20
Tsofare
1 Aa le hoe ty natoi’ i Tsofare
nte-Naamate:
2 Mañetsek’ ahy hanao o fitsakoreakoo, naho
tokoen-draha ty am-pisafoañ’ ao.
3 Fa tsinanoko i endake fañinjeañ’ ahiy, fe manoiñe ahy
ty arofo tsy takam-pahilàlako.
4 Tsy fohi’o hao boake haehae zay,
hirik ami’ty nampipohañe ondaty
an-tane atoy?
5 T’ie anianik’ avao ty hafalea’
o tsereheñeo,
mihelañe ty firebeha’ ty tsy aman-Kàke.
6 Ndra te mitakatse andikerañe eñe
ty fitoabora’e,
naho mioza rahoñe i añambone’ey,
7 mbe hihomake manahake o fiamonto’eo kitro-katroke;
hanao ty hoe o mpahatrea’ azeo:
Aia re?
8 Himosaoñe hoe nofy re,
tsy ho isake ka,
hasiotse hoe aroñaron-kaleñe.
9 Tsy ho isa’
ty fihaino nahaoniñe aze;
tsy hahatrea aze ka i akiba’ey.
10 Mipay tretre amo rarakeo o ana’eo;
le soloem-pità’e o vara’eo.
11 Lifotse ty havitrihan-katora’e
o taola’eo,
fe hitrao fidok’ ama’e an-debok’ ao.
12 Ndra te mamy am-palie’e ao
ty halò-tsere’e
vaho aeta’e ambane famele’e ao,
13 ndra te tea’e, tsy foe’e, tambozore’e am-palie’e ao,
14 le hiova hafaitse am-pisafoa’e ao
o mahakama’eo;
hoe vorehe’ o mereñeo ty ao.
15 Agedra’e o varao fe haloa’e;
ampañiliñan’ Añahare
boak’ am-pisafoa’e ao.
16 Sihe’e ty vorem-pañàneñe;
avetra’ ty fitsipom-pandrefeala.
17 Tsy ho sambae’e o torahañeo,
o saka midoandoan-tantele
naho hendron-drononoo.
18 Havaha’e i nifanehafa’ey, fa tsy hatele’e;
i vara niazo’e an-takinakey
tsy hahafale aze,
19 Amy te finorekeke’e o rarakeo
vaho nado’e ho poie’e;
nitavane’e ty anjomba tsy rinanji’e.
20 Ty amy tsy fipendreñañe an-tro’e ao,
tsy apo’ i fihaña’e
te eo ty himolaotse ama’e.
21 Po-draha sisa hagodrañe;
toly ndra hihelañe añe ty firaorao’e.
22 Ami’ty haliforan-kavokara’e
ty hanjoa’e fanjirañe;
fonga atreatre’e ze fità’ o misotrio.
23 Ie boboke ty fisafoa’e le hafetsa’e ama’e
ty fiforoforoan-kaviñera’e,
hakojojoa’e ama’e t’ie mihinañe.
24 Ndra te hivoratsaha’e
ty fialiam-bý, hampitrofak’ aze
ty fale torisìke.
25 Sitoneñe, le miakatse an-dambosi’e,
i masioñe milimolimotsey
boak’ añ’afero’e ao;
vaho vovoem-pirevendreveñañe.
26 Fimoromoroñañe ty vandroñeñe
ho amo vara’eo.
Afo tsy rarafeñe ty hamorototo aze vaho hangotomomoke ty honka’e
añ’akiba’e ao.
27 Ho borahe’ o likerañeo o hakeo’eo;
hitroatse hiatreatrea’ ty tane toy.
28 Ho kopaheñe ty vokatse
an-kivoho’e ao, ie hasoik’ añe amy andron-kaviñera’ey.
29 Zay ty toly havalen’ Añahare
amy lo-tserekey,
ty ampandovaen’ Añahare aze.