17
1 Tun Ahithophel in Absalom kom'a hitin angeh tan ahi, “Tujan ma-ma David nung del pai din keiman Sepai 12,000 kilhen doh inge.
2 Keiman David chu athachol pet tah le akingaiset pet tah a kaga mat ding ahi. Chule ama le a sepai te jouse kasuh kichat ding chuteng mijouse jammang soh ding chuteng keiman lengpa bou katha ding ahi.
3 Mipi ho vang chu abonchauva kahin puilut ding, mou thah akichenpi ding pa henga hung kipuilut banga inlam a kahin puilut ding ahi bouve; chule nangman mikhat seh bou tha dinga nahol ahin, chutengleh mipi vang chu lungmong tah a um diu ahitai,” ati.
4 Athusei hin Absalom alunglhai sah lheh jengin, chule Israel chunga lamkai ho jouse jong abonchauvin alung lhaisah sohhel tan ahi.
Hushai In Ahithophel Thumop Akimaitopi
5 Chuphat in Absalom chun hitin aseiye, “Arka mi Hushai chu hin puilut uvin, aman ipi agel a asei em, ngai uhite,” ati.
6 Hichun Hushai chu Absalom kom ahin puilut tauvin chuin Absalom'in Ahithophel thusei chu Hushai aseipeh tan ahi. Chuin aman adongin, nangma lunggel ipi ham? Hinsei in ahilouleh Ahithophel thumop hi ijui jing diu hitam? Ahilouleh ipi na thumop nom em?” ati.
7 Hijeh chun Hushai jong chun Absalom kom'a chun asei paiyin, “Tuchunga Ahithophel mihilna hi thilpha ahipoi,” ati tai.
8 Hichun Hushai chun aseibe kit nalai e, “Napa ahin amite ahiuvin mihat ahi, ti nangman jong na hetsa ahi; chujongleh amaho hi akiphin lunghangsa ahiuvin, gamlah a anou kilahpeh savompi tobang ahiuve. Hiche tilou jong hin napa chu galbol them tah mi ana hikit e. Hijeh chun ama hi mipi ho toh geh khom louhel ding ahi, ati.
9 Tu jenga jong achang seh a kokhuh dung khat a kisel ham, ahilouleh mun chom dang khat a kisel ding ahitai. Chule ama ahungdoh a nahin bulu tengu leh na mite themkhat chu hung thi tei ding, chuteng na sepai te chunga tijatna le kichatna hunglhung ding, chule hitia hi Absalom mite chu akithat tai tia thu hung kithang ding ahi.
10 Chutengleh gal-hang miho lungput sakei bahkai lungput tobang jeng ho jong chu kicha a hung lung lhadai gam diu ahi; ajeh chu napa chu mihat tah ahin, apanpi miho jong chu gal-hang mi jeng ahiuve, tihi Israel pumpin ahin hetdoh ding ahi.
11 Hijongleh keima lunggel vang ahileh, Israel chate pumpi hi sahlam Dan gam apat lhanglam Beersheba geijin nangma kom'a hung kikhom sohkei uhen lang, twikhanglen panga neldi jat aphah teng uleh nangma tah in mijouse chu lamkai lechun kati ahi.
12 Chuti henlang hileh eihon David chu imuteng uleh achunga ichuh cheh uva, tol'a daitwi alhah bang banga achunga ikibuh lhah cheh diu ahi. Khuti henlang hile ama ahin apanpi miho jouse puma khat a khat jeng cha jong ahingdoh umlou diu ahi.
13 Chule ijem tin David chu khosung dung khat a jamlut jongleh, Israel pumpin khao kipat sohkeijin tin, chule akhopi chu kikai manghel intin, song halsi khat geiya jong kidalha louding ahi,” ati.
14 Chuphat in Absalom le Israel miten abonchauvin aseiyun, “Arka mi Hushai thumop hi Ahithophel thumop sangin aphajoi,” ati tauve. Ijeh-inem itileh Pakaijin Absalom chunga thilse aso sah nom jeh a Ahithophel lunggel phatah chu suh lhahna dinga tohgon ana neisa ahitan ahi.
Hushai In David Kiseldoh Dia Aseipeh
15 Hichun Hushai chun thempu teni Zadok le Abiathar chu aseipeh in, “Hitobang hin chule hiti hin Ahithophel chun Absalom le Israel upaho ahilchah tai; hichun keiman jong hitobang hin kahil guh kit in ahi, atitai.
16 Hijeh chun tun mi sol loi lhon'in lang David kom'a gasei sah lhon'in, ajeh chu ‘Tujan hin gamthip noi palmun dunga ana geh hihbeh in, iti nama jongleh ana galkai pai tei-teijin; achuti louva ahileh lengpa David le akilhonpi mite chu abonchauva min athagam hel diu ahitai,’ tin gasei sah lhon tan,” ati.
17 Jonathan le Ahimaaz chun En-rogel mun a chu anga jing ji lhona, soh numei khat che a amani chu thu aga pehji ahi; chutengleh amani chepai kitji lhon a David lengpa aga seipeh ji-ji lhon ahi; Ijeh-inem itileh amani hi khopi sung ahung lutji lhon le apotji lhon hi koima chan amu louhelna dinga umlhon ahi.
18 Ahin gollhang khat chun amani hi amudoh tan, hi chun gollhang pa chu achen Absalom kom'a aga seipeh tai; hijeh chun amani jong kinloi tah in achemang loi lhon'in, Bahurim khoa pasal khat insunga ahunglut lhon'in ahileh, amapa hin a invel'a chun twikul khat aneiye; hijeh chun amani jong twikul sunga chun alut lhon'in akisel lhon tai.
19 Hichun numei khat hin twikul kam sinna ding khat alan, akama chun aphan, achunga chun chang aphou khumin ahileh imacha aum lam akihedoh tapon ahi.
20 Hichun Absalom sepai te chu hiche inmun a numeinu kom ahung phat uvin ama hon jong, “Ahimaaz le Jonathan chu hoilam a um lhon tam?” tia adoh uleh, numeinun jong ajah uva aseipeh in, “Amani chu twidung khu galkai lhon tante” atipeh e. Amaho chun agahol uvin amudoh joulou phat uvin Jerusalem lama ahung kinungle kit tauve.
21 Hichun amaho ache phat uvin Ahimaaz leh Jonathan chu twikul sunga kon'in ahung potdoh lhon'in, achepai pai lhon'in David lengpa aga seipeh lhon tan ahi. Amani hin David kom'a hitin asei lhon e, “Kipatdoh loijin, Jordan vadung galkai loitan!” ati. Ajeh chu hitobang bang hin Ahithophel chun nang dounan lunggel phalou lou mi ahil tai,” agati lhon e.
22 Chuphat in David jong akipatdoh pai-paijin, ama lhonpi mipi chutoh akilhon'in Jordan vadung agalkai tauve; chule khovah lhah phat in Jordan vadung galkai loulai khat cha aum tapouve.
23 Ahithophel hin athumop chu koiman alahpeh lou amu doh phat chun sangan chunga touna akiphan, akhopi ainlam a achetai. Chuin aman ain alou asutoh sohkeiyin, chujouvin ama le ama akikhailih tai. Chuin mihon ama hi apa lhankhuh ma-man avui tauve.
24 David chu Mahanaim kiti laiya chun ahungin ahi. Absalom jong chun Jordan vadung ahinpal galkai in ama ahin Israel chate abonchauvin ahung tauve.
25 Absalom hin Joab khel’in asepai te lamkai din Amasa kitipa chu ana pansah tan ahi. (Amasa kitipa hi Ishmael mi pasal khat amin Jether kitipa chapa ahin, Jether hin Joab nu, Zeru’iah sopinu Nahash kitinu chanu Abigail chu akichen pin ahi.)
26 Chuin Israel chate leh Absalom hin Gilead gamsung a ngahmun asem tauvin ahi.
27 David chu Mahanaim ahung lhun phat in, Ammon mite kho Rabbah a kon'in Nahash chapa Shobi le Lodebar khoa konna Ammiel chapa Makir toh, chule Rogelim khoa konna Gilead mi Barzillai chutoh ahungun ahi.
28 Chuin lupna jalkhun phabep le kisilna kong ho, leibel phabep toh, suhlou chang le sakol chang, neh ding an, chule changpol kansa, louthul le bekan ahin pouvin ahi.
29 Chujongleh khoiju le bongnoiha ahin, kelngoi jong, bongnoi thao jong David le alhonpi miho neh ding chun ahinpo uve; ijeh-inem itileh amaho hin asei uvin, “David le aloite mipi hi gamthip laiya gilkel uva tha lhasam tah a umah ahi tauve,” atiuvin ahi.