34
David In Phat Jousea Pathen Avahchoi.
Anomangpa Abimelech Masanga Mingol Banga Aumna Chunga David Labol.
1 Keiman Pakai chu phat tinin thangvah ing kate.
Pakai thagvahna hi ka kamsunga gingdoh jing ding ahi.
2 Keima Pakaiya bou kithang-at jing ding kahin;
panpi beite jouse lunglut cheh uhen.
3 Hungun Pakai loupina hi seiphong khom uhitin;
amin hi choi-an khom uhite.
4 Keima Pakai kom'a kataovin, aman kataona eisanpeh tai.
Aman ka kichatna jousea jong eilhatdoh tai.
5 Ama panpi ding ngaicha jouse vah bangin hungvah doh untin,
amai uva jachatna muthim jing louhel ding ahi.
6 Ka hahsat behseh phat in kataovin Pakaijin eingai peh e;
aman ka boina jouse eisuh lhappeh tai.
7 Pakai vantil chu hoidamna ahin;
ama ging te aman aum kimvel in ahuhdoh jinge.
8 Pakai phatje chu patep un lang veuvin.
Oh, Pakaiya kisel jing mite chu iti kipa hitauvem!
9 Nangho Pathen mite ho, Pakai chu ging jingun,
ajeh chu ama ging jing ten angaichat jouseu amu diu ahi.
10 Keipi bahkai gol hat laitah jong agilkel jin,
ahin Pakai tahsan det jing ho vang thilpha alhasam ngai pouve.
11 Ka chate ho, hung uvin, kasei hi ngai phauvin,
chule keiman Pathen ginje kahil ding nahiuve.
12 Hinkho sottah leh phattheina
lhingset a hingnom um kha em?
13 Thuse seinan nalei tuhtangin lang
chule nakam jong jousei nan mang hih in!
14 Thilse a kon'in kihei mangin.
Thilpha bol in, chamna hol inlang hichu chepin.
15 Pakai mit in thilpha boljing ho avesui jingin;
panpi ngai a koute din akol tenin jong akihong jing e.
16 Hinla thilse bolte chu dou mit in aven,
aman amin u leiset akon athaimang ding ahi.
17 Pakaijin panpi ngaicha ho kouna angaipeh e.
Aboi nauva kon'in ahuhdoh jin ahi.
18 Lungthim kisuchip te kom'a Pakai chu anaijin;
alhagao kisugim te ahuhdoh jin ahi.
19 Michonpha hon boina tampi atoh jiuvin,
hinla Pakaijin phat tinin ahung huhdoh jin ahi.
20 Ajeh chu Pakaijin michonpha ho gu le chang ahoibit pehjin;
khatcha jong abohsah pon ahi!
21 Hamset nan migiloute hinkho alah tei ding,
michonpha ho hotbol te jong gotna chang tei diu ahi.
22 Hinla Pakaijin ama kin bol ho vang alhatdoh ding,
ama a kisel jing ho jong themmo changlou diu ahi.