45
1 Hoe t’Iehovà amy Korese noriza’ey, ie nihafatrareko ty fità’e havana,
hampibabohañe aolo’e eo
o kilakila ondatio,
vaho hampibalaha’e
ty am-bania’ o mpanjakao;
hanokafa’e o lalam-bey añatrefa’eoo,
tsy harindriñe ka o sikadañeo:
2 Hiaolo azo raho, naho
hampimiraeko o migoledogoledoñeo;
ho tseratseraheko o lalam-bey torisìkeo;
vaho ho pozapozaheko o sikadam-bìo;
3 Hatoloko azo o hanañan-kaieñeo,
naho ty vara mikafitse an-toetse
mietake ao, soa te ho fohi’o
te Zaho Iehovà;
i mikanjy azo ami’ty tahina’oy;
t’i Andrianañahare’ Israele.
4 Iakobe mpitorokoy,
naho Israele jinobokoy,
ty nikanjiako azo an-tahinañe,
Zaho ty nanolotse azo añarañe
ndra te tsy apota’o.
5 Zaho Iehovà vaho tsy aman-tovo,
tsy eo t’i Andrianañahare
naho tsy Zaho avao;
Zaho ty nampidiañe azo ndra te nofi’o.
6 Soa te ho fohi’
o am-panjiriha’ i àndroy
pak’ am-pitsofora’eo
te tsy eo ty hatovoñ’ahy;
Zaho Iehovà, vaho tsy aman-tovo.
7 Zaho ty mamoroñe o hazavàñeo,
naho mamboatse o ieñeo;
amboareko ty fierañerañañe,
vaho foroñeko ty hankàñe;
Zaho Iehovà o manao ze he’e zao.
8 Mikojojoaha ry likerañeo,
boak’ambone ey,
ampidoaño havañonañe ry rahoñeo;
misokafa ry tane,
hampamokarañe fandrombahañe,
ampitraofo fitiry ama’e ty havantañañe;
Zaho Iehovà, ty namoroñe aze.
9 Hankàñe amy mifandietse
amy Mpamboatse azey,
manahake ty valàñe-tane amo valàñe-tane an-taneo!
hanao ty hoe hao ty lietse
amy mpamoroñe azey,
Inom-bao o amboare’oo?
ndra: ino’ o tsenè’oo t’ie
tsy aman-tanañe?
10 Hekoheko amy manao ty hoe
aman-drae’ey: Ino o nasama’oo?
ndra amy rakembay,
Ino ty nitsongoe’o?
11 Hoe t’Iehovà, t’i Masi’ Israele,
Namboatse azey:
Añontanea’o ahy hao o raha ho avio;
halohi’o hao raho amo ana-dahikoo,
naho amo fitoloñakoo?
12 Zaho, ty namboatse ty tane toy;
naho nitsene ondaty ama’e;
Zaho, le o tañakoo, ty nandafike
o likerañeo vaho liniliko
o havasiaña’ iareoo.
13 Fa nitsekafeko an-kavañonan-dre,
naho ho hene vantañeko o fombà’eo;
Ie ty hamboatse i rovakoy,
vaho havotso’e hidada,
tsy amam-bili’e tsy aman-tambe,
o naseseo,
Hoe t’Iehovà’ i Màroy.
14 Hoe t’Iehovà:
Homb’ama’o mb’eo,
ty fitoloña’ i Mitsraime,
naho ty kilanka’ i Kose
naho o nte-Sevàý mijoalao, ie ho azo:
hañorik’ azo iereo, hitsake mb’eo an-tsilisily,
naho hilokolokoa’ iareo hihalaly ama’o ami’ty hoe: Toe ama’areo t’i Andrianañahare,
naho tsy eo ty hatovoñ’ Aze;
tsy aman’ Añahare ila’e.
15 Toe Andrianañahare mietake Rehe
ry Andrianañahare’ Israele
Mpandrombakeo.
16 Ho salatse iereo, eka,
fonga ho an-tamberen-tane;
hitrao-dia am-pivotemboteñañe
o mpitsene hazomangao.
17 Ry Israele, ie rinomba’ Iehovà
am-pandrombahañe tsy modo le
tsy ho salatse ndra daba nainai’e donia.
18 Fa hoe t’Iehovà Mpamboatse
o likerañeo: (i Andrianañahare
namoroñe ty tane toy, ie toe nitsene vaho nampijadoñ’ azey.) Tsy namboare’e ho koake.
fa namboatse iareo himoneñañe;
Zaho Iehovà vaho tsy aman-tovo.
19 Tsy nivolañe añetake raho,
an-toetse maieñe ao;
tsy nanoeko ty hoe ty tiri’ Iakobe:
Ipaiao hoe voa-nè,
Fe mpitaron-kavañonan-draho, Iehovà,
Mpikoike entam-bantañe.
20 Mifanontona mb’etoañe;
mañarinea t’ie nahabotitsike
amo kilakila ondatioo!
Tsy aman-kilala ze misalika voñe
naho mihalaly aman-drahare
tsy maharombake.
21 Taroño, aboaho ty enta’ areo; angao t’ie hisafiry!
Ia ty nahafitoky zao haehae zay? Ia ty nitsey aze taolo bey añe?
Tsy Zaho, Iehovà hao? Tsy aman’ Añahare naho tsy Zaho, t’i Andrianañahare vantañe
naho Mpandrombake—
tsy eo naho tsy Zaho avao.
22 Mitoliha amako ry hene olon-taneo,
soa te ho rombaheñe,
amy te Zaho ro Andrianañahare,
le tsy aman-tovo.
23 Nifanta am-batako,
niboak’am-bavako ao an-
kavantaña’e ty tsara
vaho tsy hibalike ka, soa te amako
ty hitongalefa’ ze kila ongotse, ty hifantà’ ze hene fameleke.
24 Ho taroñeñe ahy ty hoe: Am’ Iehovà ao avao ty fandrebahañe
naho ty haozarañe.
Homb’ama’e mb’eo ondatio,
fonga hinañanaña o malaiñe Azeo.
25 Am’ Iehovà ao, kila hahazo to
ty tiri’ Israele,
vaho hirañaraña an-kobay!