54
1 Mirebeha ry betsiterake,
ihe tsy nanaranake,
mipoñafa sabo,
mipazapazaha ry tsy nitsongo!
Fa maro ty ana’ i vahiniy, te amo ana’ i amam-baliio,
hoe t’Iehovà.
2 Itàro ty toen-kiboho’o,
tibaho o lamba fañefen’ akiba’oo,
naho ko tomoreñe;
halavao o tali’oo,
vaho haozaro o tsato’oo.
3 Amy t’ie hañivake mb’ankavana,
naho mb’ankavia;
naho handova o kilakila’ ndatio o tarira’oo,
vaho hampimoneñañe o rova mangoakoakeo.
4 Ko hemban-drehe fa tsy ho salatse,
ko meñatse, fa tsy hinjèñe,
toe ho haliño’o ty hameñaran-katora’o,
vaho tsy ho tiahi’o ka
ty fañinjeañe i haramavoi’oy.
5 Fa tañanjomba’o i Mpamboatse azoy,
Iehovà’ i Màroy ty tahina’e;
t’i Masi’ Israele ro Mpijeba’o,
t’i Andrianañahare’ ty tane toy
ro fikanjiañe Aze.
6 Fa nitok’azo t’Iehovà hoe valy
naforintseñe naho mihontoke,
aa kanao valin-katora’e,
hapoke hao?
hoe t’i Andrianañahare.
7 Andro bory ty namorintseñako azo;
fe am-piferenaiñañe jabajaba
ty hanontonako azo.
8 Fifomboañe fohe
ty nañetahako ama’o ty tareheko;
fe am-pikokoañe migahiñe nainai’e
ty hiferenaiñako,
hoe t’Iehovà Mpijeba’o.
9 Toe rano’ i Noake amako itoy;
amy te hambañe ami’ty nandiliako te tsy hañàmpo ty tane toy ka i rano’ i Noakey,
le nititiheko ka t’ie tsy hibosehako
vaho tsy ho trevoheko.
10 Fa hafahañe o vohitseo,
naho haveve o haboañeo;
fe tsy hieng’azo ty fiferenaiñako,
vaho tsy hovaeñe i fañinam-pilongoakoy,
hoe t’Iehovà mpiferenaiñ’azo.
11 O ry malorè avalitaboa’ i tio-beiy,
ie tsy amam-pañohò,
heheke te harafeko am-bolo soa
o vato’oo, naho ho tsenèko
an-tsafira o faha’oo.
12 Hanoeko roy o tilik’abo’oo,
le am-bato mañabasà o lalam-bei’oo,
vaho am-batosoa o olotsolotseo.
13 Hene hanare’ Iehovà o ana’oo;
vaho hampitomboeñe
ty fierañeraña’ o keleia’oo.
14 Horizañe an-kavantañan-drehe;
hitots’azo ty famorekekeañe,
tsy hihembaña’o,
tsy hitotok’ azo ka o fandrotsahañeo.
15 Mete hifanontone iereo,
fa tsy ty amako;
hikorovoke añatrefa’o eo
ze mikitroke azo.
16 Zaho ‘nio ty nanao i mpanefe
mitiotioke vaen’afoy,
Ie añakara’e fialiañe hitoloña’e;
nanoeko ka ty mpijoy hijoia’e.
17 Tsy hanjofake ze fialiañe
namboareñe haname azo;
naho fonga hafà’o ze fameleke
hitroatse hiatreatre azo an-jaka.
zay ty lova’ o mpitoro’ Iehovào,
vaho tamako ty havantaña’ iareo
hoe t’Iehovà.