45
Lengpa Jineina Aa Sah Ding La.
La Lamkaipa Dia Korah Chapa Ten Joldei La “Lilies” Lakaiya Sah Dia Abol'u.
1 Ka lungthim in thu hoi tah ahung kilang e.
Keiman lengpa chung chang hiche jaila ngaitah hi lungchin in sei inge,
ajeh chu kalei hi jaila themtah pa moljap tobang ahi.
2 Nang hi mihem jouse lah a ahoipen nahi.
Nalei a thungai tamtah ahung potdoh e.
Pathen ama tah in tonsotna din phatthei naboh tan ahi.
3 O gal hatpa! Na chemjam chu hin kipoh in!
Nangma hi na loupi in na thupi e!
4 Na thupina a chun hung kivon inlang galjou dingin hung kondoh tem in,
thutah leh thudih chuleh kisuhnemna ho hi chejom sah dingin kondoh in.
Datmo um tah-tah thil ho chu hung tongdoh tan!
5 Na thalmuh ho chu ahem in nagal mite lungsung asun vang jeng tai.
Namtin vaipi na kengto noija aum tauve.
6 Vo Pathen, na laltouna hi tonsot-tonsot a chejom jing ding ahi.
Na leng tenggol a chu thudih tah a vai nahom ding ahi.
7 Nangin thudih a thutan na deijin thilse nathet ahi.
Hijeh chun Pathen, nangma Pathen, chun thao nanu ahitan,
leng dang sanga nang chunga hi kipa le thanopna thaotwi chu nasun khum ahitai.
8 Myrrh, aloes, chuleh cassia hon navon anamtui sel e.
Saiha a kisem khopia chu tumging ngaitah a na kilamto ding ahi.
9 Leng chanu te chu na numei nunnem te lah a aum un,
najet langa ophir sana hoipen ho a kijem lengnu ading'e!
10 O leng chanu te, ka thusei ngai un; amapa hi jabol un.
Ajeh chu ama hi na Pakai pau ahi.
11 Ajeh chu sahlut tah naji hi namel hoinan alunglhai sel e;
jabol in, ajeh chu amapa hi na pakai pa ahi.
12 Tyre lengpa chanu ten jong kipa thilpeh tampi nahung peh diu ahi.
Mihao ten nalung lhaina ding ahin hol diu ahi.
13 Mounu, leng chanu, chu kivonna sana a kisem
sangkholchol a chu iti vet loupia hitam.
14 Hiche avon loupi tah kivon in lengpa kom lam a ahin pui un
anungjui nungah ho chutoh apuilut un ahi.
15 Kipah tah le thanom tah a leng inpi sunga ahung akijot lut uchu
iti lou a loupi hitam!
16 Na chate jong apa tobang a leng hung hicheh ding ahiuve.
Nangin amaho chu gam tamtah a lenga napan sah ding ahi.
17 Khang jousea na minthanna kahin pohlut peh ding ahi.
Hijeh a chu namtin vaipin tonsot a nahin thangvah ding ahi.