46
1 Mibotreke ty Bele,
Midrokoke ty Nebò; vavè’ o bibio,
o añombe mijiny kilankañeo, ty sare’e; nampilogologoeñe o raha endese’ areoo o biby mokotseo.
2 Mibokoboko iereo, mitrao-piondreke,
tsy nitafete’ iareo i kilankañey; vaho
songa nasese mb’am-pandrohizañe añe.
3 Mijanjiña ahy ry anjomba’ Iakobeo,
naho ry sehangan’ anjomba’ Israeleo,
o nivesareko boak’am-pisamaha’eo,
o notroñeñe boak’ an-koviñe ao
4 pak’ an-ka’anterañeo, Zaho ro Ie,
ho babèko pak’ a maròy foty rehe;
Zaho ty namboatse, zaho ty hinday;
eka hotroñeko mbore hampipalireko.
5 Ia ty hampañirinkiriña’ areo amako,
naho hampihambaña’areo,
vaho hampanahafa’ areo,
soa te hifañoronkoroñe?
6 Mandrarake volamena
boak’ an-kotrañe ao ty ila’e,
naho mandanja volafoty am-balantsy;
vaho mañarama mpanefe volamena
hañamboare’e ndrahare,
hibokobokoa’e naho hitalahoa’e.
7 Jinie’ iereo an-tsoroke, endeseñe,
apo’ iereo amy toe’ey,
ie mijagarodoñe eo, tsy hienga i toe’ey;
eka, ndra t’ie kaikaiheñe
tsy mete manoiñe,
tsy haharombak’ aze
amy hasosora’ey.
8 Tiahio le mijadoña;
ampolio an-troke ao, ry mpanan-kakeo.
9 Tiahio o raha taoloo, eka haehae;
te Zaho ro Andrianañahare
naho tsy aman-tovo;
Zaho ro Andrianañahare
vaho tsy eo ty hambañe amako,
10 Mitaroñe ty figadoña’e hirik’am-baloha’e,
boake haehae añe o mbe tsy nanoeñeo,
ami’ty hoe: Hijadoñe ty ereñereko,
vaho hene hanoeko
ze mahafale ty troko;
11 Ho tokaveko boak’ atiñanañe añe
ty voroñe mipay hena;
t’indaty nisafirieko boak’
an-tsietoitane añe;
eka fa nivolan-dRaho le ho henefeko,
niereñeren-dRaho vaho hanoeko.
12 Haoño raho, ry gan-katokeo,
ry lavitse havañonañeo.
13 Hendeseko marine eo
ty havantañako, tsy ho lavitse,
tsy halaoñe i fandrombahakoy;
vaho hatoloko amy Tsione
ty fandrombahañe, ho a’ Israele engeko.