46
Pathen Hi Eiho Dinga Kiselna Le Thahatna Ahi.
Korah Cchapa Ten La Lamkaipa Heng'a Ochung Hoa Sah Dia Alabol U.
1 Pathen hi ikiselnau leh isongpiu ahi,
boina nikho hoa eipanhu diuva kigosa ahi.
2 Hijeh a chu liingkihot henlang
mol le lhang chim henlang twikhanglen a kilehlut jongleh kicha pouvinge.
3 Twikhanglen hi kinong henlang kitum jeng hen.
Twikhanglen kinong a ahung letdoh bangin mol le lhang jong kihot chimlha jeng hen!
Selah
4 Vadung khat in I-Pathen'u khopia chun kipa thanopna ahin polut e,
Hatchungnung Pen chenna munthenga chun.
5 Hiche khopi achun Pathen achengin kisumang thei louding ahi.
Nikho kipat a pat Pathen'in avenbit jing ding ahi.
6 Leiset chung namtin vaipi hi aboitan,
lenggam ho jong akiling sohtan ahi!
Pathen ahung kisen in ahileh,
leiset ajunlha gamtan ahi!
7 Pakai hatchungnung hi ilah uva aum in;
Israel Pathen hi ikulpiu ahi.
Selah
8 Hungin Pakai thil loupi bol hi hung vetan:
Hungin lang aman vannoi leiset asuhmang hi hung vetan.
9 Aman vannoi leiset pumpia gal ho hi atuhtang e.
Athalpiu leh atengchau aheboh peh gamtan;
aman alum uchu meiya ahallha tai.
10 “Thipchet un, chule Pathen kahi hi heuvin!
Vannoi leiset pumin eijabol cheh diu ahi.
Leiset pumpia a hi dopsanga kaum ding ahi.”
11 Hatchungnung Pathen hi ilah uva aum'e;
Israel Pathen hi ikulpiu ahi.
Selah