinepna kakoi ui.
Ajeh chu ama hi eikithopiu leh kalum uva pang ahi.
21 Ama a hin ilungthim'u akipah in,
ajeh chu eihon amin thenga tahsan na dettah inei un ahi.
22 Vo Pakai na mingailutna longlou chun eium kimvel uhen,
ajeh chu nang jenga bou ka kinepnau aum'e.