19
Joab In Lengpa Apho
1 Joab kom'a chun, “Lengpa David chun Absalom pul adoulel in akap-kap jeng tai,” tithu agalhung tan ahi.
2 Hijeh chun hiche nikhoa gal kijo chu mipi abonchauva din pul douna asohdoh jotan ahi. Ijeh-inem itileh hiche nikho hin mipin abonchan ajauvin, “Lengpan achapa thi pul adoulel lheh jenge,” akiti tai.
3 Sepai te jong chu hiche nikho hin guhthim chan khopi sunga ahung kijotlut uvin, gal alel niuva jachat thoh a hung vahlut bangin ahung lut tauve.
4 Hichun lengpan amai akhut in akikhun, othongje jun lengpa akapjah jengin, “Vo Absalom, kachapa, kachapa!” atin asam-sam jeng’e.
5 Hichun Joab jong lengpa insunga ahunglut in hitin aseitai, “Tuni hin nangman na sepai te jouse hinkho ahin, nangma hinkho ahin, na chate numei le pasal jouse hinkho jong chule na jite leh na thaikem ho hinkho huhhing'a pang jouse mai najum sah tai.
6 Ipi jeh-inem itileh nangman nahot bolte na lungset jon, na lungsette joh nahotbol jotai. Ajeh chu tunin nangman kichen tah in na seidoh tan, gal lamkaiho leh sepai te hi nang dinga imacha louva pang danin nabol tan ahi. Ijeh-inem itileh tuni hin Absalom chu kihing hoi henlang keiho hi kabonchauvin thigam jengu leng nangma nalung lhaijo ding ahi.
7 Hijeh chun tun kipatdoh inlang potdoh pai-pai jengin lang nasohte kom'a thu ngaitah tah in hung sei loiyin; ijeh-inem itileh Pakai min'a kihahsel kahi, nangma nahung potdoh louva ahileh tujan jenga jong hi mihem khat a khat chan jong nagepi louhel ding ahitai; chuti henlang hileh, nachapa gollhangpa a konna na chunga hunglhung thilse hijat sanga jong hiche thilsoh ding hi khohjo ding ahi,” ati.
8 Chuphat in lengpa jong akipatdoh jengin kelkot phunga atouna a chun atoutai. Hichun mipi abonchauva jah dingin aseipeh tai, “Vetan, lengpa khu kelkot phungbul'a atou tai,” atiuva ahileh; chuphat in mipi ho chu abonchauvin lengpa angsunga ahung kitollut soh tauve, Israel chate Absalom nungjui ho vang chu ama-ama inlam cheh a ajamlut soh tauve.
9 Israel phung chujat lah a chun mipi abonchan aboi lah-lah jeng uvin, hitin asei uve, “Lengpa David chun imelma teu khut a konna jong ina huhhing uva chule Philistine te khut akon a jong eina sochat sah u ahin, hinlah Absalom agin jeh a gamsunga konna jamdoh ahitai.
10 Chule tua ichung uva leng chang dinga thao inupau Absalom la galmun a athi tai. Chuti ahileh ibola David chu ileng diuva ilekou kit da diu ham?” akitiuve.
11 Hichun David lengpan jong thempu teni Zadok le Abiathar kom'a thu athot in hitin aseiye, “Judah mi upate kom'a seipeh lhon'in lang, ‘Lengpa kom'a Israel dang jouse thu hunglhung sohta, ipi dinga nangho hi lengpa in'a puilut kit ding thuseiya anukhahpen a pang nahiuvem?
12 Nangho hi keima inkote mong-mong, kaphe le kathisan nahiuve; ahileh ipi dinga nangho lengpa pui ding thusei nukhah a napan diu ham?” ati tilhon'in.
13 Chujongleh Amasa kitipa kom'a jong naseipeh lhon ding, ‘Nang hi keima thisan le phe mong nahilou ham? Tua lhah nang hi Joab panmun khel a sepai te lamkaiya napan lou pou-pouva ahileh Pathen'in abolnom nomin eibol hen, akhoh cheh jon jong eibol hen, kapan sah ding nahi,’ tin aseiye, nati lhon ding ahi,” ati.
14 Hichun Amasa chun Judah mite chu mihem khat seh abahsah jengin alungu kitoh del’in, athunun’in, hijeh chun ama hon thu ahin thot paiyun, lengpa henga chun, “Nang le na sepai te naboncha uvin hung kile kit jeng uvin,” atiuvin ahi.
Jerusalem’a David Akile Kit
15 Hijeh chun lengpa jong Jerusalem ahung kile kit tan ahi. Chule Jordan vadung ahunglhung tan ahile Judah jong chu lengpa lamtoa Jordan vadunga apui galkai din ahungun Gilgal ahunglhung tauve.
16 Gera chapa Shimei kitipa Benjamin phunga mipa jong chu Bahurim khoa pat in David lengpa lamto din kino tah in Judah mite chutoh ahung kilhon suh tai.
17 Chule midang Benjamin phunga kon mi sangkhat, Saul insunga dia sepai jalamkai Ziba jaonan, chule Ziba chapa te som le nga le asoh somni toh ahung thauvin Jordan vadung a lengpa kimupi din ahung lhailha uvin ahi.
18 Hiti chun lengpa leh a ingsung mite chutoh Jordan vadung ahung galkai un, kithopina thei chanin ijakai in ama chu akithopi uvin ahi.
Shimei dinga David khotona lengpan Jordan vadung ahung galkai ding toh lhon'in, Shimei chu ama angsung'ah abohkhup in ahi.
19 Shimei chu ataovin, “Ka pakai lengpa, lungset tah in nei ngaidam in,” nangman Jerusalem na dalhah a na lhachan thil phalou tah-tah kabol ho chu haimil inlang na lungsungah jong umsah datan.
20 Keiman kahei ichan a chonse kahi hitam. Hijeh a chu tunia hilai mun hung kahi, Israel te jouse lah a dinga ka pakai lengpa lamto masapen a,” ati.
21 Chuin Zeruiah chapa Abishai in asei in, Shimei hi tha ding ahi, ajeh chu aman leng thao kinupa hi agaosap ahi.
22 Hichun David in ahinsei in, “Zeruiah chapa kon nang nadoh beh ham!” ati. “Ipi dinga tunia nangma keima melma a pang go nahim? Tuni hi achaini ahipoi, ajeh chu tunia hi keima avel'a Israel te leng kahi kit ahitai!” ati.
23 Hichun Shimei lamma akihei in, David akihahsellin, “Na hinkho hi kahing hoi ding ahi,” ati.
David In Mephibosheth Akhoto
24 Chuin Saul tupa Mephibosheth chu Jerusalem ahungsuh in lengpa ahung kimupin ahi. Lengpan Jerusalem adalhah nikhoa pat chun akeng, akhamul chule avon sop ding imacha akhohsah tapon ahi.
25 Chuin lengpan adonbut in, “Mephibosheth ipi dinga keima toh nahung khom lou ham?” ati.
26 Hichun Mephibosheth in adonbut in, “Ka pakai lengpa, kasohpa Ziba in eijoulhep in ahi. Keiman kaseipeh in, 'ka sangan chu gongtoh in khuti leh lengpa toh kache khom thei ding ahi' kati. Ajeh chu nangman neihet banga keima hi elbai kahi.
27 Keima kahungnom lou danin Ziba in asei in eijoulhep e. Ahin keiman kahenai ka pakai kalengpa hi Pathen vantil tobang nahin, hijeh chun nangman gel inlang aphapen chun bol tan.
28 Chule keima le ka insung mite jouse hi athi dinga lom kahi bou uve ka pakai, hinlah hichu hilouvin nangman nei jabol in na dokhangah an nei nehkhompi e! Hiche kalval a chu ipi kathum nahlai ding ham?” ati.
29 “Nangman aphatai nati,” chuin David in adonbut in, “Nangma le Ziba hi na gamsung chu kitohchet a nakihop lhon dingin kagel lhatai,” ati.
30 Chuin Mephibosheth in aseijin, “Chan jouse chu ama petan, nangma damsel'a nahung kile kit hi keidin aphaset tai, ka pakai le kalengpa,” ati.
David In Barzillai Akhuto
31 Gilead mi Barzillai chu Rogelim akon ahungsuh in Jordan vadung'ah lengpa chu ahung kimupin ahi.
32 Ama hi akum ahan tan mi damthei tah kum somget ahitan ahi. Chule ama hi lengpa Mahanaim aumlai a neh ding pepa chu ahi.
33 Chuin lengpan Barzillai kom'ah asei in “Hungin lang keitoh Jerusalem ah hung cheng tan. Keiman hilai mun a chu nangma kavetsui ding nahi,” ati.
34 Hichun Barzillai in ahin donbut in, “Ahipoi, keima Jerusalem chan hung dingin kateh valtai.
35 Tun keima kum somget kahi tan, chule keiman imacha ka nopsahpi thei aum tapoi. Ju le an jeng jong atui tapon, chule lasa them ho lasah jong kangai nom tapoi. Keima hi ka pakai lengpa dia alungkhamna bep kahi ding ahitai.
36 Lengpa toh Jordan lui galkai ding bou chu ka ngaichat thupi pen ahijoi.
37 Chutengleh keima athi dia kanu le kapa kivuina gamsunga kakinungle ding ahi. Ahin hiche hi nasohpa ka chapa Kimham ahi. Ama hi ka pakai kalengpa toh kilhon henlang chule nangman napeh nom chan chu aman kisan hen,” ati.
38 Chuin lengpa jong anom tan, “Aphai, Kimham toh kache khom ding chule aman adei nalam chan a kakithopi ding chule adei angai chan kabolpeh ding ahi,” ati.
39 Hiti chun mipi jouse chu lengpa toh Jordan agalkai tauvin ahi. Chuin David in Barzillai chu phatthei aboh a achop jouvin, Barzillai chu a inlam akile kit tan ahi.
40 Chuin lengpan Kimham alhonpin Gilgal akhokel tan ahi. Judah sepai jouse le Israel sepai kehkhat in lampi ah ana lamto uvin ahi.
Lengpa Chunga Kinelna
41 Ahin Israel mite jouse chu lengpa chungah akiphin tauvin, “Judah miten lengpa chu ana tomchah kheh un, keihon nang nahin namite ahin Jordan nahung galkaina diuvin kithopina ding phat eipe pouve,” atiuvin ahi.
42 Chuin Judah miten adonbut un, “Lengpa hi keiho son chilhah mong ahi. Ipi dinga hiche hin nasuh lunghang uham? Keihon lengpa akon neh ding ahilouleh thil phachom ima kakisan pouve!” atiuvin ahi.
43 Ahin adang hon ahin donbut un, “Israel sungah phung som aum nalai e. Hijeh chun keihon lengpa chungah somvei jen nangho bol bangin thaneina kanei uve. Hitobang a bolna dinga hi ipi tha nanei uham? Keiho hi kahi lou uham amasapen a ama hi leng hisah kit ute tia chu?” Kinelna chu anung ama ah achejom jingin chule Juda mite chu Israel mite sangin aham ngaimo lheh un ahi.