55
1 O ry taliñiereñeo!
Mb’an-drano mb’etoa!
Ry tsy aman-dràlao, mb’etoa mivily,
vaho mikama,
eka, ikalò divay naho ronono
tsy aman-drala, tsy amam-bili’e.
2 Inoñe ty andrita’ areo drala
amo tsy mahakamao, naho itoloña’ areo o tsy mañenekeo?
Haoño raho, mitsatsiha,
vaho kamao ty soa,
ampifaleo ty fiai’ areo ami’ty betro’e.
3 Atokilaño amako o ravembia’ areoo;
Mijanjiña, hahaveloñe ty tro’ areo,
vaho hanoako fañina tsy modo, o fiferenaiña’ i Davideo.
4 Ingo, t’ie nanoeko mpañalañalañe
amo kilakila’ndatio,
mpiaolo naho mpameleke ondaty.
5 Ingo! ho koihe’o ty tane tsy fohi’o,
vaho hilay mb’ama’o mb’eo
ty tane tsy mahafohiñe azo, ty am’ Iehovà, Andrianañahare’o,
i Masi’ Israeley, ihe nitolora’e engeñe.
6 Paiao t’Iehovà ie mbe mete ho oniñe, ikanjio te mbe marine eo.
7 Ee te hapo’ i tsereheñey o sata rati’eo vaho hado’ i mengokey o fikinià’eo;
himpoly mb’am’ Iehovà hitretreza’e,
naho mb’aman’ Añahare
hilosora’e tàha.
8 Toe tsy fitsakoreako o vetsevetse’ areoo,
vaho tsy lalako o lala’ areoo,
hoe t’Iehovà.
9 Mira ami’ty maha ambone’ ty tane toy
o likerañeo
ty ha-andikera’ o lalakoo
te amo sata’ areoo,
naho o ereñerekoo
te amo fitsakorean-tro’ areoo.
10 Hambañe ami’ty fiavi’ o orañeo naho
o oram-panala boak’ andindiñeo
ie tsy mibalike, naho tsy
tondraha’e hey o taneo
hampamokara’e naho hampitovoaña’e, hamahana’e doria ami”ty mpitongy naho ampemba ami’ty mikama,
11 Toe zay ty fiakara’ ty entako
am-bavako ao;
ie tsy holy mañomaño amako, fa ho fonire’e o satrikoo,
vaho ho henefe’e ty namantohako.
12 Hiavotse an-kafaleañe nahareo, vaho hampionjoneñe
am-pierañerañañe;
ho poñafe’ o vohitseo ty sabo aolo’ areo,
le hene hiteha-tañañe
ze hatae am-patrañe añe.
13 Hitovoañe hisolo ty fatike
ty mendoraveñe, vaho handimbe
ty hisatse ty beifelañe.
Ho fitiahiañe Iehovà zay,
ho viloñe nainai’e tsy modo, tsy haitoañe.