56
David In Agal Mite Akichat, Hinlah Pathen Tahsan'a Tao.
Philistine ten Gath mun a amudoh nung uva La Lamkaipa henga David labol.
1 O Pathen, na mikhoto nan neipui jing'in,
ajeh chu mipi ten eidel jing uve.
Eidou hon nilhumkei keijin eidelkhum jing'un ahi.
2 Eihouse hon jong phat tinin eidel jing'un,
chuleh mi tamtah in eidelkhum jing'un ahi.
3 Ahinlah ka kichat teng,
nangma tahsanna a chun kalut jitan ahi.
4 Aman kaheng'a kitepna anei jeh in Pakai chu ka thangvah e.
Pathen tahsana a ka dindet jing le kei ipi dinga ka kichat ding ham?
Hiche mihem chun i-eilo thei ding ham?
5 Ama hon ka thusei jouse ahilou lamin alauvin;
kei suhsetna dingin anikho hou jong amang jingui.
6 Amaho ahung'un eihung velhi uvin—
keima eitha theina diuvin ka chaloh ka sinsah avelhi jing'un ahi.
7 Achonset pum'un jammang sah hihbeh in;
na lungsatna achun, O Pathen, amaho chu sumang jengin.
8 Nang'in ka thohgimna nei hetpeh jing nan ahi.
Nang'in ka lengvaina mitlhi hi khon a nakhol khom e.
Chuleh abonchan na lekhabua na jihlut e.
9 Keiman nangma eikithopi dinga kakou tengleh kagal mite jammang tauvinte.
Hijeh a chu keiman Pathen hi keima lang'a pang ahi ti kahet jingna ahi!
10 Pathen'in kakom'a kitepna anei jeh in keiman Pathen ka thangvah e;
henge, Pathen'in kaheng'a kitepna anei jeh a Pakai ka thangvah ahi.
11 Keiman Pathen ka tahsanna a hi kadin jing le ipi dinga ka kichat ding ham?
Mihem hon i-eilo diu ham?
12 O Pathen, nang kom'a ka kitepna keiman subulhit ingting,
chutengleh kilhaina in thangvahna peng kate.
13 Ajeh chu nang'in ka thina dinga kon'in nei huhdoh tan;
kaki selhuh louna din nangin kakeng nei tuhpeh tai.
Hijeh chun, O Pathen, tun na angsunga hinna vah
na pehna mun a chun hung lut thei tange.