35
Thudih Tanna Dia Pathen Henga David Taona.
David Labol.
1 Pakai, eidou ho hi nangin kidoupin,
eikisatpi ho jong nangin kisatpin.
2 Nalum leh na ompho hin kipat in.
Galmun a din kigon lang neihung kithopin.
3 Eihin delkhum ho dounan
na tengcha leh na tengmuh chu hin lam tan.
“Keiman gal ka jopeh ding nahi!”
ti neijah sah tan.
4 Eithat go ho chunga hin jumna le jachatna lhun sah in;
eigimbol a eisumang go ho hi jumson lang nungno jeng tan.
5 Huilah a changvai alenmang bangin lenmang sah in,
Pakaiya kon a vantil banga hung chu semmang sah in.
6 Alamlhah nau thimsah inlang lhonal sah in,
Pakai vantil chun nungdel peh uhen.
7 Keiman amaho kabol sepoi, ahin ama hon thang eikam khumun ahi!
Ken amaho kabol sepoi ahin ama hon keimatna din kotong alai uve.
8 Hijeh chun amaho chunga hetman louvin mathahna hunglhung hen!
Kei ona dia asem u kotong chu amaho manthahna hijo tahen.
9 Chuteng keima Pakaiya kakipa ding ahi.
Eilhatdoh jeh a keima kipah thanom ding kahi.
10 Ka tahsa chunga kagu kachang jouse pum a Pakai ka thangvah ding ahi:
“Pakai koi ham nang toh kitekah thei ding?
Koidang baham mihatpa thaneina a konna panpi beipa huhdoh a chu?”
11 Engbolna dih louvin eithemmo sah un.
Ka hetphahlou jouthu a mona eikichan e.
12 Ama hon ka thilpha bol jeng jong thilsen eile thuh uve.
Lunglhah nan kangui heltai.
13 Ahijeng vangin ama ho anat tengu leh, keiman amaho kalainatpi jin ahi.
Khaodip pon kakisil in anngol in amaho ka taopeh jin ahi.
Hinla ka taona donbut louvin ahung kinungle jitai.
14 Ka golpha le insung mi monga kagel jeh in kalungkham pin,
eihinga kanu ka lainatpi bang bangin ka lainatpi jin ahi.
15 Hinlah ken tunia boina kato phat in amaho akipah un;
kei dounan thanom tah in akiloi khomui.
Hiti chun ka hetkhah lou miho kisanin tu jengin jong eino khum un;
phat tinin eihouse jing jengun ahi.
16 Ama hon einuisat un eitam seuvin;
noise tah in eihagel khum un ahi.
17 O Pakai, itih chan gei pi, neivet a don louva neikoi ding hitam?
Eilonvuh nauva konin nei huhdoh in.
Hiche keipi bahkai a konin nei vengdoh in!
18 Chutengleh mipi tamtah kikhom te lah a kipathu kahin sei ding ahi.
Mipi ho jouse masanga nangma kahin thangvah ding ahi.
19 Ka jolelna chunga hin eidou te kipa thanop sah hihbeh in.
Ka muisetna chungin jong ajeh beiya eivetda ho kitaisah hihbeh in.
20 Ama hon chamna thu asei pouvin;
ama hon thepmona neilou atoh dingdol tongho dounan thilse agong jingun ahi.
21 “Aha! Aha! ipi bol kigo nahi
kamit tah un kamudoh tauve!” tin asam uve.
22 O Pakai, nangin hicheng hi na musohkei in nahesoh e.
Don louvin koi hihbeh in.
O Pakai, nei dalha hihbeh in.
23 Hung thoudoh in! Ei huhdoh dingin hung dingdoh jeng tan!
Pakai le ka Pathen, ka chungthu hi nei tanpeh in.
24 O Pakai ka Pathen, kamo louna nei phondoh pehtan, ajeh chu nangma thutan dih nahi.
Kaboina chung chon a ka dougal te nuisat in nei umsah hihbeh in.
25 “Veuvin itup uchu imu tauve!
Tua hi ahingsan a inehchai diu ahitai!” tisah hihbeb in.
26 Ka hahsatna nikhoa kipah ho
sujum inlang jachat sah in.
Ka chunga hanla samho hi
jumna leh minset nan lhuh khumin.
27 Ahin koi hileh keima eihuh dia hung ho jouse chu kipana lentah pen.
“Pakai aloupi e aman asoh hi lunglhai tah in phatthei aboh in lungmon na apei!”
tin tang louvin samjing uhen.
28 Chuteng keiman na thutan adihje samphong ingting,
niseh a nangma ka vahchoi ding ahi.