41
Pathen'in Genthei Te Akhohsah.
La Lamkaipa Dia David Labol.
1 Mi vaichate khoto ho chu anunnom ahi!
Amaho chu Pakaijin boina ato nauva kon a ahuhdoh diu ahi.
2 Pakaijin amaho chu ahoibit in
ahinghoi jiuve.
Aman amaho chu gamsung ah phatthei aboh in
gal miho a konna ahuhdoh ji e.
3 Pakaijin adammo nauva panpin tin adamdoh sah diu ahi.
4 “O Pakai”, katao ahi, “eilungset in.
Nei damdoh sah in, ajeh chu nangma dounan ka chonse tai.”
5 Ahinla ka dougal ten keima dounan thilse jeng aseiyun ahi.
“Itih tah le athin suhmil in aum tadem?” atiuve.
6 Kagol kapai bangin eihung vil jiuvin,
hinla chomlou kah in kachung chang guhthim thu asei khom leuvin,
eidalhah tengu le muntin a aphonjal ji tauve.
7 Eihot bolten kei chungchang a thil phalou ngen aseijun,
ka chunga thilse ahung lhun ding bou adeiyun ahi.
8 “Ama hi thina thei hiveija na ahi,” atiuve.
“Ama hi damdoh joulou ding ahitai!”
9 Ka tahsan pen, kagol phapen,
an kaneh khompi pa jeng jong keima eidouvin apang tai.
10 Pakai, nei lungset in.
Nei damdoh sah kit in amaho hi ka lethuh jouna din!
11 Pakai nangma kachunga nalung lhaije ti kahei,
ajeh chu nangin ka melmate ka chungah gal nalel sah tai.
12 Nangin ka hinkho nei hinghoi peh tai ajeh chu keima mimol kahin;
chuleh nangin atonsot a din na-angsunga neipui luttai.
13 Israel Pathen Pakai chu thangvah in umhen,
tonsot-tonsot a hingjing pa chu.
Amen chule amen!