76
Pathen Bou Gin Ding Ahi.
La lamkaipa henga tumging toh tho dia Asaph labol.
1 Judah a Pathen hi akijabol in;
Israel a Amin hi aloupin ahi.
2 Jerusalem hi achenna ahin;
Zion Mol chu a inn ahi.
3 Hichea chun agal mite meikong tobang thalchang chu asubong in,
a ompho ule achemjam hou chuleh agal manchah jouseu jong asuhchip peh in ahi.
Selah
4 Nangma hi tonsot a um jing mol ho sang'in jong
naloupi in na lamdang deh e.
5 Eidou u galmi hangpen ho jouse jong akisugep gam tauve.
A imumil bangin ka masang uvah akijamdel tauve.
Galmi koiman ka masang uva akhut u alap ngapchat lou diu ahitai.
6 O Jacob Pathen, nakam sunga na haina hu chu ahung gindoh chun,
asakol jouseu leh akangtalai jouseu akolchah sah soh jengin ahi.
7 Nangma hitobang tah a gin le ja naum hi datmo ding ahipoi!
Ajeh chu na lunghan ahung deujah leh koi ham na anga ding ngam ding'ah?
8 Van'a kon'in nagal mite chunga thu nahin tanin;
leiset hi akithingin na angsung'ah adingin ahi.
9 O Pathen, nangma na dingdoh in mi engse te thu natanin,
chule leiset a bol gentheiya umte na huhdoh jin ahi.
Selah
10 Mihem te hi nangma doumah a achon teng hichu na loupi kilandohna ahijon ahi,
ajeh chu hiche chu nangma manchah a pang bepji ahi.
11 Pakai na Pathen, henga kitepna neijin lang hichu nit in.
Mijousen Kichat Umtah Pa kom'a peh dingdol hinpe cheh hen.
12 Ajeh chu Aman leng chate kiletsahna avochip in,
leiset a leng hon jong Ama gin le jana aneiyun ahi.