49
Leiset Haona Lhou Ngailou.
La lamkaipa Henga Korah Chapa Te Labol.
1 Nangho mipi ten, hiche hi ngaijuvin!
Nangho vannoi mite jouse'n ngaicheh uvin!
2 Dinmun sang le nem,
ahao le avai in—ngaiyun!
3 Ajeh chu ka thusei ho hi chihna thu ahin,
chuleh kalung'a kagel jong hi hetgilna dimset ahi.
4 Keiman thuchih kaseiho chu giltah in kagel'in
hiti chun semjang sai a kitilkhou in thulem kaseiho suhlhapna kaneiji e.
5 Kagal miten eihin umkimvel uva boinan eihin lhunkhum teng,
idia ka kichat ding ham?
6 Ama hon anei agou hou atahsan un
ahaothei nauva akiletsah ui.
7 Ahijeng vang'in athina diuva kon'in amaho le amaho akihuhdoh jou pouvin
Pathen henga sum in ahinkhou akichoh thei pouve.
8 Lhatdamna kiti hi bailam tah a um ahipoi,
ajeh chu koiman alhingset in apejou poi
9 tonsot a hingjing a
lhanmun'a che louhelna ding chu.
10 Miching ho chu nikhat thi tei diu ahi,
hiche mingol le lunggel neilou ho banga,
anei agou hou chu adalhah cheh diu ahi.
11 Lhanmol chu atonsot in'u ahitan,
achen jingna diu mun chu ahitai.
Anei agou hou chu amaho min putsah jong leu,
12 aminthan nau chu sotlou ding ahi.
Ganhing ho bang'a thi thou-thou diu ahi.
13 Amaho hi min miching dan'in gel jongleu,
mingol bang'a thina ato thou-thou diu ahi.
Selah
14 Kelngoi ho bang'a, lhanmun lhung thou-thou diu,
thina chu akelngoi chingpau hi ding ahi.
Jingkah teng Pathen mitah hon achung uva vai ahop diu ahi.
Anei agou hou a kon'a gamla tah a,
lhanmun khat a monlha thou-thou diu ahi.
15 Ahin keivang, Pathen'in kahinkho eilhatdoh peh ding ahi.
Aman lhanmun'a kon'in eihuhdoh nante.
Selah
16 Hijeh chun migilou ho ahung hao uva
a inchen ujong ahung hoibe cheh tengu le lung lhadah hih in.
17 Ajeh chu amaho athi tengu leh, imacha akipoh diu aumpoi.
Anei agou un lhan sung'ah juilut thei pouvinte.
18 Hiche lei hinkhoa hin alolhin jeh un vangpha
le ochat um'in kigel unte.
19 Chemasa ho bang-bang'a thidiu
khovah amukit louhel diu ahitai.
20 Anei agou u kiletsahpi ho chu amaho jong ganhing bang'a;
phat khat leh thi thou-thou diu, ahilam akihetdoh lou u ahi.