62
Pathen Bou Kiselna Detpen Ahi.
La lamkaipa Jeduthun henga David labol.
1 Pathen anga thipbeh chan ka ngah e,
ajeh chu Ama a kon'a ka galjona hung kipanji ahi.
2 Ama bou hi ka songpi le ka kihuhhingna ahin,
long louhel'a kaum theina ka kingaina kulpi ahi.
3 Mi khat seh dou ding melma tamtah ahiuvin—-
abon'un keima eithat gouve.
Amaho ding hin keima hi bang chimsa le
tho kigen achimsa tobang kahi bouve.
4 Ama hon mun sanga konin sotlhah ding eigouve.
Ka chung changa jou thusei athanom'un ahi.
Ama hon ka masanga eipahcha uvin
alungsung uvah eigaosap un ahi.
Selah
5 Keiman kahina jouse pum'in Pathen angsung a thipbeh chan kangah e,
ajeh chu ama a hin ka kinepna aum jing e.
6 Ama bou hi ka sochatna leh ka kulpi chuleh ka songpi ahin,
keima sotling hoi kahi tah louding ahitai.
7 Ka galjona leh ka minphatna Pathen a kon jeng bou ahi.
Ama hi ka kiselna le ka songpi ahin, ka melma hon eihin maiphah lou diu ahi.
8 O ka mite, phat tinin Ama bou tahsan jingin.
Na lungthim a na pohgih ama chuga sung lhan,
ajeh chu Ama hi ikiselnau ahi.
Selah
9 Milham ho hi haina hu khat hui bap a phachom lou ahi bou uve,
chule mi thahat ho jong alim uva amelsou toh akibang deh pouve.
Amaho khu lepton lang vele chun
haina hu khat sanga jong jangjo ahi bou uve.
10 Nangin na inchen na hinkho hi
hunam a lah le guhchat in kivah hih in.
Na nei na gou ahung punbe a ahijongleh,
hiche a chun kisong hih in.
11 Pathen'in ol heuvin thu aseijin,
hichu keiman phat tinin kana jajin ahi.
O Pathen, thaneina jouse hi, nanga ahi.
12 O Pakai, ngailutna longlou hi, nanga ahi.
Tahbeh in nangin mijouse hi
atoh dungjui cheh a na lethuh ahi.