50
Katdoh Sanga Thungaina Hi Pathen Lung Lhaina Ahijoi.
Asaph Labol.
1 Pakai, loupipen, ama chu Pathen ahin,
chuleh Aman thu asei e;
Nisona mun apat nilhumna mun ho gei in
mihem te akou jing e.
2 Zion mol'a kon'in, amel hoina bulhingset'in,
Pathen loupina chun ahin salvah in ahi.
3 Pathen ahunglhung tai,
Ama thipbeh in aumpoi,
alamlhahna a thil jouse mei in akavam gamtai,
chuleh avel'ah huipi nasatah anung'in ahi.
4 Aman amite chung'a a thutanna ve dingin
chung lang'a van ho le leiset akou in ahi.
5 “Ka heng'a kilhaina bol'a—
kitepna ka semkhompi tahsan umtah kamite chu hin puilut uvin.”
6 Chuleh vanho jousen athudihna phongdoh uhen,
ajeh chu Pathen ama tah thutan'a pang ding ahi.
7 “Vo kamite ka thusei hi ngai uvin.
Vo Israel nangma douna ka thilgon aum'e:
Keima hi Pathen, na Pathen chu kahi!
8 Kilhaina na bolna ho leh pumgo thilto nabol ho
chuleh tanglou a na thilpeh jingho chung'a hin keiman lung phatmona kanei poi.
9 Ahin keiman nabong hon lah a kon'a hiche bongchal ahin,
nakel hon lah a kon kelcha jong chu kangaicha dehpoi.
10 Ajeh chu gammang lah a ganhing jouse kei a ahin,
chuleh mol le lhang jouse'a bong ho jouse jong kei a ahi.
11 Keiman mol jouse chung'a vacha jouse kahen,
chuleh gamlah a ganhing ho jouse jong keija ahi.
12 Keima hi gilkel thei anahi jeng tajong leng, nangma kom'a kasei angaipoi,
ajeh chu vannoi leiset chung'a thil ijakai aumho jouse hi kei a ahi.
13 Keiman bongchal ho sa kaneh em?
Kelcha ho thisan kadon khah em?
14 Nang'in thangvahna hi kilhaina in mang'in,
chuleh Hatchungnung Pen kom'a na kitepna chu nit in.
15 Chule genthei nikhon keima neihin kouvin,
keiman nahuhdoh ingting,
nang'in nei choi-at ding ahi.”
16 Ahinlah miphalou te kom'a Pathen'in hiti hin asei e:
“Ipi dinga nang'in ka Dan thu
le kakitepna chu na boipi khoh ham?
17 Ajeh chu kahilna la najuipon
chule ka thumop jong lahlouvin nakoi e.
18 Nang'in gucha ho namu teng na pahcha in,
chuleh jonthanghoi bolte na kivoppiji e.
19 Nakam sunga thujou adimset in,
nalei chu thujou jeng seh seinan na mang'in ahi.
20 Muntin a natou len nanu a konna napenpi nasopipa jeng jong—
jouthun na hehse lei.
21 Nangma hitobang'a na kimanchah sung'in, thipbeh in kaum'in ahileh,
keiman ka nahsah lou dan'in nagel e.
Tuvang hin nachung'a themmo kahin chan'a hichengse pum'a hi kahin gih nahitai,
nangma douna kahin lhunsah ding ho hi ka gollha tai.
22 Ei sumilho jouse, kisih un,
achuti loule Keiman kabotel ding nahiuve,
chule koiman nakithopi loudiu ahi.
23 Ahinlah kilhaina thilto khel'a thangvahna eipe'a chun eichoisang tahbeh ahi.
Ka lamlhahna a naum jing leh,
Pathen mihuhhingna chu ka musah ding nahi.”