37
1 Aa ie nahajanjiñe zay t’Iekizkia, le rinia’e o siki’eo naho nisaron-gony vaho nimoak’ añ’anjomba’ Iehovà ao.
2 Nirahe’e mb’am’ Iesaià mpitoky ana’ i Amotse amy zao t’i Eliakime mpifeleke i anjombay, naho i Sebnà mpanokitse naho o zokem-pisoroñeo songa nisaron-gony.
3 Le hoe ty enta’ iareo ama’e: Hoe t’Iekizkia: Androm-poheke naho trevoke vaho teratera ty andro toy; fa antitotse ho samake o ajajao fe tsy eo ty haozarañe hahatoly.
4 He ho janjiñe’ Iehovà Andrianañahare’o o saontsi’ i Rabsakè nañiraham-panjaka’ i Asore tale’eo hanigike an’ Andrianañahare veloñe, vaho hendaha’ Iehovà Andrianañahare’o i saontsy jinanji’ey; ehe mihalalia ho amy ze sehanga’e mbe eo.
5 Aa le nivotrak’ am’ Iesaià eo o mpitoro’ Iekizkiao.
6 Le hoe t’Iesaià am’ iareo: Zao ty ho saontsie’ areo amy tale’ areoy: Hoe ty nafè’ Iehovà: ko hembañ’ amo entañe jinanji’oo, amo niteratera’ o mpitoro’ i Mpanjaka’ i Asoreo Ahikoo.
7 Inao te hajoko ama’e ty fañahy, le hijanjiñe tolom-boetse naho himpoly an-tane’e añe vaho hampikorovoheko am-pibara an-tane’e ao.
8 Aa le nibalike mb’eo t’i Rabsakè, vaho zoe’e nifañotake amy Libnà ty mpanjaka’ i Asore, fa tsinano’e t’ie nienga i Lakise.
9 Le hoe ty jinanji’e ty amy Tirhakà, mpanjaka’ i Kose, Miavotse mb’etoa re hialy ama’o. Ie jinanji’e zay le nañitrike am’ Iekizkia ty hoe:
10 Ty hoe ty ho saontsie’ areo am’ Iekizkia mpanjaka’ Iehodà: Asoao tsy henga’o hanigìke azo t’i Andrianañahare iatoa’o, hanao ty hoe: Tsy hatolotse am-pitàm-panjaka’ i Asore t’Ierosalaime.
11 Inao, tsy jinanji’o hao ty nanoa’ o mpanjaka’ i Asoreo amo hene taneo? ie nampangotomomohe’e; aa havotsotse hao nahareo?
12 Fa rinomban-drahare’e hao o rinotsan-droaekoo: i Gozane naho i Harane, naho i Retsefe vaho o ana’ i Edene e Telasareo?
13 Aia ty mpanjaka’ i Kamàte naho ty mpanjaka’ i Arpade naho ty mpanjakan-drova’ i Sefarvaime, ty a i Henà vaho Ivà?
14 Aa ie rinambe’ Iekizkià i taratasy am-pità’ o nampihitrifeñeoy naho vinaki’e; le nionjomb’ añ’ anjomba’ Iehovà mb’eo t’Iekizkia, vaho vinela’e añatrefa’ Iehovà.
15 Nihalaly am’ Iehovà t’Iekizkia ami’ty hoe:
16 Ry Iehovà’ i Màroy, Andrianañahare’ Israele, mpiambesatse ambone’ o kerobeo; Ihe ro Andrianañahare, Ihe avao, amy ze kila fifeleha’ ty tane toy; ry Andrianamboats’ i likerañey naho ty tane toy.
17 Atokilaño ty ravembia’o ry Iehovà naho janjiño; abolanaho o fihaino’oo ry Iehovà vaho vazohò; inao ze hene enta’ i Senkeribe, nahitri’e hañinje an’ Andrianañahare veloñe.
18 O ry Iehovà, Toe fonga nampangoakoahe’ o mpanjaka’ i Asoreo o fifeheañeo naho o tane’ iareoo,
19 vaho naretsa’ iareo añ’afo ao o ndrahare’ iareoo amy t’ie tsy Andrianañahare, fa sata-pità’ ondaty, hatae naho vato; aa le finongo’e.
20 Ie henaneo ry Iehovà Andrianañahare’ay, rombaho am-pità’e zahay, soa te ho fohi’ ze kila fifeleha’ ty tane toy te Ihe ro Iehovà, Ihe avao.
21 Aa le nahitri’ Iesaià ana’ i Amotse am’ Iekizkia ty hoe: Hoe ty nafè’ Iehovà, Andrianañahare’ Israele: Amy te ihe ro nihalaly amako ty amy Senkeribe mpanjaka’ i Asore,
22 le hoe ty tsara nafè’ Iehovà ama’e:
Fa nanirika azo i anak’ ampela’ i Tsioney,
nitohafa’e an-drabioñe;
vaho nikofikofi-doha amboho’o ao
i anak’ ampela’ Ierosalaimey.
23 Ia ty sinigì’o naho tineratera’o?
Ia ty nañonjona’o feo?
Toe nampiandrae’o mañambone ey
o maso’oo, hiatreatrea’o
t’i Masi’ Israele!
24 O mpitoro’oo ty nañamavoa’o
i Talè, ami’ty hoe:
Amo hatsifotofoton-tsaretekoo
ty nitroarako ankaboa’ o vohitseo,
an-tsifitsifi’ i Lebanone ao;
fonga finirako ze mendoraveñe abo;
naho ze akao soa;
nizilihako i haboañe lavitse ama’ey,
ty ala-vondro an-goloboñe kobokara.
25 Nihaly raho vaho ninon-drano,
le ami’ty lelam-pandiako ty nañamaihako ze hene saka’ i Mitsraime.
26 Mboe tsy jinanji’o hao?
Tsietoimoneñe zay ty nisafiriako
taolo añe t’ie naereñereko;
ie o tafetetse henaneo;
te hafotetse ho kivotrevotre mangoakoake o rova nifatrareñeo.
27 Aa le ni-kede ozatse o mpimone’eo,
niampoheke vaho nisalatse,
nanahake ty ahetse an-kivoke ey,
hoe rongoñe antsetra,
hoe ahetse ambone anjomba,
mae t’ie mbe tsy matoe.
28 Fe apotako o fiambesa’oo, naho
o fiavota’oo,
o fimoaha’oo vaho
o famantsiña’o amakoo.
29 Aa kanao nitazataza’o,
naho nañambone mb’amo
sofiko toañe ty korà’o,
le hanoeko am-piantsoña’o ao
ty porengoko,
naho am-pivimbi’o ty laboridiko,
vaho hampolieko mb’amy lalañe
nomba’o mb’etoañey.
30 Le zao ty ho viloñe ama’o:
hikama o raha mitiry avao nahareo
ami’ty taoñe toy;
le ze mijirike ama’e
ami’ty taom-paharoe;
le mitongisa ami’ty taom-pahatelo naho manataha, amboleo valoboke
vaho ikamao ty voka’e.
31 Le hamahatse mañambane ty hengaha’ i anjomba’ Iehodày ,
vaho hamoa mañambone.
32 Fa boake Ierosalaime ao
ty hiavota’ ty honka’e
vaho hirik’ am-bohi-Tsione
o mahafibotàfotseo;
ho henefe’ ty fahimbaña’
Iehovà’ i Màroy.
33 Aa le hoe t’Iehovà ty amy
Mpanjaka’ i Asorey:
tsy himoake an-drova atoy re,
ndra hitifitse ana-pale,
tsy hiatrefa’e am-pikalañe
ndra hampitoabora’e votren-tane.
34 I lalañe nomba’e mb’etoañey,
ty himpolia’e mb’eo,
tsy himoake ami’ty rova toy re, hoe t’Iehovà
35 Fa harovako naho ho rombaheko
ty amako ty rova toy,
vaho ty amy mpitoroko Davidey.
36 Aa le nionjom-beo ty anjeli’ Iehovà nanjamañe ty Rai-hetse-tsi-valo-ale-tsi-lime arivo an-tobe’ o nte-Asoreo; le ie nivañoñe maraindray t’indaty, hehe te fonga nidondom-pate ty ey.
37 Niavotse amy zao t’i Senkeribe mpanjaka’ i Asore, nimpoly vaho nitoboke e Ninevèy ao.
38 Le teo t’ie niloloke añ’ anjomba’ i Nisroke ndrahare’e ao, te namatsik’ aze am-pibara ty Adrameleke naho i Sarezere ana’e vaho nifiotse mb’ an-tane Ararate añe. I Esar-kadone ana’e ty nandimbe aze ho mpifeleke.