63
David Lhagaova Dangchah, Pathen'in Adang Anousah.
Judah gamthip noiya aum laiya David labol.
1 O Pathen, nang bou ka Pathen nahi;
ken lunggil tah in nang kahol e.
Ka lhagaovin na dangchah in;
twi veilouna mun gotna
gamgo ahin ka tahsa pumpin
nang kahin lhangai e.
2 Na mun theng'a kon'in ka hin mun
na loupina leh na thaneina chu kahin mun ahi.
3 Na mingailutna longlou chu mihem hinkho ma-ma sanga phajo ahi;
nang kahin thangvah chim theipoi!
4 Hinkho kanei laisen nangma thangvah ing kating,
na henga taonan ka khut teni hin domsang ing kate.
5 An tuipen kaneh sang'in nang'in neihin lung lhaisah jon.
Kipah tah in nangma thangvah nan la sang'e.
6 Ka lupna mun a limgeh chan nang kagel geljin,
jan teng jongleh nangma lunggel ho kangaito ji e.
7 Nangma eikithopi nahi jeh in,
na lhaving lim noiyah kipah tah in vahchoila kasan ahi.
8 Naban thahat tah jet langin dettah in neituh in ahileh;
keiman nang ka tuhchah in ahi.
9 Keima eisumang go ho chu hung mangthah diu ahi.
Amaho chu leikotong athuhlai pen a chu lhalut ding ahiuve.
10 Amaho chu chemjam a thi diu
sial ho anchah a pang diu ahi.
11 Ahinla lengpa chu Pathen a kipah ding ahi.
Koi hileh Ama tahsan chan chun athangvah ding,
mijou ho vang suhthip a um diu ahi.