66
Pathen Natoh Thilbol Kidang Ho.
La lamkaipa heng'a la kisem.
1 Leiset mite jousen Pathen vahchoi cheh uhen!
2 Amin loupi chu vahchoilan sauhen!
Aloupina hi vannoiya sei leuvin.
3 Pathen henga seijin, “Na thilbol ho hi iti hoia lamdang hitam!
Na melmate jeng jong na thaneina thupitah masanga akun jeng uve.
4 Leiset chung thil jouse jong na angsunga dilsu cheh untin;
na thangvahna la asah diu,
namin hi thong jen-jun a asah diu ahi.”
Selah
5 Hungin lang ven Pathen'in ipi atohdoh hitam,
mipite dia itobang thil kidang atohdoh hitam!
6 Aman Twipi San a jong lam golai asemin,
chule amite chu akeng uva ache galkai ui.
Hiche achun eiho Ama ah ikipah un ahi.
7 Ajeh chu Aman athahatna thupitah a chun tonsot in vai ahom e.
Aman namtin vaipi chaloh sinsah abon chan avelhi sohkei jin;
koimacha Ama dounan hung konda jeng hen.
Selah
8 Vannoi leiset mihem jousen I-Pathen'u thangvah cheh uhenlang
avahchoina la choh jejun sauhen.
9 Ihinkhou hi Ama khut a um ahin,
Aman ikipal louna diuva ikengu eituhpeh u ahi.
10 O Pathen, nei patep tauve;
dangka bangin nei suhtheng tauvin ahi.
11 Na thangkol a neimat u ahitan
chuleh ka tungtun uva soh channa pohgih chu neipoh sah u ahitai.
12 Ka chung uvah midang ho na vaihom sah e.
Hiti chun keiho meilhum leh twisoh lah neipal galkai sah uvin,
hinla neh ding nenna mun a nei puilut tauvin ahi.
13 Tun na henga kakitepna subulhit din
pumgo thilto pumin na Hou-In kahin jon e—
14 henge, lunggim le ka khoisat nikho hoa
nakom'a kitepna kana nei chu ahi.
15 Hijeh a chu keiman kanei ho lah a—
ka kelngoichal ho hi namtui pen ding le,
ka bongchal ho le ka keltahchal ho pumgo thilto a kahin todoh ahitai.
Selah
16 Pathen gin le jana nei jouse hungun lang ngaiyun,
Pakaijin ipi eibolpeh am na seipeh ung kate.
17 Ajeh chu keiman Ama thangvah pumin,
panpi thum nan ka taovin ahi.
18 Keiman ka lunsunga um ka chonset phongdoh lou hileng,
Pakaijin ka taona eingaipeh louding ahi.
19 Hinla Pathen'in eingaipeh e!
Aman khohsah tah in ka taona eingai peh in ahi.
20 Ka taona eigelkhoh peh jeh le ami ngailutna longlou keiya kon a
eilahdoh peh lou jeh in Pathen chu thangvah in umhen.