65
Pathen Hongphalna Jeh A David In Avahchoi.
La lamkaipa henga David labol.
1 O Pathen, vahchoina thupi tah chu
Zion'a um nang'a dinga ahi.
Keihon nang kom'a ka kitep nau chu ka molso diu ahi.
2 Ajeh chu nang'in katao nau na sang'e.
Kabon chauva nang kom'a ka hung diu ahi.
3 Ka chonset nauvin eilonvuh jong leu,
nang'in abonchan na ngaidam sohkei tan ahi.
4 Na muntheng a um,
nang kom nai ding go ho iti akipa tadiuvem.
Na Hou-Intheng sung a chu
itobang kipana golnop in eingau hitam.
5 Ka taona hou natoh hoitah in nei donbut peh uve,
O Pathen, eihuhing pau.
Nangma hi leiset mite jouse kinepna nahin,
gamla tah twikhanglen chung'a kongtol ho geijin nang chunga kinepna anei u ahi.
6 Thahatna thupitah a nakivon a
na thahatna a mol le lhang jong hi nasem ahi.
7 Twikhanglen kinong le kitum jong hi na suthip in
chuleh namtin vaipi kithong lellul jong
na suthip tan ahi.
8 Leiset chung kolmong geiya cheng hon jong
na kidanna hi adatmo uvin ahi.
Nisa sona langa pat nilhumna mun geiya umho jong,
kipah a asaple diuva na tildoh ahitai.
9 Leiset hi na gelkhoh in gon nachap nouvin,
leithao leh leipha na sodoh sah in ahi.
Pathen vadung achun twi nengchet in aum in;
hichun louga chang le mim aput sah e,
ajeh chu hiti dinga nangman natepsa ahitai.
10 Lou kikhoiho gotwi in nachap kot jin,
leilhang ho na sunangin changkongho jong na kibahsah e.
Gotwi in leiset na noudoh sah in
hiti chun chang le mim nengchet a aumna din phatthei naboh in ahi.
11 Kumlhung keiya neh le chah ding nengchet in na gongtoh in;
leitah lah jeng jong lei phatah naso sah tai.
12 Gam golai gammang jeng jong hamhing dongset lah asohdoh in,
molpang jeng jong kipah tah in apahlha jengin ahi.
13 Hamhing lah a kelngoi hon adimset un,
chule phaicham ho jong chang le mim adimlha jeng tai.
Hiho jousen thong jejun asam'un kipa la asauve!