38
1 Ie amy andro rezay, natindry fa heta’e t’Iekizkia; le nimb’ama’e mb’eo t’Iesaià ana’ i Amotse, nanao ty hoe: Hoe t’Iehovà: Hajario ty anjomba’o fa toe hivetrake, tsy ho veloñe.
2 Nampitolihe’ Iekizkia mb’ an-drindriñe ty lahara’e vaho nihalaly am’ Iehovà,
3 ty hoe: Mihalaly ama’o, ry Iehovà, tiahio henaneo ty fandenàko añatrefa’o an-kavantañañe naho an-kaliforan-troke, vaho nanao ze mahity am-pahaoniña’o; aa ie nangololoike ty rovetse,
4 nivotrak’ am’ Iesaià ty tsara’ Iehovà nanao ty hoe:
5 Akia saontsio am’ Iekizkia ty hoe: Hoe t’Iehovà, Andrianañaharen-drae’o Davide. Fa jinanjiko i halali’oy, nitreako o ranom-pihaino’oo; ingo ho tovoñako taoñe folo lim’ amby o andro’oo.
6 Ho hahako am-pitàm-panjaka’ i Asore rehe naho ty rova toy vaho harovako ty rova toy;
7 le zao ty ho viloñe ama’o boak’am’ Iehovà, te ho henefa’ Iehovà i raha tsinara’ey:
8 Heheke te hampibaliheko soritse folo amo soritse fa nilia’eo ty talinjom-panondro-andro’ i Akhaze. Aa le nibalik’ amy soritse folo fa nomba’ey i àndroy.
9 Inao ty sinoki’ Iekizkia mpanjaka’ Iehodà, t’ie natindry an-tihy vaho nijangañe amy arete’ey.
10 Hoe raho: Ami’ty tsipinde-mena’
o androkoo ty ijoñako
an-dalambein-tsikeokeoke eo;
kinalañ’ amako o andro tsy nirikoo.
11 Hoe raho: tsy ho treako t’Ià,
Eka, Ià an-tane’ o veloñeo;
tsy ho isako ka t’indaty mindre amo mpimone’ ty tane toio.
12 Nombotañe vaho nasitake amako
hoe kibohom-piarak’ añondry ty kijàko;
nahoronkoroñe hoe te asam-panenoñe ty fiaiko:
tinampa’e amy tenoñey raho,
handro an-kaleñe
ty hamongora’o ty fiaiko.
13 Nifeahako pak’ami’ty maraiñe,
manahake ty liona,
fe mbe nipozapozake iaby o taolakoo, añivo ty handro naho ty haleñe
ty nampigadoña’o ahy.
14 Mikora hoe tivoke naho aliotse raho;
mikò hoe deho;
nimokore’ ty fiandrandràko o masokoo.
O ry Iehovà, voatindry raho,
Ihe abey ro tsoako.
15 Ino ty ho volañeko? Nametse amako
re mbore nanoe’e;
hiezañe amo hene androkoo raho,
ami’ty hafairam-piaiko.
16 O Talè, irezay o mahajangañe ondatio,
mampanintsiñe ty troko rehe;
vaho mameloñ’ ahy.
17 Tsy nanjo fañanintsin-draho
te mone haaferon’ aiko;
fe o fikokoa’o ahikoo
ro nañaha’o ahy
amy kobon-kamodoañey;
vaho fonga nahifi’o amboho’o ao
o hakeokoo.
18 Tsy mahafandrenge Azo
ty tsikeokeoke,
tsy hañonjoñe azo ty havilasy;
tsy mahafitamà ty figahiña’o
ty migodañe mb’an-koak’ ao.
19 O veloñeo, o veloñeo,
ie ro mandrenge Azoo,
manahake ty anoeko henaneo;
ampandrendrehen-drae amo keleia’eo
ty figahiña’o.
20 Handrombak’ ahy t’Iehovà;
le hititiha’ay ami’ty marovany añ’anjomba’ Iehovà ao o sabokoo,
amo hene andro hiveloma’aio.
21 Fa hoe ty natao’ Iesaià: Ampangalao garaton-tsakoa hapakotse amy honay himeara’e.
22 Nanao ty hoe ka t’Iekizkia: Ino ty viloñe hampionjoñ’ ahy mb’ añ’ anjomba’ Iehovà mb’eo?