19
1 Aa le hoe ty natoi’ Iobe :
2 Pak’ombia nahareo
ro mbe hampiojeoje ty troko naho hampipinepinek’ahy an-tsaontsy?
3 Im-polo ty nañonjira’ areo ahiko
vaho tsy mahasalats’ anahareo
ty mañaraty ahy.
4 Aa naho nitò t’ie nandilatse, le midoñ’ amako avao i tahiñey.
5 Naho mivongevòngek’ amako nahareo manisý ahy amo injekoo,
6 Le mahafohina te nifotetse amako,
t’i Andrianañahare
vaho narikato’e amako ty harato’e.
7 Mitoreo raho fa nikatramoeñe
fe tsy amam-pañaoñe;
mikanjy, fe tsy añomean-to.
8 Finahepahe’e ty lalako tsy handenàko,
naho napo’e añ’oloñoloko ao ty ieñe.
9 Nampikorendahe’e amako ty engeko,
vaho nafaha’e an-dohako ao
i sabakam-bolonahetsey.
10 Narotsa’e mb’etia mb’atia,
le fa añe raho:
ombota’e hoe hatae ty fitamàko.
11 Nasoleba’e amako ka ty haviñera’e
vaho atao’e ho rafelahi’e.
12 Mitotoke amako o lahindefo’eo,
mitoañe mb’amako
le mitobe añariary i kibohokoy.
13 Napo’e lavitse ahy o rahalahikoo,
vaho fonga alik’amako o nimpiamakoo.
14 Namorintseñe ahy o longokoo,
nañaliño ahy o rañekoo.
15 O mitobok’ añ’anjombakoo,
naho o anak’ampatakoo,
songa manao ahy ho ambahiny,
toe renetane am-pahaisaha’e.
16 Tokaveko ty mpitoroko, fe tsy manoiñe,
ndra te itoreovam-bavako.
17 Mampangorý i valiko ty kofòko,
vaho heje’ ty amorin-dreneko.
18 Manirìk’ahy o anak’ajalahio,
ie miongake raho, onjira’ iareo.
19 Malaiñ’ahy iaby o atehenakoo;
tsambolitio’ o nikokoakoo.
20 Mipitek’ ami’ty holiko naho
ami’ty nofoko o taolakoo,
vaho an-tain-tsìko avao ty nimolaoreko.
21 Tretrezo raho, iferenaiño, ry rañeko;
fa nipaok’ ahy ty fitàn’Añahare.
22 Ino ty ampisoaña’ areo ahy hoe t’ie Andrianañahare?
Tsy mahaeneñ’ anahareo hao o holikoo?
23 Ee te nisokireñe o volako zao!
Lonike t’ie nipatereñe am-boke ao!
24 Ee any t’ie sokirañe
an-tsantilò viñe naho firake
am-bato tsy ho modo!
25 Fa naho zaho, apotako te veloñe
i Mpijebañ’ahikoy,
ie hijohañe ambone’
o lembokeo an-tsengaha’e añe.
26 Le ie fa momoke ty holiko—
ty mianto toy, ho treako boak’ ami’ty nofoko t’i Andrianañahare;
27 Eka, hahatrea Aze raho;
o masokoo ro hahaisak’ aze fa tsy ty ila’e.
Momoke o añ’ovakoo!
28 Hera hanao ty hoe nahareo:
Akore ty hampisoañan-tikañ’ aze?
Ino ty lengo’e ho tendreke
hanesehañ’ aze?
29 Mihembaña amy fibaray; amy te minday falilovam-pibara o haviñerañeo,
hahafohina’ areo te eo ty zaka.