15
Absalom Phatlouna
1 Hiti ho jouse kichai nung hin, Absalom chun kangtalai khat akisem’in, sakol akai ding ho jong akigot toh sohkeiyin, chule amasanga lhaidin pasal cheh mi som nga akilhen doh tai.
2 Absalom hi jingkah seh jingpi tah in athou jin, kelkot lampi geiya chun ading jin ahi; hiti chun mihem khat tou lengpa kom'a mi hehna ding thu aneiya, athu tan sah ding ahung tengleh, hitobang miho chu Absalom'in akoujin ana dong ji'e, “Hoilai khopi pen a konna hung nahim?” tia adoh le mihem pan jong, aphung min aseipeh ding ahi.
3 Hiteng chule Absalom in aseipeh kitjin, “Nangman thu nasatah nahin polut e! Chule hiche hi aphamo lheh jenge lengpan hichu ngai din koima aneipon ahi.
4 Chujongleh Absalom chun aseikit in, “O kadeh, keima hi gamsunga thutan vaihom a pang ana hileng, mijousen achungthu u keikom'a tan dia ahin pohlut diu, chule keiman thudihtah a katan peh diu ahi!” ati.
5 Hitia chu ama angsunga bohkhup dia mi ahung tengleh Absalom chu anomji pon hisang chun aman hitobang miho chu akhut in atuh chah jeng jin, achop jin ahi.
6 Hitobang hin lengpa kom'a athu kikhol a kitan sah dinga hungji Israel mi tapou chu Absalom'in anabol jing jin ahi; hiche a kon hin Absalom in Israel mipi jouse lungthim abonchan athunun sohhel tai.
7 Chule kumli alhin jouvin Absalom in lengpa kom'a chun aseijin, “Lungset tah in neisol inlang keima Hebron khopia khun cheng ting Pakaiya kilhaina gasem ingting chule keiman ama toh kitepna kasem chu gabulhit tange, ati..
8 Ijeh-inem itileh na lhachapa keima Geshur gamsung Aram a kachen lai chun kitepna khat kanabol’in hitin kana seiye, ‘Pakaijin Jerusalem'a einung puilut kit pou-pouva ahileh keiman Pakai kom'a kilhaina kabol'a chibai kaboh ding ahi,’ tin kana seiye,” ati.
9 Hichun lengpan jong aseipeh in,“Aphai, chenlang nakitepna chu gamolso tan,” ati. Hijeh chun Absalom jong akipatdoh paijin Hebron achetai.
10 Ahinla Absalom chun guhthim chan Israel phung jouse kom'a sottolle miho ana sol'a hitia hi ana seisa ahi, “Nanghon saki pengkul kimut ging najah pou-pou uva ahileh, ‘Hebron khopia Absalom aleng chang tai,’ tia nasei diu ahi,” tin ana hil masa tan ahi.
11 Mihem jani Jerusalem khopia kon'in Absalom chutoh akilhon uvin, ahin amaho chun Absalom lunggel ngaito imacha ahepouvin ahi.
12 Absalom'in kilhaina gantha ima abol laiyin, Giloh mi Ahithophel kitipa, David dinga lungthima kithopi phatah mipa chun mi asol’in achenna Giloh khopia kon'in aga kousah tai. Chule Absalom in thilse abol'a lengpa adouna chu akhang tul-tul jengin, mipin jong Absalom ajop be-be jeng tauve.
Jerusalem Akon David Akiseldoh
13 Hijeh chun sottolle mi khat chu David kom'a ahungin hitin ahung seiye, “Israel miten alungthim uvin Absalom nung ajui gam tauve,” ati.
14 Chuphat in David jong chun Jerusalem khopia aumkhompi amite hengah hitin aseitai, “Khatvei jam a ibonchauva ijam diu ahitai, akhuti louleh ivaigei diu ahitai. Kino loi ute! Absalom ahung lhun masanga khopi sunga kon ipotdoh ule, eiho ihiuvin chule Jerusalem khopi sung jong toset akon hoidoh thei ding ahi, ati.
15 Hichun David lengpa kithopi hon jong ama chu adonbut un, keiho nangma toh kaum jing nauve, hijeh chun nangman aphapen ahi tia nagel chu bol tan atiuve.
16 Hijeh chun lengpa jong akipatdoh pai paiyin a insung mite jouse jong anunga akitol tauve. Chule lengpan in ngah dinga thaikem numei som adalhah tilou koimacha adalha pon ahi.
17 Hitia lengpa apotdoh jeng phat in mipin anung ajui cheh tauvin ahi; acheu chun khopi ning langa veng pam nunung pentah a in khat a aki ngauvin ahi.
18 Chule lengpa lhacha ho jousen ama akhel sohkei uvin ahi. Gath khoa kipat a David nung hinjui ho chu mi 600 ahiuvin amaho cheng chu lengpa vengbit a umho toh hung kilhon ahiuvin ahi.
19 David lengpa chu akihei in Gath mite lah a lamkai Ittai kom achun asei tan ahi, “Ipi dinga nangma keiho to nakilhon ham? Chule nangma kinunglen lang Absalom lengpa kom gaum tan, ajeh chu nangma gamchom mi nahin, among monga jong na ina konna hikom'a sohchanga hung khopem nahi bouve.
20 Chujongleh nangma janhia hunglhung bep a hoilam kajot ding chule hoilam a kache ding bon kihe louva iti tunia ken nangma keiho banga ka genthei sah ding ham? Kile kittan, chule nasoh teu kipuiyin lang kile kit mong-mong tan; chule Pakaijin ami ngailutna le akitahna na musah jing hen,” ati.
21 Ahinla Ittai chun lengpa chu adonbut in, “Pakai hingjing min le kapu lengpa hinlai pet a kasei ahi, kapu lengpa chuh chuhna a thina ding mun hihen, hinna ding mun hijongleh, nache chena a chu nasohpa kei jong kahung jeng ding ahi bouve,” ati.
22 Chuphat in David jong chun adonbut in, “Akhuti le aphai hungun chekhom ute,” atileh Ittai jong ache masan, amite chengse le akilhonpi nunao chapang jouse chutoh akitol tauve.
23 Mipi chutia akitol jeng phat uvin gamsung pumpi chu othong jejun akap tauve; chule lengpa jong achen Kidron lui agalkai tai, hiti hin mipi abonchauvin gamsung lam jonin akitoldoh tauvin ahi.
24 Chule Zadok jong Levi te se-se jong ahiuvin, Pathen Kitepna Thongkong chu ahinpu uvin ahi; chuin mipi aboncha khopi akhokhel kah seuvin Abiathar in jong Pathen hengah kilhaina abollin Pathen Thingkhong chu tol'a angauvin ahi.
25 Hichun lengpan jong Zadok kom'a chun hitin aseiye, “Pathen Thingkhong hi khopi sunga polut kit tan. Ajeh chu Pakayin avet a eilungset a ahileh eihin puikit intin, hiche Thingkhong le achenna mun hi eimusah kit tei-tei ding ahi.
26 Amavang Pakaijin, ‘Nachunga kalung alhaipoi,’ tia aseiya ahileh, keima hikom'a kaum jinge, aman aphatsah lam-lamin eibol jeng hen,” ati.
27 Chule lengpan Zadok thempupa kom'a hitin jong aseiye, “Ven, hiche hi kalungtup ahi. Nang le Abiathar chule na chapa teni lhon Ahimaaz le Abiathar chapa Jonathan chutoh thipchet in khopi lam kinungle tauvin.
28 Chule keima Jordan vadunga kana kingah ding nang hon thu neihung hetsah kah seuva kana nga-nga jeng ding ahi,” ati.
29 Hijeh chun Zadok le Abiathar chun Pathen Thingkhong chu Jerusalem khopi sunga anung pohlut kit lhon'in, chule khopi sunga aumden lhon tan ahi.
30 Ahin David vang chu Olive thinglhang vum lama akaltou in, alamjot pum pumin akap peh jengin, chule akeng keovin lam ajot in, ponlu akikhuh in ahi. Chujongleh akilhonpi mipi jong chun abonchauvin ponlu akikhuh sohkeiyun, akitol tou paiyun, chule mipi jouse jong chun kap pum pumin lam ajot un ahi.
31 Hichun mihon David kom'a thuguh ahung seipeh un hitin asei uve, “Ahithophel jong lengpa doumah bol miho lah a apangin, chule Absalom toh aki thokhom e,” ahung tipeh uve. Chuphat in David jong chun hitin aseiye, “Vo Pakai, Ahithophel lungthim ngaito jouse chu ngolnan heidoh peh tan, tia katao ahi,” ati.
32 Hichun Pathen kihouna mun molvum asang lai a chu David ahung kaldoh phat in vetan, David golpa Arka mi Hushai kitipa chu a sangkhol chol kibottel san alujang a leivui akinun David lamto din ahung e.
33 Hichun David jong chun Hushai kom'a hitin aseiye, “Nangman nei kilhonpi le chun kei dinga nohphah sah hibep ding ahi.
34 Chusangin nangma Jerusalem khopi sunga lut inlang Absalom kom'a chun, ‘Vo lengpa, masang laiya napa lhacha a kapan bang chun, tunjong keima hi nangma lhachan nei pansah tan,’ gatin; chuti chun pang thei lechun nangman Ahithophel kitipa lunggel ngaito chu nasuh lhah thei ding ahi.
35 Khosunga khu Zadok le Abiathar thempu teni chun nangma napanpi loudinga nagel ham? Hiti hin gabol inlang, ipi pi hijongleh nangman lengpa insunga kaseidoh najah chan chu Zadok le Abiathar thempu teni kom'a hin seisonji jin ati.
36 Chule ipipi thil um hitam ti hetna dia chu achapa teni lhon Ahimaaz le Jonathan chu ahinsol ji-ji lhon ding ahi.
37 Hijeh chun David golpa Hushai chu Abalom Jerusalem khopi sunga ahung lut pet tah chun ama jong khopi sunga ahung lut in ahi.