42
BU NINA (42 - 72)
Pathen Ngaicha A Dangchah.
La Lamkaipa Henga Korah Chilhah Te Labol.
1 Sakhi sitwi chimset ngaichat dangchah bangin,
kahin ngaicha e, O Pathen.
2 Hingjing Pathen chu dangchah in kalha ngai e.
Itih tah le kache a a-anga ka chibai thei ding ham?
3 Sun le janin lonlhi bou ann in kanei tai,
kagal miten phat tinin ei enghouvun,
“Na Pathen hoija um ham?” atiuve.
4 Ka lungthim ana lheh ji e
thil umdan ho chu ka geldoh jiteng:
Pathen Hou-In a mihonpi chutoh kilhon a,
tanggol a Pathen inlam jon a kitol a,
thangvah la kisa a
mihonpin golvah kibolji ho chu!
5 Ibol a kei lung lhadah kahim?
Ibol a kalung hibanga hesoh a ham?
Keiman Pathen a kinepna giltah kaneijin!
Ken ama kathang vah kit ding ahi—
ka huhhing pu
6 ka Pathen!
Tun keima kalung alhadah lheh jengtai,
hinlah kahin gel doh jing ding nahi—
Jordan hung kondohna, Hermon molsang lang hijongleh,
Mizar Mol a konin.
7 Nangman twipibang nakinon a naki ho twikhanglen gin chu kaja'n
nangma twipi kidilleh twipi kitol chun eihin lonvuh in ahi.
8 Ahinlah niseh in Pakaijin angailutna longlou chun eiphungvuh jingin,
chuleh janseh leh ama vahchoila kasajin,
hinkho eipe a Pakai kom'a chun katao jin ahi.
9 “O Pakai ka songpi, keima kakap e,
ipi dinga nei suhmil hitam?
Ipi dinga ka dougal te bol hesoh jeh a,
lunggim'a kavale jing ding ham?”
10 Eihouset nau hin ka geplha tan ahi.
“Na Pathen hoija um ham?” tin ei nuisat uvin ahi.
11 Ipi dinga keima hiti lungkham kahim?
Ipi dinga hiti lungboi kahim?
Keiman Pathen'ah ka kinepna koi ingting!
avellin thangvah kit inge—
eihuhhingpa leh ka Pathen chu!