16
David Le Ziba
1 Hichun David in molsang ijat hamkhat alep nungin Mephibosheth sohpa Ziba in Sangan ni apot poh ding to kikansa le changlhah pheng 200, lengpi theiga boh 100, nipi lai theiga jat 100, chule lengpitwi savun bom dim set khat toh ana lamton ahi.
2 Hichun David lengpan Ziba chu hitin ana dongin, “Ipi dinga thil hijatpi hi nahin poh hitam?” atileh;
Ziban jong adonbut in, “Sangan teni hi lengpa insung mite touna ding ahin, chule changlhah le nipi lai theiga hi sepai te neh ding ahin; chutengleh lengpitwi hi gamthip laiya dangchah a thachol ho don ding ahi,” ati.
3 Chuphat in David lengpan adongpai in, “Napu tupa Mephibosheth chu hoiya ba um hitam?” atia ahileh; Ziba'n lengpa kom'a chun hitin asei e, “Vetan, ama chu tuni geijin Jerusalem'a aum jing nalaiye, chule keiman tunia hi kapupa Saul lenggam chu kale lah ding ahi,” ati.
4 Chuin Ziba kom'a chun lengpan aseikit in, “Ven, Mephibosheth thil le lo jouse chu aboncha tua hi nang na chan ding ahitai,” atipeh e.
Chutah chun Ziba'n jong asei pai jengin, “Keiman nang kaja bol nahi, neimu chanin kachunga lunglhai jing jengin, kapu lengpa,” ati.
Shimei In David Agaosap
5 Chule David chun Bahurim kho ahin phah phat in Saul insungmi pasal khat ahung potdoh in, ama chu amin Shimei ahin, Gera chapa ahi; ahung potdoh in alamjot toh gaosap ahinkop in ahi.
6 Chujongleh song alan David ahin, asepai jalamte ahin, chule ajet avei a mihat kigol ho jouse jong chu songin asep tan ahi.
7 Hiti chun ami gaosap pum-pum'in Shimei chun asei in, “Chemang loiyin, chemang loiyin nangma thisanso hat le hindan helou mi nahi tin David henglam a chun asam tan ahi.
8 Pakaijin Saul insung mite thisan chu na chunga ahinle lhunsah ahitai. Nangman ama lenggam chu na-na guh ahin, chule tua hi Pakaijin nachapa Absalom khut a apehdoh ahitai. Nangma thisan sohat nahijeh a , na themmona chu nachung ma-ma chu ahitai!” ati
9 Chuphat in Zeruiah chapa Abishai chun lengpa kom'a hitin asei e, “Ipi dinga hiche uithisa hin kapu lengpa hitia agao sap-sap jeng ham? Neisol inlang alol gatan inge,” atileh;
10 Lengpan jong aphoh in, “Zeruiah chapa te nangho kon nadoh beh uvem! Pakaijin ajah a aseipeh a kei hi gaosap in atileh, nang koi nahija ama chu nakham ding ham?” ati.
11 Chujongleh David chun Abishai le asohte jouse kom'a hitin asei e, “Vetan, keima chapa mong-mong in bon tha dinga eihol'a ahileh, hiche Saul sopipa hin iti abolda thei ding ham! Hijeh chun don dauvin lang gaosap sah-sah jeng tauvin; ajeh chu Pakaijin bollin tia aseipeh ahi.
12 Ijem itileh Pakaijin ka genthei hesohna hi eivet peh in tin, tunia eiki gaosapna jeh a Pakaijin keima dinga thilpha eibol peh thei joh ding ahi,” ati.
13 Chuti chun David le amite chu lampia achepeh uvin, Shimei jong chu David chutoh kigal mupeh in thinglhang jui juiya ache peh in agaosap sap jeng e; chule amaho chun David chu song le lei vui in jong asep uvin ahi.
14 Chuin David lengpa le alhonpi mipi ho chu abonchauvin athachol lheh tauvin hichun Jordan vadung agei un abon uvin akichol un ahi.
Ahithophel In Absalom Ahil
15 Chutah chun Absalom le Israel mite jouse jong chu Jerusalem a ahung uvin, Ahithophel kitipa chun Absalom ahin lhon pin ahi.
16 Chuin David golpa Hushai Arka mipa chu ahung lhun lhunin Absalom kom'a ache paijin, ‘Hingsot in lengpa, lengpa hingsot in! tin ahin sam tai.
17 Chutah chun Absalom in jong Hushai kom'a chun hitin asei e, “Hitia hi na golpa David chu nabol mong ding ham? Iti dan a ama toh ding khom lou nahim?” tin adong tai.
18 Ahin Hushai chun Absalom kom'a asei kit in, “Ahipoi, koi-koi hijeng jongleh Pakai le hiche Israel miten abonchauva alhen doh pen-pen chu kei jong ama a chu kahi jengin, ama chutoh keima kalhat khom jing ding ahi bouve,” ati.
19 “Chujongleh keiman koi dang kin kabol ding ham? Lengpa chapa kin bol'a kapan tei-tei ding hilou ham? Keiman napa na kana toh bang-bang a tua nangma na jong katoh ding ahi,” atitai.
20 Hichun Absalom chun Ahithophel adongin, “Nalung gel temin, ipi aban kabol ding hitam?” ati.
21 Hichun Ahithophel jong chun Absalom aseipeh in, “Napan in ngah dinga adalhah athaikem ho kom'a khun galut inlang galup pin; chutileh Israel pumpin nangma hi napa doumah lamtah a kisa nahitai, ti hin jadoh uvin tin, chutile ama hon nangma nahin jop sohkei diu ahi,” atipeh e.
22 Hichun mihon Absalom dingin inchungah ponbuh ason peh un, chuin Absalom chu Israel mite pumpi mitmu laitah in apa thaikem ho kom'a alut jengin aluppi tan ahi.
23 Hiche lai a Ahithophel kitipan mi athumop tapou chu Pathen kamcheng tah a hungsoh banga ana gel u ahi hitobang jeh a hi Absalom in Ahithophel thumop chu David in anabol banga anajui ahi.