40
David In Lungneng Tah A Pathen Anga.
La Lamkaipa Dia David Labol.
1 Panpi ding ngai in Pakai chu lungneng tah in kangah jing e,
aman kaheng lam ahin ngan ka taona eisan peh tai.
2 Aman lunglhahna thei kotong a kon'in eikai doh in,
bol sunga bonngan lah a kon'in eikaidoh e.
Aman tolgo chunga eidinsah in
ka kalsonna jong ei suhdih peh e.
3 Kasah ding lathah khat eipen,
I-Pathen'u vahchoina ding la khat eipen ahi.
Mi tamtah in anatoh hinmu un tin adatmo dingu ahi.
Hitia chu ama hon Pakai chu atahsan diu ahi.
4 Oh, Pakai tahsanna a ding det ho iti akipa tadiuvem,
ama hon mikiletsah ho chunga tahsanna anei pouvin
ahilouleh semthu pathen limhou ho jong atahsan pouve.
5 O Pakai ka Pathen, nangin keiho dingin thil kidang tah-tah nei bolpeh tauve.
Nei gonpeh u thil ho hi simjou sutjou hoi ahipoi.
Nang toh kibang ding koimacha aumpoi.
Nakidang na tohdoh ho hi sim ding kagon,
achaina gei kalhun louding kahei.
6 Nangman pumgo thilto ho a hin kipana nanei poi.
Nei ngaisah thu ho chu tun kahe chen tai—
nangin chonset thoidamna thilto leh pumgo thilto jong na ngeh poi.
7 Hichun keiman ka seijin, “Ven keima kahung e.
Pathen Lekhabu a kisun bangin:
8 Nangma lungdei lam bol ding hi ka thanopna ahi, O Pathen,
ajeh chu ka lungsunga nangma danthu ho hi akisun luttai.”
9 Na mite jouse lah a na thutan dihje hi ka phongdoh tai.
O hetthemna nei Pakai, nangma bangin kichalou beh in,
ka seidoh tai.
10 Nadih jedan kipana thupha hi keiman ka changa din kalungthim a selguh in kakoi poi;
Na kitahna le na mihuhhingna thu kasei e.
Na houbung mitheng te lah a na mingailutna longlou le
na kitahna chu tang louvin kasei phong jinge.
11 Pakai nangin tang louvin nei ngailu jing jenge.
Na ngailutna le na kitahna chu nei hoibit jing sah in.
12 Boinan eibom in—
sim a simjou hoi ahipoi!
Ka chonsetna akikhol sang'in
ka lampi jong kamu thei tapoi.
Ka lujanga kasam sangin atamjo tai.
Hansanna him-him kanei jou tapoi.
13 Pakai lungset tah in nei huhdoh in!
Hung vah in Pakai nei panpin.
14 Ei sumanggo ho hi jumson lang kisuhboi sah in.
Ka hahsat nikho a kipah ho lungdong in nungjam sah in.
15 “Aha! tun akimaikhah tai!” tia asei jeh un,
jumnan kicha uhen.
16 Nangkom hinbel jouse
kipana le thanop nan dimset uhen.
Na mihuhhingna kipapi ho chun
“Pakai chu aloupi e!” tin samjing uhen.
17 Keidin vang genthei le vaicha kahi jeh in,
Pakaijin alung sunga eihoi jing hen.
Pakai nang chu eikithopi le eihuhhingpu nahi.
O ka Pathen, khongai sot hih in.