20
Sheba Galbol
1 Hiche phatlai hin boina sem mikhat ana um'in amapa chu amin Sheba akiti, ama hi apa min Bicri ahin, Benjamin phunga mi ahiye. Chule Sheba kitipa hin saki pengkul amut gingin lhang asamin aseitai,
“David kom'a eihon chan ding inei pouvin,
Jesse chapa kom'a goulo ding inei pouve.’
Vo Israel mite,
nangma nangma ponbuh kijot cheh tauvin!” ati.
2 Hiche jeh chun Israel miten abonchauvin David adalha sohhel tauvin, Bicri chapa Sheba nung ajui cheh tauve. Ahivangin Judah miten alengpau chu lunglut tah in Jordan vadunga pat Jerusalem geiyin ajuilut peh tauvin ahi.
3 David chu Jerusalem'a ahungin ain ahunglhung tai, chuin lengpan in ngah dinga adalhah thaikem numei som ho chu abonchan aman khom sohkeiyin in khat a akoikhom in, chule hiche in chu mi angah ding sepai akoiyin, neh le chah vang apenan, amaho hi avil tapon, aluppi tapoi. Hijeh chun amaho hi athini gei uvin cha hing louvin aum sohkeiyun, meithai bangin aum sohkei tauve.
4 Hichun lengpan Amasa kom'a aseipeh in, “Nithum sungin Judah phunga mite abonchan kou khom sohkeiyin lang, nangma tah jeng jong hikom'a hin hung kikhom uvin,” ati.
5 Hijeh chun Amasa jong Judah mite kou dingin akondoh tan, ahinla ama dinga aphat kiteppeh sanga tamjo ahin latan ahi.
6 Chuphat in David chun Abishai kom'a chun aseijin, “Tua hi Sheba kitipa Bicri chapa khun Absalom'in eibol nau sanga khohjoa eibol diu ahi. Nangman napu lhacha sepai te khu kipuiyin lang anung delpeh inlang, gaman tan achuti louva ahileh aman kulpi kikaikhum khopi phabep akisah doh a eiho eisuh genthei diu ahi,” ati.
7 Chuin Abishai le Joab, lengpa ngahtup sepai ho toh, chule mihat jouse jong abonchan akitol sohkeiyuvin ahi. Chule amaho hi Jerusalem khopia kon'in Bicri chapa Sheba nung del dingin akondoh tauve.
8 Amaho hi Gibeon khopia songpi lentah phung ahunggei uvin Amasa jong amaho lamto dingin ahung tai. Hichun Joab hi sepai vonin akivonin, chule akongjanga chun konggah khat hin chemjam apaiyin akipoh in ahi. Amasang lam uva Amasa chibai bol din achepheijin, hichun ahung kibalhun achemjam chu ahung kitholdoh paitan ahi.
9 Hichun Joab hin Amasa kom'a hitin aseiye, “Sopi nadam dam hinam? tin adongin, hiti chun Joab hin Amasa chu akhut jetlam in amanin achop ding bangin anemul chun atuh chah jenge.
10 Hichea hi Amasa hin Joab in akhut veilam a chemjam akidop lam chu anahet lou ahiye; hiti hin Joab chun Amasa chu a oipoh asutpeh in; hichun avel'a sat kit louhel’in khatvei seh-seh chun ama jong athidel jengin ahi. Chujouvin Joab le asopipa Abishai chun Bicri chapa Sheba nung chu adel pai-pai tauve.
11 Chule Joab sepai te lah a mi khat chu Amasa long phunga aga dingin hitin aseiye, “Koi-koi hijongleh Joab panpia David dinga pang jouse chun Joab nung jui cheh hen,” ati.
12 Hichun Amasa vang chu lamlen kim laitah a athisan lah a akisai saiyin alumden tai. Lampia hung mijouse chun amudoh tengule ading cheh jiuvin, hijeh chun alongkom a dingpa chun miho jouse agahdinji jeh u chun Amasa long chu akaimangin gamlah a apolut in pon akhu khumtan ahi.
13 Chuin Amasa chu lamlen lailunga konna akaimang phat chun mipi sepai jouse jong chun Joab nung juiya Bicri chapa Sheba nung del dingin ache pai-pai jeng tauve.
14 Sheba hin Israel phung jouse ana chon sohkeijin, achainan Abel-beth-maacah chan gei anajot man in ahi; hijeh chun Bicri mite jouse akikhom uvin ama nung ajui sohhel tauve.
15 Hichun Joab toh pang khom mite chu abonchan ahung uvin Abel-beth-maacah khoa chun Sheba aga’um tauve. Khopi umnan pal akai uvin, chule khopi pal chutoh kingato'n leipal chu akikhang doh jenge; chuin ama hon khopi pal chu phetjal dingin agouvin avojal pan tauve.
16 Hichun khopi sung langa kon'in numei miching tah khat hin mi ahin kouvin, “Ngaiyuvin, ngaiyuvin, keiman Joab chu kaki houpi theina dingin hin seipeh uvin lang hilai mun'a hin hung hen, ati hin tiuvin,” ahinti.
17 Hiphat chun Joab jong chu amanu kom'a chun ahungin ahileh, numeinu chun hitin aseipeh tai, “Nangma Joab nahim? atia ahileh
aman jong adonbut in, “Kahinai,” ati.
Hichun numei nun, “Nasohnu thusei hi chingthei tah in ngai temin,” ati.
Aman adonbut in, “Kangai peh nai,” ati.
18 Hichun numei nun jong aseitai, “Masanga gollui laiyin tehse hon hitin ana sei uve, 'kinel baotamna chu nalhap nom leh, Abel khoa mi dong'un.'
19 Hitia chu keima jong hi Israel mite lah a chamna bolji le kitah tah a hinkho mang mi khat chu kahi; hijeh chun tun nangman Israel chate dia penna khopi khat hi thagam dingin nahol’e; ibola nangman Pakai goulo athilkeo hi hitia hi suhmang jeng ding nati ham?” ati.
20 Hichun Joab jong chun adonbut in, “Keiman itih hijongleh khopi ka suhmang louhel ding ahi!
21 Nasei chu adihpoi, ahin Ephraim gam'a thinglhang mi Bicri kitipa chapa khat amin Sheba kitipa chun David lengpa dounan akhut alamtai; ama chu hin pedoh jeng uvin, chutileh keima khopia konna hi kaki nungle jeng ding ahi,” ati. Chuphat in numeinu jong chun adonbut paiyin, Joab kom'a chun,
“Aphai, naseipa chu palvuma aluchang tansa hung kileh lha ding nakom'a hung chu ding ahi,” atipeh-e.
22 Numeinu chu alungthima achihna bang dungjuijin khopi sunga anung chen mipi jouse kom'a chun hitin aga seitai. Chuin mihon Bicri chapa Sheba chu alu atan uvin, Joab kom'a chun aga seplut tauve. Chuphat in Joab chun saki pengkul chu amut paiyin, khopia kon chun akikhen cheh sohkeiyun, mijouse chu ama-ama in cheh a ache tauve. Joab vang chu Jerusalem'a lengpa kom'a dingin ahung kile kittai.
23 Hichun Joab kitipa hi Israel chate pumpi dinga gal lamkai lenpen chule sepai jouse chunga vaipo ahi. Jehoiada chapa Benaiah chu sepai ho lamkai vaipon apangin ahi.
24 Chule Adoniram kitipa chu engbol a um soh natonga pangho chunga chun vaihom in apangin, Ahilud chapa Jehoshaphat kitipa chu thusim sun loiyin apange.
25 Sheva chu thutanna mun a lekha sun in apangin, Zadok le Abiathar chu thempun apang lhon'in ahi.
26 Chule Jair mi Ira vang chu David din thempun anapang tan ahi.