55
David In Akinaipi Gol Le Paiya Kon Gimna Ato.
La Lamkaipa henga David in tumging toh thoa sah dia alasem.
1 Vo Pathen, ka taona nei ngaipeh in.
Panpi ngehna a ka taona nei gelkhoh peh in!
2 Lungset tah in ka taona nei ngaipeh inlang neihin donbut teijin,
ajeh chu kagim nan eihin lonvuh tan ahi.
3 Kagal miten eisam seuvin,
eigih nau hi akithong leu jengin ahi.
Aman boina eilhunkhum sah un
lunghang tah in eihin delkhum tauve.
4 Kalung aphul lap jenge.
Thina gimnei tah hin eihin nokhum tan ahi.
5 Tijatna le lunggim nan eilonvuh tan,
kithing louvin kaum theipoi.
6 Oh, vakhu bang'a lhaving nei hitave leng;
keima lengdoh ingting ga kicholdo tang'e!
7 Keima gamla tah in lengdoh ingting
gamthip noi olnamun gabel tang'e.
Interlude
8 Hitobang kivetdatona huipi kinonglah a kon hin—
gangtah in gamla tah a jammang tang'e.
9 Pakai amaho hi kisuhmo sah inlang athilse gon'u jong hi suhmo peh jeng tan,
ajeh chu athilgon'u hin khopi sung'a thilse tamtah asodoh sah ding ahi.
10 Akulpi bang'u jong galmia kon'a hoidohna dinga asun ajan a angau ahi,
ahinla akhohpen tah chu khopi sung'a chonsetna ho hi ahi.
11 Thil jouse hi asegam'a ahitai;
kailhang jeng'a jong kigihna le kijoubolna adimlha tan ahi.
12 Ka dougal'in eitaitomna jong ahipoi—
hichu kadou jouve.
Kiletsah tah a eijumso jing'a ka kidoupi pa jong ahipoi—
amaho a kon chun ka kiseldoh theinan ahi.
13 Amavang, hiche ho chu hilouvin—ka kibahpi,
ka kivoppi, ka golngai nangma chu nahi.
14 Phat khatna chu ichan geija ina kingailut hitam
Pathen Hou-In jeng'a jong ina kijotlutji ahi.
15 Ka dougal te hi thinan lhunkhum hen;
lhankhuh in ahing'in vallhum jeng uhen,
ajeh chu setnan alungsungu chennan anei tan ahi.
16 Ahinlah keiman ka Pathen kakou ding,
chuleh ka Pakaijin eihuhdoh ding ahi.
17 Jingkah, sun, nilhah in
kalung hesoh jeh in kakap in ahileh,
Pakaijin ka-o eijah peh tai.
18 Mi tamtah in eidou jing hen lang,
kei dounan gal kisat choh jeju jeng jongleh,
Pakaijin eilhatdoh in ol-heuvin eium sah tai.
19 Tonsot a vaihom jing Pathen chun,
ka taona sang intin ka dougalte asuhnem ding ahi.
Selah
Ajeh chu ama hon achondan'u akhelnom pouvin;
Pathen jong aging pouve.
20 Keima kiloipi pan vang, aloi ho alhem lhan;
akitepna asukeh in ahi.
21 Athucheng chu thaotwi bangin analjet in;
hinlah asung uva gal lungthim apu uve.
Athucheng'u thaotwi nang abangin,
hinlah asunglang uvah chemjam ngen aum'e!
22 Na pohgih chu Pakai chung'a seplha tan,
Aman na ngaijang peh nante.
Aman mi chonpha ho chu akipalsah louding lhuh jong alhuhsah louding ahi.
23 Nang vang, O Pathen, migilou ho chu
lhuhna kokhuh a nasot lhah ding ahi.
Tolthat ho le jonpan ho jong khangdong cha a na thisah ding,
hinla keiman vang eihuhhing din nang jeng ka tahsan e.